Basketball: Abakinnyi 22 bahamagawe mu ikipe y’Igihugu yitegura imikino yo gushaka itike ya Afrobasket 2021

Yanditswe na Eric Tony Ukurikiyimfura
Kuya 15 Mutarama 2021 saa 02:09
Yasuwe :
0 0

Umutoza w’agateganyo w’Ikipe y’Igihugu ya Basketball, Henry Mwinuka, yahamagaye abakinnyi 22 bazitabira umwiherero wo kwitegura imikino y’amatsinda yo gushaka itike y’Igikombe cya Afurika mu Bagabo (Afrobasket 2021) kizabera mu Rwanda.

Kuri uyu wa Gatanu ni bwo Ishyirahamwe Nyarwanda ry’Umukino wa Basketball (FERWABA) ryashyize hanze urutonde rw’abakinnyi bazitabira umwiherero guhera ku wa 16 Mutarama 2021.

Rigira riti “FERWABA irabamenyesha ko Ikipe y’Igihugu ya Basketball izatangira umwiherero tariki ya 16 Mutarama 2021 yitegura amajonjora ya FIBA Afrobasket azaba hagati ya tariki ya 17 na 27 Gashyantare 2021 muri Tunisia.”

Abakinnyi barimo Kenneth Gasana Hubert, Schommer Kalekezi Dylan, Ngoga Elias, Habineza Shaffy na Mukama Jean Victor, biganjemo abakina hanze, bose bari bahamagawe mu mikino ibanza yabereye mu Rwanda mu Ugushyingo 2020, ntibagaragara kuri uru rutonde.

Mu mikino ibanza yabereye i Kigali mu mezi abiri n’igice ashize, Ikipe y’Igihugu yatsinzwe imikino itatu yose yo mu itsinda D yahuyemo na Mali, Nigeria na Sudani y’Epfo.

Uku kwitwara nabi byatumye Umunya-Serbie Vladmir Bosnyak asezera ku gutoza Ikipe y’Igihugu, isigaranwa na Henry Mwinuka yungirijwe na Nkusi Aimé Karim mu gihe hakomeje gushakwa umutoza mukuru.

Afrobasket 2021 izitabirwa n’amakipe 16, izabera mu Rwanda hagati ya tariki ya 24 Kanama n’iya 5 Nzeri 2021.

Abakinnyi 22 bahamagawe: Bugingo Kabare Hubert, Gasana Sano, Hagumintwari Steven, Hubert Wilson Kenneth, Jovon Filer Adonis, Kabange Kami, Kaje Elie, Kimasa Dan, Mpoyo Axel, Muhizi Prince, Muhayumukiza Eric, Ndizeye Ndayisaba Dieudonné, Ndoli Jean Paul, Niyonkuru Pascal, Niyonsaba Bienvenu, Nshobozwabyosenumukiza Jean Jacques Wilson, Ntwari Marius Trésor, Nyamwasa Bruno, Sagamba Sedar, Shema Osborne, Shyaka Olivier na Uwitonze Justin.

Ikipe y'Igihugu ya Basketball igiye kwitegura imikino yo kwishyura y'amajonjora yo gushaka itike ya Afrobasket 2021

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .