00:00:00 IGIHE NETWORK KN KINYARWANDA EN ENGLISH FR FRANCAIS

Barack Obama yabaye umufatanyabikorwa wa NBA Africa

Yanditswe na Eric Tony Ukurikiyimfura
Kuya 28 Nyakanga 2021 saa 02:23
Yasuwe :
0 0

Uwahoze ari Perezida wa Leta Zunze Ubumwe za Amerika, Barack Obama, yiyunze kuri NBA Africa nk’umufatanyabikorwa ugamije kwagura ibikorwa by’iri shami rya Shampiyona ya Basketball muri Amerika, NBA.

Ku wa Kabiri, tariki ya 27 Nyakanga 2021, ni bwo NBA Africa yatangaje ko Barack Obama yabaye umufatanyabikorwa wayo mushya ndetse n’umwe mu bashoramari bato, uzagira uruhare mu kwaguka kw’ibikorwa byayo muri Afurika.

Yagize iti “Obama azafasha guteza imbere imishinga igamije imibereho myiza y’abatuye Umugabane wa Afurika, harimo gahunda n’ubufatanye bishyigikira uburinganire bw’umugabo n’umugore ndetse bigamije kuzamura ubukungu."

Iri shami rya NBA muri Afurika, ryavuze ko ubu bufatanye bugamije kongera ibikorwa bya Shampiyona ya Basketball muri Amerika ku isoko rya Afurika, kongera umubare w’abakinnyi b’Abanyafurika n’urukundo rw’umukino mu bafana bo kuri uyu mugabane.

Barack Obama wabaye Perezida wa 44 wa Leta Zunze Ubumwe za Amerika ndetse akaba yarakinnye Basketball akiri muto, yavuze ko nubwo atakinnye ku rwego rwo hejuru, ariko uyu mukino ari kimwe mu byamufashije kugera ku rwego ariho uyu munsi.

Ati “Nubwo ntagize impano yo gukina ku rwego rwo hejuru, Basketball yampaye icyerekezo cy’ubuzima bwanjye. Yanyigishije uburyo bakora cyane, uburyo bahangana n’uburyo umuntu akorera mu ikipe.”

Obama afite inkomoko muri Kenya. Se yari uwo mu gace ka Nyangoma-Kogelo ko muri icyo gihugu.

Yakomeje avuga ko “gushora mu muryango Nyafurika, guteza imbere uburinganire no kubiba urukundo rw’umukino wa Basketball, bizakora ikinyuranyo cy’ubuzima ku rubyiruko rwinshi rwa Afurika.”

Shampiyona y’umukino wa Basketball muri Amerika “NBA” ifite icyicaro muri Afurika kuva mu 2010, aho cyashyizwe i Johannesburg.

Ku wa 24 Gicurasi 2021 hatangijwe ku mugaragaro Ishami rya NBA Africa rizajya rikurikirana ibikorwa bibera muri Afurika birimo amarushanwa atandukanye.

Basketball Africa League (BAL) yabereye mu Rwanda hagati ya tariki ya 16 n’iya 30 Gicurasi 2021, ni rimwe mu marushanwa akurikiranwa na NBA Africa.

Inkuru bifitanye isano: NBA yatangije ishami rishya muri Afurika ku bufatanye n’abashoramari

Barack Obama yabaye umufatanyabikorwa wa NBA Africa ugamije kwagura ibikorwa byayo kuri uyu mugabane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .