00:00:00 IGIHE NETWORK KN KINYARWANDA EN ENGLISH FR FRANCAIS

Basketball: Hatangajwe ingengabihe ya shampiyona 2022-2023

Yanditswe na Byiringiro Osée Elvis
Kuya 1 Mutarama 2023 saa 06:05
Yasuwe :

Ishyirahamwe Nyarwanda ry’Umukino wa Basketball (FERWABA), ryatangaje uko amakipe azahura mu mwaka w’imikino wa 2022/23 muri shampiyona izatangira ku wa 13 Mutarama 2023 mu bagabo na tariki 21 Mutarama mu bagore.

REG BBC ifite igikombe cya shampiyona guheruka, izafungura ikina na Orion BBC iheruka kuzamuka mu Cyiciro cya mbere mu mukino uzaba ku wa 13 Mutarama 2023.

Patriots BBC iri mu zifite abafana benshi izatangira icakirana na Kigali Titans na yo izaba ikina umwaka wayo wa mbere mu Cyiciro cya mbere. APR BBC ifitiwe amatsiko na benshi kubera abakinnyi bakomeye ifite ndetse yitezweho kuzatanga akazi gakomeye, izatangira ikina na IPRC Musanze ku wa 14 Mutarama 2023.

Umukino uba utegerejwe na benshi uhuza Patriots na REG BBC uzaba ku wa 24 Gashyantare 2023 bizaba ari ku munsi wa 18 wa shampiyona.

Muri rusange shampiyona y’uyu mwaka mu bagabo izakinwa n’amakipe 12 ariyo REG BBC,Patriots, APR BBC,Tigers BBC,Espoir BBC,IPRC Kigali, UGB, Shoot 4 Stars, IPRC Musanze, IPRC Huye, Kigali Titans na Orion BBC.

Mu bagore shampiyona izatangira tariki 21 Mutarama 2023, aho REG WBBC ifite igikombe cya shampiyona giheruka izatangira yakira UR Kigali. APR WBBC izakina na UR Busogo.

Umukino uba uhanzwe amaso na benshi uhuza REG na APR uzaba ku wa 1 Mata 2023.

Nyuma y’umunsi wa mbere, shampiyona izahita ihagarara kubera ko ikipe y’Igihugu izaba iri kwitegura imikino ndetse no gukina imikino y’amajonjora y’igikombe cya Afurika (Afro Basket) izabera mu Rwanda tariki 28 Nyakanga-6 Kanama 2023.

Shampiyona y’uyu mwaka izitabirwa n’amakipe umunani ariyo REG BBC, APR BBC, IPRC Huye,The Hoops,GS Marie Reine,UR Busogo,UR Kigali na GS Gahini.

Uyu mwaka kandi hazatahwa ibibuga bibiri bishya harimo igiherereye Kimironko kizakira abantu 600, cyubatswe ku nkunga ya Imbuto Foundation na Basketbal Africa League n’ikindi giherereye muri Lycée de Kigali cyakira abantu 1300.

Shampiyona ya Basketball mu bagore izatangira ku wa 21 Mutarama 2023

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .