Amateka y’umunyabigwi Kobe Bryant wahariwe tariki ya 24 Kanama

Yanditswe na Eric Tony Ukurikiyimfura
Kuya 24 Kanama 2020 saa 04:03
Yasuwe :
0 0

Tariki 24/8 nibwo hazajya hizihizwa umunsi wahariwe kwibuka ibigwi by’umunyabigwi Kobe Bryant, ’’Kobe Bryant Day’’, wari umukinnyi w’ikirangirire mu mukino wa Basketball.

Kobe Bryant n’umukobwa we, Gianna Bryant, baguye mu mpanuka y’indege ya kajugujugu yabaye tariki ya 26 Mutarama uyu mwaka i Calabasas muri California, igahitana abantu icyenda.

Nyuma y’uko hagaragaye ko uyu mukinnyi yari icyitegererezo ku bantu b’ingeri zose by’umwihariko abakinnyi bakizamuka, mu Mujyi wa Los Angeles ndetse no ku Isi yose, hazajya hizihizwa umunsi we wahujwe na nimero ya ’Jesery’ yambaye (8 na 24) n’itariki ya 24 Kanama.

Ubusanzwe Kobe Bryant yavutse ku wa 23 Kanama ndetse yakabaye yarujuje imyaka 42 ku Cyumweru.

Muri Gicurasi uyu mwaka, NBA yemeje ko igihembo gihabwa umukinnyi witwaye neza kurusha abandi mu mukino uhuza intoranywa muri Shampiyona ya NBA “All-Star Game MVP Award” cyitirirwa Kobe Bryant.

Bryant afite agahigo yihariye muri NBA ko kuba yarakinnye All-Star inshuro 18 zikurikiranya hagati ya 1998 na 2016.

Yabaye umukinnyi mwiza w’uyu mukino (MVP) mu 2002, 2007, 2009 (atwarana igihembo na Shaquille O’Neal) no mu 2011. Umukinnyi umwe watwaye iki gihembo inshuro imwe ni Bob Pettit.

Mu myaka 20 yakinnye mu LA Lakers, Kobe Bryant yegukanye Shampiyona ya NBA inshuro eshanu, aba umukinnyi mwiza wa Shampiyona mu mwaka w’imikino wa 2007/08 mu gihe yatoranyijwe mu ikipe ya NBA inshuro 15.

Bryant ni uwa kane mu batsinze amanota menshi mu mateka ya NBA, n’amanota 33,643.

Kobe Bryant n'umukobwa we, Gianna, bapfiriye mu mpanuka ya kajugujugu yahitanye abantu icyenda muri Mutarama uyu mwaka

Amateka ya Kobe Bryant:

Kobe Bean Bryant wagize isabukuru y’imyaka 42 ku Cyumweru, yavutse tariki 23 Kanama 1978, mu Mujyi wa Philadelphia muri Leta ya Pennsylvania, abyarwa na Joe Bryant (wakinnye muri NBA) na Pamela Cox Bryant.

Bryant yatangiye gukina umukino wa Basketball afite imyaka itatu, amaze kugera imyaka itandatu se ahagarika gukina muri NBA, ajya gukomereza gukina mu Butaliyani yimukana yo n’umuryango we ari nabwo byahaye Kobe kumenya no kuvuga Igitaliyani neza.

Ikipe ya Los Angeles Lakers niyo Kobe yakuze akunda dore ko ari nayo Sogokuru we yakundaga bigatuma amwoherereza amashusho yayo kugira ngo ajye yigiraho gukina.

Rimwe na rimwe mu gihe cy’ibiruhuko, Kobe yajyaga muri Leta Zunze Ubumwe za Amerika gukina imikino y’abana ya ’Basketball Summer League.’

Nyuma y’uko umuryango we ugarutse muri Amerika, Kobe yahise ajya kwiga no gukinira ikipe ya Lowe Merion School mu mujyi wa Philadelphia ari naho abatoza b’amashuri atandukanye (Duke, Michigan, North Calorina, Villanova,..) bagiye bamubonamo impano.

Mu 1995, ubwo umukinnyi witwa Kevin Garnett yari amaze kwemerwa gukina muri NBA atabanje kurangiza amashuri yisumbuye, Kobe na we yasezeye ibyo kujya mu mashuri afata icyemezo cyo gukina nk’uwabigize umwuga afite imyaka 17 gusa, aba umukinnyi wa gatandatu mu mateka winjiye muri NBA atarangije amashuri yisumbuye.

Yinjiye muri NBA (Drafted) atowe n’ikipe ya Charlotte Hornets imutanga muri Los Angeles Lakers kungurane ya Vlade Divac.

Kobe Bryant yekeje muri LA Lakers nyuma y'uko yari yatoranyijwe ari uwa 13 na Charlotte Hornets muri NBA Draft mu 1996

Mu 1998-1999, Los Angeles yagurishije Nick Van Exel na Eddie Jones bakinaga ku mwanya umwe n’uwa Kobe, guhera icyo gihe abona umwanya uhoraho, mu mukino 50 yari isigaye ngo Shampiyona isozwe, bimuhesha kuba umukinnyi ukiri muto ukinnye muri NBA ndetse akaba mu bakinnyi batanu babanzamo, kugeza igihe bamwe bamugereranyije n’ibirangirire muri uyu mukino byari bikomeye Micheal Jordan na Magic Johnson.

Mu gihe yari muri ikipe ya Lakers, Kobe yayikiniye imyaka 20, ahabwa igihembo cy’umukinnyi mwiza w’umwaka (MVP Award) inshuro imwe, akina imikino y’intoranwa ’All Star Games’ inshuro 18.

Mu mpeshi y’umwaka wa 2008 ndetse n’iya 2012, Kobe yakiniye ikipe ya Leta Zunze Ubumwe za Amerika mu mikino Olempike yabereye i Beijing mu Bushinwa n’i Londres mu Bwongereza, hose ahatwarira Imidali ya Zahabu.

Mu mwaka w’imikino wa 2015-2016, Kobe Bryant yatangaje ko azahagarika gukina Basketball nyuma yo kuzahazwa n’imvune za hato na hato.

Nyuma yo gusezera muri NBA, Kobe yagiye akora ibindi bikorwa bitandukanye byiganjemo ibyo gufasha, aho yafashije imiryango 250 y’abana barembye mu muryango yari yarashinze witwa ’Make A Wish Foundation’, atanga asanga miliyoni 81$ mu mushinga wo kurwana indwara ya Cancer.

Kobe yabaye Ambasaderi wa ’After-School All-Stars’ ndetse afasha abana badafite aho baba mu mu mushinga yari afatanyije n’umufasha we bise ’Bryant& Vanessa Family Foundation’.

Kobe yatangaga asaga miliyoni 1$ mu nzu y’amateka n’umuco w’Abanyafurika b’Abanyamerika.

Tariki 26 Mutarama 2020, ku i saa tatu za mu gitondo muri Amerika, nibwo Kobe n’umukobwa we w’imyaka 14, Gianna, wari ufite inzozi zo kuzasigasira umurage wa se agakina muri WNBA, bafashe kaujugujugu bari kumwe n’abandi bantu batandatu ndetse n’uwari uyitwaye, bereje ku mukino wari kubera aho Kobe yari yarubatse ’Gym’ yo kuzamuriramo impano z’abana yatozaga ’Bryant’s Mamba Academy’ muri Oaks.

Gusa kubera ikirere cyitameze neza, iyo kajugujugu yakoze impanuka igeze ku musozi wa Calabasas, ifatwa n’inkongi irashya bose bapfiramo.

Izindi nkuru wasoma:

Bryant atsinda dunk mu mukino wahuje LA Lakers na Dallas Mavericks mu 2006
Kobe Bryant yerekanwa nka MVP wa NBA mu mwaka w'imikino wa 2007/08
Ikipe ya Amerika y'abagabo. Uhereye ibumoso ni: Michael Redd, Bryant, Dwayne Wade, Lebron James na Deron Williams bishimira umudali wa Zahabu babonye mu mikino Olempike yabereye i Beijing mu Bushinwa mu 2008
Kobe Bryant yavuye ku isi afite imyaka 41

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .