Uyu mukino wabaye ku Cyumweru, ukurikiye uwo Al Ahli Tripoli yari imaze kunyagiramo Nairobi City Thunder amanota 115-87.

Umukino wa APR BBC na MBB watangiye wihuta, amakipe yombi atsindana abifashijwemo na Youssoupha Ndoye na Peter Prinsloo. Agace ka mbere karangiye, MBB iyoboye umukino n’amanota 26 kuri 23 ya APR BBC.

Mu minota ya mbere y’agace ka kabiri, umukino wakomeje kwegerana ari nako MMB igenda imbere. Mu minota itatu ya nyuma, Axel Mpoyo yatsinze amanota atatu yikurikiranya amakipe yombi anganya 42-42.

Igice cya mbere cyarangiye MBB ikomeje kuyobora umukino n’amanota 47 kuri 45 ya APR BBC.

Ikipe y’Ingabo yasubiranye imbaraga mu gace ka gatatu, abarimo Aliou Diarra na Axel Mpoyo batsinda amanota menshi ndetse inayobora umukino ku kinyuranyo cy’amanota 14. Aka gace karangiye, APR BBC yigaranzuye MBB iyobora umukino n’amanota 73-59.

Mu gace ka nyuma, umukino watuje, amanota amakipe yatsindaga aragabanuka ariko APR BBC izamura ikinyuranyo kigera mu manota 20 (87-67).

Mu minota ibiri ya nyuma, Ndoye yatsinze amanota menshi yatumye Ikipe y’Ingabo igeza mu 100. Umukino warangiye APR BBC yatsinze MBB amanota 103-81 ibona intsinzi ya kabiri muri iri tsinda.

Kugeza ubu, APR BBC na Al Ahli Tripoli zimaze gutsinda imikino yombi, mu gihe Nairobi City Thunder na MBB zitarabona intsinzi.

Iyi mikino izakomeza ku wa kabiri, tariki ya 20 Gicurasi 2025, ahateganyijwe umukino ukomeye cyane hagati ya APR BBC na Al Ahli Tripoli saa 19:00. Uzabanzirizwa n’uwa MBB na Nairobi City Thunder uzakinwa saa 16:00.

Umusifuzi atangiza umukino

Dine Miller Jr ashaka inzira

Obadiah Noel atera lancer franc

Perezida Kagame akurikiye umukino

Ange Kagame akurikiye umukino

Miss Nishimwe Naomie yafanaga bikomeye

Kelly Malda wo muri Mackenzie akurikiye umukino

BK Arena yarimo abafana benshi

Ariel Wayz ni umwe mu bahanzikazi bakomeye mu Rwanda

Ariel Wayz yasusurukije abitabiriye umukino wa APR na MBB

Miss Muyango ni umwe mu bari kwitabira iyi mikino

Aliou Diarra atera lancer franc

Aliou Diarra agerageza gutsinda

APR BBC yegukanye intsinzi ya kabiri

Ntore Habimana ahanganiye umupira

MBB yagize igice cya mbere cyiza

Nairobi City Thunder imaze gutsindwa imikino yombi

Al Ahli Tripoli yanyagiye Nairobi City Thunder

Amafoto ya IGIHE: Shumbusho Djasiri na RUSA Prince