Antetokounmpo yaciye agahigo ko gusinya amasezerano ahenze mu mateka ya NBA

Yanditswe na Eric Tony Ukurikiyimfura
Kuya 16 Ukuboza 2020 saa 01:17
Yasuwe :
0 0

Giannis Antetokounmpo ukinira Milwaukee Bucks yongereye amasezerano byatangajwe ko afite agaciro ka miliyoni $228.2 (asaga miliyari 227 Frw), akaba ari nayo ahenze mu mateka ya Shampiyona ya Basketball muri Leta Zunze Ubumwe za Amerika, NBA.

Uyu mukinnyi w’imyaka 26 wabaye umukinnyi mwiza wa NBA (MVP) inshuro ebyiri, yemeye gusinya imyaka itanu nk’uko byemejwe n’umuhagarariye.

Amafaranga yatangajwe arenze miliyoni 228$ Houston Rockets yishyuye James Harden mu 2017.

Abinyujije ku mbuga nkoranyambaga ze, Antetokounmpo yagize ati “Aha ni mu rugo, uyu ni umujyi wanjye. Ni umugisha kuba ndi umwe mu bagize Milwaukee Bucks mu myaka itanu iri imbere.”

Umugereki Antetokounmpo yatoranyijwe na Bucks muri draft ya 2013, ndetse amasezerano ye yari kurangira mu 2020/21. Amasezerano ye mashya, amwemerera gusaba kuva muri iyi kipe nyuma y’umwaka wa kane.

Mu mwaka ushize w’imikino, Bucks yasoreje ku mwanya wa mbere mu gace k’Iburasirazuba, ariko isezererwa na Miami Heat muri ½ cya Playoffs.

Antetokounmpo yabaye MVP wa NBA ku nshuro ya kabiri yikurikiranya muri Nzeri ndetse ni we watowe nk’umukinnyi urusha abandi kugarira, aba umukinnyi wa gatatu wegukanye ibi bihembo byombi mu mwaka umwe w’imikino nyuma ya Michael Jordan na Hakeem Olajuwon.

Harden yari afite imyaka ibiri ifite agaciro ka miliyoni 59$, yari isigaye ku masezerano ya mbere ubwo yasinyaga indi myaka ine ya miliyoni 169$ mu 2019.

Impuzandengo y’umushahara wa Antetokounmpo ku mwaka, ingana na miliyoni 45.6$, irenze uwa Russell Westbrook wa Washington Wizards, wasinye imyaka itanu kuri miliyoni $206.8, ingana na miliyoni $41.4 ku mwaka.

Shampiyona ya NBA ya 2020/21, izakinwamo imikino 72 y’umwaka usanzwe w’imikino kubera COVID-19, iteganyijwe gutangira ku wa 22 Ukuboza 2020.

Ibihe by’ingenzi byaranze Giannis Antetokounmpo mu mwaka wa 2019/20 mu kibuga

Giannis Antetokounmpo yabaye umukinnyi usinye amasezerano ahenze muri NBA

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .