00:00:00 IGIHE NETWORK KN KINYARWANDA EN ENGLISH FR FRANCAIS

BAL 2022: Iby’ingenzi kuri Zamalek ibitse igikombe

Yanditswe na Mihigo Saddam
Kuya 21 May 2022 saa 01:44
Yasuwe :

Mu 2021 ubwo hakinwaga irushanwa rya BAL ku nshuro yaryo ya mbere, ikipe ya Zamalek yo mu Misiri yakoze amateka iba ikipe ya mbere iryegukanye itsinze US Monastir yo muri Maroc ku mukino wa nyuma wakiniwe muri Kigali Arena.

Zamalek ni ikipe y’ubukombe muri Basketball ya Afurika bitewe n’ibikombe, amarushanwa akomeye yagiye ikina n’imidali itandukanye yatsindiye mu myaka 85 imaze ishinzwe.

Kuva yashingwa mu 1937 kugeza mu 1941 yitwaga El Mokhtalat. Kuva mu 1941 kugeza mu 1952 yitwaga Farouk wa Mbere (Farouk I).

Yatangiye kwitwa Zamalek kuva mu 1952 kugeza ubu ibitse ibikombe 18 bya shampiyona ya Misiri, ikaba ikipe ibirusha izindi mu Misiri.

Iyi kipe iba mu mujyi wa Giza mu Misiri, yakirira imikino kuri Abdulrahman Fawzi Hall yakira abantu ibihumbi bine bicaye neza.

Mortada Mansour uyobora Zamalek y’umupira w’amaguru ni na we uyobora iyi kipe ya Basketball.

Zamalek imaze gutwara ibikombe 13 by’igikombe cy’igihugu cya Misiri, ibikombe bitatu biruta ibindi, ibikombe bibiri by’ubwami bwa Misiri.

Mu 1970, yatwaye igikombe cya Repbulika ya Misiri inatwara irushanwa rya Cairo inshuro 23.

Mu 1992, Zamalek yatwaye igikombe cya mbere cy’irushanwa rihuza amakipe yabaye aya mbere iwayo, iba iya kabiri inshuro eshatu, ifite umwanya wa gatatu inshuro ebyiri.

Iyi kipe yabaye ubukombe andi makipe atangira kuyigendera kure mu mwaka w’imikino 1970-1971 ubwo yatumirwaga mu irushanwa rihuza amakipe ahiga andi i Burayi.

Umukino wa mbere yahuye na Real Madrid Baloncesto bakina injonjora rya kabiri. Inshuro ya kabiri, Zamalek yagiyeyo mu 1974-1975 aho bahuye na Slavia VŠ Praha yo muri Repubulika ya Czech.

Inshuro ya gatatu ya Zamalek i Burayi byari mu mwaka w’imikino 1975-1976, umukino yakinnye yahuye na PBC Academic yo muri Bulgarie.

Mu mwaka w’imikino 1978-1979 bakinnye iri rushanwa ku nshuro ya kane iri mu itsinda rya mbere ryarimo; Real Madrid Baloncesto, Budapesti Honved SE na Klosterneuburg Dukes.

Muri uyu mwaka, Zamalek yasoje imikino y’amatsinda iri ku mwanya wa kane itsinze umukino umwe.

Mu mwaka w’imikino 1979-1980, Zamalek yasubiyeyo irongera ishyirwa mu itsinda rya mbere iza ku mwanya wa gatatu mu itsinda itsinze imikino ibiri.

Mu 1982 nabwo Zamalek yatumiwe muri iyi mikino yikuramo mbere y’itangira ry’irushanwa bityo urugendo rwayo i Burayi.

Zamalek ifite amateka mu mikino ya BAL:

Mu 2019, Zamalek yatwaye igikombe cya 11 yari itwaye mu myaka 11 yari ishize. Ibi byayihaye itike yo kujya mu mikino ya BAL ya 2020 yakinwe mu 2021.

Zamalek ifite amateka akomeye mu Misiri ko ariyo kipe ya mbere yaserukiye iki gihugu muri BAL.

Mu 2021 ubwo Zamalek yatwaraga BAL 2020, cyari igikombe cya kabiri mpuzamahanga itwaye kuko yaherukaga kubikora mu 1992.

Walter Wallace Hodge wabaye umukinnyi mwiza (MVP) wa BAL 2021 yakiniraga Zamalek, biyigira ikipe ya mbere yagize umukinnyi mwiza wa BAL.

Kwinjira mu mikino ya BAL ya 2022 yabifashijwe no kuba yaratwaye igikombe cya shampiyona ya 2021 itsinze Al Ittihad muri Playoffs.

Muri uyu mwaka wa 2022, Zamalek yaserukiye Afurika mu mikino ihuza amakipe ahiga andi ku migabane. Iri rushanwa yaryitabiriye kuko yatwaye BAL.

Muri iri rushanwa ryabaga ku nshuro ya 31, Zamalek yasoje ku mwanya wa kane, Flamengo yo muri Brézil iritwara bwa kabiri itsinze Sam Pablo Burgos yo muri Espagne.

Mu gushaka umwanya wa gatatu, Zamalek yatsinzwe na Lakeland Magic yo muri Leta Zunze Ubvumwe za Amerika amanota 113-78.

Iri rushanwa bari ubwa mbere rikinirwa muri Afurika kuko ryakiriwe n’igihugu cya Misiri. Zamalek yabaye ikipe ya mbere yo mu Misiri irikinnye.

Mu mikino ya BAL ya 2022, Zamalek izaba itozwa na William Voigt uzwi nka Will Voigt, Umunyamerika w’imyaka 46.

Will Voigt yatoje ikipe ya Los Angeles Clippers muri NBA aho yari umutoza w’agateganyo kuva mu 1988-1999. Yatoje Texas yungirije.

Voigt kandi yatoje amakipe atandukanye arimo na Telekom Baskets Bonn yo mu Budage mu 2020-2021 mbere yo kujya muri Zamalek muri Mutarama 2022.

Zamalek yakoze amateka itwara BAL bwa mbere irashaka kuyisubiza
Ubwo Zamalek yatwaraga BAL ya 2020, Walter Wallace Hodge niwe wahize abandi (MVP)
Zamalek yakuye abafana muri Kigali Arena bitewe n'ubuhanga abakinnyi bayo bagaragaje
Zamalek yagoye amakipe muri BAL ya 2020
Zamalek irusha ibikombe amakipe yose yo mu Misiri. Al Ahly basigaye bahangana yatwaye igikombe cya gatandatu cya shampiyona muri uyu mwaka
Zamalek izatangira imikino ya BAL 2022 ku Cyumweru ikina na SLAC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .