BK yongereye inkunga muri shampiyona ya Basketball igera kuri miliyoni 135 Frw

Yanditswe na Eric Tony Ukurikiyimfura
Kuya 15 Mutarama 2020 saa 05:36
Yasuwe :
0 0

Mu mwaka wa kabiri w’amasezerano y’ubufatanye hagati ya Banki ya Kigali n’Ishyirahamwe Nyarwanda ry’Umukino wa Basketball (FERWABA), uyu muterankunga wa Basketball y’u Rwanda yazamuye amafaranga yatangaga ku mwaka agera kuri miliyoni 135 Frw.

Guhera mu mwaka ushize w’imikino nibwo Banki ya Kigali yatangiye gukorana na FERWABA ku masezerano y’imyaka itatu yashyizweho umukono muri Ugushyingo 2018, afite agaciro ka miliyoni 300 Frw.

Ku ikubitiro, Banki ya Kigali yatanze miliyoni 100 Frw mu mwaka wa mbere, zifashishijwe mu marushanwa arimo abanziriza shampiyona, imikino y’abakina ari batatu na Shampiyona yasojwe n’imikino ya Playoffs.

Ubwo hasinywaga amasezerano mashya mbere yo kwinjira mu mwaka wa kabiri w’ubufatanye, mu muhango wabereye ku cyicaro gikuru cya BK Group Plc mu Mujyi wa Kigali kuri uyu wa Gatatu, nibwo hatangajwe ko amafaranga aziyongera.

Umuyobozi Mukuru wa Banki ya Kigali, Dr. Karusisi Diane, yavuze ko bishimiye uko bakoranye na FERWABA mu mwaka wa mbere ndetse bifuza ko byaba byiza birushijeho muri uyu mwaka wa kabiri.

Ati "Twagiranye ubufatanye na FERWABA kugira ngo tuzamure Basketball kandi habaye imikino myiza. Twaricaye tureba ibyo tuzakora muri uyu mwaka kuko turashaka gukora ibirenze ibyo twagezeho umwaka ushize, umukino wa Basketball ugakomeza gukundwa mu Rwanda kandi tukabona n’ibikombe ku rwego mpuzamahanga.’’

Umuyobozi wa FERWABA, Mugwiza Désiré, yashimiye Banki ya Kigali uburyo yatumye urwego rw’uyu mukino ruzamuka ndetse avuga ko yizeye ko n’amarushanwa yose ari muri uyu mwaka azagenda neza ku bufatanye n’uyu muterankunga wayo mukuru.

Kuba Shampiyona y’abagabo yariyongereyemo amakipe atanu mashya, hakaba hazongerwa uduce tubiri (Rusizi na Nyamasheke & Gicumbi na Nyagatare) mu tuzakinirwamo Basketball y’abakina ari batatu ndetse hakaba hari n’imikino myinshi izakinirwa muri Kigali Arena, byatumye Banki ya Kigali yongera amafaranga yatangaga ku mwaka, ava kuri miliyoni 100 Frw agera kuri miliyoni 135 Frw.

Muri uyu muhango, herekanwe kandi abakinnyi bagizwe ba ambasaderi ba Banki ya Kigali, aho abakobwa ari Imanizabayo Marie Laurence (The Hoops), Kantore Sandra (APR WBBC), Mugwaneza Charlotte (APR WBBC), Uwizeyimana Assouma (APR WBBC) na Mwizerwa Faustine wa The Hoops.

Abahungu ni Ndayisaba Ndizeye Dieudonné Gaston (Patriots BBC), Nshobozwabyosenumukiza Wilson (REG BBC), Niyonkuru Pascal (APR BBC), Niyonsaba Bienvenu (APR BBC ) na Sangwe Armel (APR).

Buri umwe yahawe miliyoni imwe ndetse Banki ya Kigali yatangaje ko hari n’ibikorwa bazajya bajyamo bakishyurwa mu rwego rwo kubateza imbere.

Shampiyona y’uyu mwaka w’imikino wa 2019/20 izatangira ku wa Gatanu w’iki cyumweru, tariki ya 17 Mutarama 2020.

Inkuru bijyanye: Umusaruro w’ubufatanye bwa Banki ya Kigali na FERWABA muri Basketball y’u Rwanda.

REG na Patriots BBC ni amakipe yigaragaje cyane mu mwaka ushize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza