Aba bakinnyi bombi bari muri 15, Umutoza w’Ikipe y’Igihugu, Dr. Cheikh Sarr, yahamagaye mu kwitegura iyi mikino iteganyijwe tariki ya 22 kugeza 24 Ugushyingo 2024.

Mu gihe abandi bose bakomeje umwiherero, Ntore na Mpoyo ntabwo baragaragara, aho Ntore yatangarije B&B Fm Kigali ko atifuje kwitabira ubu butumire kuko ananiwe bityo akeneye kuruhuka no kwiyitaho.

Mu gushaka kumenya icyo Ishyirahamwe rya Basketball (FERWABA) ribivugaho, ryatangarije IGIHE ko aba basore bavuze ko bakeneye kuruhuka bityo byaba byiza batitabiriye ubutumire bw’Ikipe y’Igihugu.

Iri shyirahamwe kandi ryahakanye amakuru yavugwaga ko impamvu aba bakinnyi bafashe iki cyemezo hari amafaranga ribabereyemo.

Muri iyi mikino, u Rwanda ruri mu itsinda rya gatatu hamwe na Sénégal, Cameroun na Gabon.

Mu rwego rwo kwitegura neza iyi mikino, Ikipe y’Igihugu yateguye imikino ya gicuti izahuramo na Sudani y’Epfo na Mali, tariki ya 19 na 20 Ugushyingo 2024.

Ntore Habimana yari kumwe n'Ikipe y'Igihugu yegukanye umwanya wa gatatu muri Afrocan

Axel Mpoyo aheruka mu Ikipe y'Igihugu mu 2022, mu mikino yo gushaka itike y'Igikombe cy'Isi