00:00:00 IGIHE NETWORK KN KINYARWANDA EN ENGLISH FR FRANCAIS

Basketball: Ingimbi z’u Rwanda zabonye itike y’Igikombe cya Afurika

Yanditswe na IGIHE
Kuya 17 June 2022 saa 08:41
Yasuwe :

Ikipe y’Igihugu y’u Rwanda y’Abahungu batarengeje imyaka 18, yakatishije itike yo kwitabira imikino ya nyuma y’Igikombe cya Afurika “U-18 AfroBasket”, kizabera i Antananarivo muri Madagascar ku wa 23 Nyakanga- 1 Kanama 2022.

Iyi kipe itozwa na Murenzi Yves yabigezeho nyuma y’uko yitwaye neza ikaba iya mbere mu mikino y’Akarere ka Gatanu “FIBA U-18 Africa Championship 2022-Zone V Preliminaries”, iri kubera i Kampala muri Uganda kuva ku wa 12-18 Kamena 2022.

U Rwanda rwashimangiye gusoza ku mwanya wa mbere nyuma yo gutsinda Uganda amanota 72-59 mu mukino w’umunsi wa kane w’iri rushanwa.

Muri uyu mukino wabaye ku wa Kane, tariki 16 Kamena 2022, amakipe y’u Rwanda na Uganda yasoje agace ka mbere anganya amanota 15-15, yongera kunganya mu gace ka kabiri amanota 18-18, ajya kuruhuka afite amanota 33-33.

Ikipe y’u Rwanda yaje kwitwara neza maze itsinda agace ka gatatu, ku manota 16-9 ndetse n’aka kane ari na ko ka nyuma ku manota 23-17, yegukana intsinzi ku kinyuranyo cy’amanota 13.

Kapiteni w’Ikipe y’u Rwanda, Sano Rutatika Dick, ni we watsinze amanota menshi muri uyu mukino, yinjije 21.

Ikipe y’u Rwanda isigaje gukina umukino usoza iri rushanwa uzayihuza na Tanzania ku wa Gatandatu, tariki ya 18 Kamena 2022.

Ni mu gihe undi mukino usigaye uhuza Tanzania na Uganda, wo ukinwa kuri uyu wa Gatanu, tariki 17 Kamena 2022.

U Rwanda rwatangiye neza rutsinda Uganda mu mukino wa mbere amanota 59 kuri 38, wabaye tariki 13 Kamena 2022; ni mbere yo gutsinda Tanzania mu wa kabiri amanota 73 kuri 57, wabaye tariki 15 Kamena 2022.

Kugeza ubu, u Rwanda ruri ku mwanya wa mbere n’amanota 6 kuri 6, Uganda iza ku mwanya wa kabiri n’amanota 4 mu mikino itatu naho Tanzania ni iya 3 n’amanota 2 mu mikino 2.

U Rwanda rwashimangiye gusoza ku mwanya wa mbere nyuma yo gutsinda Uganda amanota 72-59 mu mukino w’umunsi wa kane w’iri rushanwa
Muri uyu mukino wabaye ku wa Kane, tariki 16 Kamena 2022, amakipe y’u Rwanda na Uganda yasoje agace ka mbere anganya amanota 15-15
Ikipe y'Igihugu ya Uganda yatsinzwe n'u Rwanda
Ikipe y'Igihugu y'u Rwanda yakatishije itike y'igikombe cya Afurika

Abangavu b’u Rwanda ntibahiriwe

Ikipe y’u Rwanda y’Abakobwa batarengeje imyaka 18, yitabiriye iri rushanwa yo ntabwo yitwaye neza kuko yatsinzwe imikino itatu yose imaze gukina.

Mu mukino wabaye ku wa Kane, tariki 16 Kamena 2022, yatsinzwe na Tanzania amanota 86-79. Byasabye ko hitabazwa iminota y’inyongera kuko amakipe yombi yanganyije.

Mu mikino yabanje, aba bakobwa b’u Rwanda batsinzwe na Tanzania amanota 50-40 ndetse na Uganda irutsinda ku manota 71 kuri 50.

Ikipe y’u Rwanda irasoza imikino yayo kuri uyu wa Gatanu, tariki 17 Kamena 2022, ihura na Uganda.

Mbere y’uko ikina umukino wayo usoza iri rushanwa, Ikipe y’u Rwanda iri ku mwanya wa 3 n’amanota 3, Uganda ni iya kabiri n’amanota 4 mu mikino 2 mu gihe Tanzania ari iya mbere n’amanota 5 mu mikino 3 imaze gukina.

Tanzania na Uganda ni zo zihataniye kwishakamo ikipe imwe izahagararira aka Karere mu mikino ya Afurika.

Ikipe y’u Rwanda y’Abakobwa batarengeje imyaka 18 (bambaye ubururu) yatsinzwe na Tanzania
Ikipe y’u Rwanda irasoza imikino yayo kuri uyu wa Gatanu, tariki 17 Kamena 2022, ihura na Uganda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .