00:00:00 IGIHE NETWORK KN KINYARWANDA EN ENGLISH FR FRANCAIS

Basketball: Ikipe y’Igihugu iri mu myiteguro yo gushaka itike y’igikombe cy’Isi yatsinze Cape Verde

Yanditswe na Ntabareshya Jean de Dieu
Kuya 29 June 2022 saa 11:20
Yasuwe :

Ikipe y’igihugu ya Basketball iri mu myiteguro yo guhatanira tike y’igikombe cy’Isi cya Bastetball yatsinze Cape Verde mu mukino wa gicuti amanota 85-74.

Uyu ni umukino wakinwe mu rwego rwo kongera gupima ubuhanga n’imbaraga z’abasore b’ikipe y’igihugu y’u Rwanda yitegura kwesurana n’ibihangange mu gushaka tike y’igikombe cy’Isi cya Basketball.

Agace ka mbere k’umukino kegukanwe na Cape Verde ku manota 22-20 ariko u Rwanda narwo ruza gutsinda agace ka kabiri ku manota 30-22, ibi byafashije ikipe y’u Rwanda kuko amakipe yombi yagiye kuruhuka ruyoboye n’amanota 50-44.

Nyuma yo kuva ku ruhuka Cape Verde ikinamo abakinnyi b’ibihangange barimo na Witerr Tavarez usanzwe akinira Real Madrid yaje yahinduye umuvuno binayifasha kwegukana agace ka gatatu ku kinyuranyo cy’amanota abiri gusa 23-21 mu gihe u Rwanda rwongeye kuyikubita inshuro mu gace ka nyuma ku manota 14-7 ari nabyo byayihesheje intsinzi.

Ni umukino umuntu yavuga ko umutoza w’Ikipe y’igihugu ya Basketball, Dr Cheik Sarr, yashakaga gupimiramo abakinnyi be yari afite cyane ko habura iminsi mike bagahanganira n’andi makipe akomeye mu kibuga.

Ku ruhande rw’u Rwanda, Mpoyo Axelle olenga niwe watsinze amanota menshi muri uyu mukino kuko yatsinze amanota 19 wenyine mu gihe Ivan Almeida wa Cape Verde yatsinze amanota 10.

Imikino yo gushaka tike y’igikombe cy’Isi iteganyijwe kubera mu Rwanda yo ni iyo mu matsinda abiri ari yo itsinda rya mbere n’irya kabiri.

Iteganyijwe gutangira kuri uyu wa Gatanu tariki ya 1 Nyakanga 2022 kugeza ku Cyumweru tariki ya 3 Nyakanga 2022, aho buri kipe izakina imikino itatu mu rwego rwo gushaka itike.

Amakipe azahurira i Kigali ni Nigeria, Cape Verde, Uganda na Mali ari nako ku ruhandi ruhande u Rwanda ruzaba rwisobanura na Sudani y’Epfo, Tunisie na Cameroon nabyo bicakirane ku mikino y’umunsi wa mbere.

Ikipe y’u Rwanda ku mukino wa kabiri izahura na Cameroon kuwa Gatandatu izosereze kuri Tunisie ku Cyumweru tariki ya 3 Nyakanga uyu mwaka.

Umukinnyi w’Ikipe y’Igihugu y’u Rwanda ya Basketball, Nshobozwabyosenumukiza Jean Jacques Wilson, yavuze ko kugeza ubu abakinnyi biteguye kwitwara neza muri iyi mikino, asaba abafana kuzabashyigikira.

Ati “Muzaze mudushyigikire mubane natwe, mu mikino itatu yo gushaka itike y’igikombe cy’Isi […] twizeye kuzabashimisha kandi twizeye kuzatsinda nubwo siporo hari igihe biba rimwe na rimwe ugatsindwa ariko twizeye gushyiramo imbaraga zose dufite kugira ngo dutsinde.”

Umuyobozi Nshingwabikorwa w’ishyirahamwe ry’Umukino wa Basketball, Jabo Landry yavuze ko u Rwanda rwiteguye kwitwara neza cyane ko imikino yabanje aho rwari rwatahukanye umwanya wa nyuma mu itsinda rya kabiri hari byinshi byakosowe ku buryo biteze kubona itsinzi muri iyi mikino.

Ikipe y’Igihugu y’u Rwanda iri mu Itsinda rya Kabiri [B], irihuriyemo na Sudani y’Epfo, Tunisie na Cameroun.

Imikino ya mbere muri uru rugendo yabereye mu Mujyi wa Dakar muri Sénégal kuva tariki 26 Ugushyingo 2021. U Rwanda rwasoje nta mukino rutsinze.

Sudani y’Epfo yasoje ari iya mbere n’amanota atandatu, Tunisie ya kabiri n’amanota atanu, Cameroun ifite amanota ane mu gihe u Rwanda rwacyuye amanota atatu.

Ikipe y’u Rwanda yatsinzwe na Sudani y’Epfo amanota 68-56, itsindwa na Tunisie amanota 65-51 na Cameroun iyisubira iyitsinda ku manota 57-45.

Uyu musaruro uzashingirwaho mu kubara amanota yo gushaka amakipe atanu azahagararira Umugabane wa Afurika mu Gikombe cy’Isi.

U Rwanda ni kimwe mu bihugu 16 bya Afurika biri mu matsinda ane agizwe n’ibihugu bine muri buri tsinda nk’uko tombola yabereye i Kigali mu mpera za Nyakanga 2021 yabigaragaje.

Ibihugu 16 biri mu matsinda yo gushaka itike y’Igikombe cy’Isi ni ibyari mu mikino ya nyuma y’Igikombe cya Afurika yabereye mu Rwanda mu 2021.

Muri buri tsinda hazazamuka amakipe atatu bityo haboneke amakipe 12 ya nyuma hashingiwe uko yitwaje mu ijonjora rya mbere.

Aya makipe azashyirwa mu matsinda abiri, buri tsinda rijyemo ibihugu bitandatu.

Mu ijonjora rya kabiri rizaba rigizwe n’ibihugu 12, buri gihugu kizahura n’ikindi, imikino na yo izaba mu byiciro bibiri kugira ngo buri kimwe cyuzuze imikino itandatu.

Imikino ibanza izakinwa muri Kanama 2022 no muri Gashyantare 2023.

Nyuma y’imikino ya kabiri y’amakipe 12 ari mu matsinda abiri izakinwa muri Gashyantare 2023, hazarebwa ibihugu bibiri bya mbere bityo bibe ibihugu bine.

Nyuma hazarebwa ibihugu bibiri byasoje ku mwanya wa gatatu muri buri tsinda, igihugu kizaba cyaragize umusaruro mwiza kiyongere kuri bya bindi bine bibe ibihugu bitanu.

Ibyo bihugu bitanu ni byo bizahagararira Umugabane wa Afurika mu mikino y’Igikombe cy’Isi cya 2023.

Kugira ngo u Rwanda ruzinjire mu bihugu 12 bizajya mu ijonjora ry’amatsinda abiri, rurasabwa nibura kuva ku mwanya wa nyuma ruriho mu Itsinda B. Ni ukuvuga kwitwara neza mu mikino izabera muri Kigali.

Mu mikino izabera muri BK Arena muri Nyakanga 2022, u Rwanda rurasabwa gutsinda imikino yose rugategereza uko bizajya bigenda hagati y’andi makipe.

Urugendo rwo gushaka ibihugu bizahagararira Afurika mu Gikombe cy’Isi ruzarangira tariki 23 Gashyantare 2023.

Imikino ya nyuma y’Igikombe cy’Isi cya Basketball izabera mu Buyapani, Indonesie na Philippines kuva tariki 25 Kanama kugeza ku wa 10 Nzeri 2023.

BK Arena igiye kongera kwakira ibirori by'umukino wa Basketball ku rwego rwa Afurika
Ikipe y'u Rwanda nubwo ari iya nyuma mu itsinda B yatanze icyizere muri iyi mikino igiye kubera i Kigali
Nshobozwabyosenumukiza yageragezaga gutsinda amanota abiri
Abakinnyi b'Ikipe y'Igihugu bagaragaje urwego rwiza muri uyu mukino
Ikipe y' u Rwanda yatsinze iya Cape Verde mu mukino wa gicuti

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .