00:00:00 IGIHE NETWORK KN KINYARWANDA EN ENGLISH FR FRANCAIS

BAL 2022: Iby’ingenzi wamenya kuri US Monastir iheruka ku mukino wa nyuma

Yanditswe na Mihigo Saddam
Kuya 17 May 2022 saa 07:21
Yasuwe :

Kuva tariki 21-28 Gicurasi 2022 muri Kigali Arena hazakinirwa imikino ya nyuma y’irushanwa rihuza amakipe ahagaze neza muri Basketball (BAL), rizaba rikinwa ku nshuro yaryo ya kabiri. Imwe mu makipe ahanzwe amaso ni US Monastir.

Ubwo BAL yakinwaga ku nshuro ya mbere, US Monastir yageze ku mukino wa nyuma ihatsindirwa na Zamalek yo mu Misiri amanota 76-63.

Union Sportive Monastirienne izwi nka US Monastir ni ikipe y’ubukombe muri Tunisie, yashinzwe mu 1959.

Muri shampiyona ya Tunisie, US Monastir iba ihanganye n’andi makipe akomeye arimo Etoile Sportif du Sahel, ES Rades, Club Africain, Stade Nabeulien n’andi.

Iyi kipe yambara ubururu n’umweru, kuva mu 2006 yakirira imikino yayo mu nyubako ya Mohamed-Mzali Sports Hall iri mu mujyi wa Monastir yakira abantu 4075.

Kuva yashingwa, US Monastir ibitse ibikombe birindwi bya shampiyona ya Tunisie, bine by’igikombe cy’igihugu na kimwe cy’ibihugu by’Abarabu.

US Monastir yatwaye igikombe cya shampiyona bwa mbere mu 1998 itsinze Ezzahra Sports ku mukino wa nyuma.

Mu mwaka w’imikino 1999-2000, yatwaye shampiyona inatwara igikombe cy’igihugu icya rimwe. Mu gikombe cya shampiyona yatsinze Club Africain inatsinda Ezzahra SC mu gikombe cy’igihugu.

Mu 2005 nibwo US Monastir yongeye gutwara igikombe cya shampiyona itsinze Stade Nabeulien amanota 66-51 ku mukino wa nyuma.

Mu 2014 nibwo bwa mbere iyi kipe itegerejwe i Kigali yakinnye imikino Nyafurika gusa ntabwo yarenze amatsinda kuko mu 2017 yasoje ku mwanya wa gatatu.

Mu 2019 yatwaye ikindi gikombe cya shampiyona itsinze ES Rades inabikora mu 2020 n’ubundi itsinze umucyeba ES Rades.

Mu 2021, yatsinze Ezzahra SC iyitwara igikombe cya shampiyona cyari icya gatandatu kuri yo ndetse igitwara inshuro eshatu zikurikiranya.

Muri uwo mwaka kandi, US Monastir yari mu makipe 12 yari mu Rwanda hakinwa imikino ya nyuma ya BAL, igera ku mukino wa nyuma itsindwa na Zamalek.

Umunya-Serbie, Miodrag Perišić w’imyaka 49 niwe mutoza mukuru wa US Monastir kuva mu 2020. Ni umugabo wanatoje Zamalek kuva mu 2009-2011.

Mu mikino ya BAL y’uyu mwaka, US Monastir izakina umukino wa ¼ cy’irangiza ihura na Cape Town yo muri Afurika y’Epfo ku Cyumweru tariki 22 Gicurasi 2022 saa munani n’igice i Kigali.

Radhouane Slimane wa US Monastir ni umwe mu bafashije iyi kipe kwitwara neza muri BAL yo mu 2021
US Monastir ni imwe mu makipe atinyitse muri BAL ya 2022
Iyi kipe imaze kuba ubukombe mu gihugu cyayo
Yitezweho kugera kure mu irushanwa rizabera i Kigali
Igikombe cyayiciye mu myanya y'intoki umwaka ushize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .