Afrobasket: Ingimbi z’u Rwanda zatahanye umwanya wa gatanu mu Gikombe cya Afurika

Yanditswe na Eric Tony Ukurikiyimfura
Kuya 15 Nyakanga 2019 saa 09:17
Yasuwe :
0 0

Ikipe y’igihugu y’abatarengeje imyaka 16 yatahukanye umwanya wa gatanu mu Gikombe cya Afurika cya Basketball cyaberaga i Praia muri Cap-Vert, nyuma y’uko itsinze Tunisie amanota 78-53 mu mukino wabaye kuri iki Cyumweru.

U Rwanda rwisanze mu mikino yo guhatanira imyanya nyuma y’uko rutsinzwe na Misiri amanota 78-51 mu mukino wa ¼ wabaye ku wa Gatanu.

Ku wa Gatandatu, ingimbi z’u Rwanda zatsinze iza Angola amanota 72-70 bahataniye imyanya hagati y’uwa gatanu n’uwa munani, biba ngombwa ko rwongera guhura na Tunisie yo yatsinze Cap-Vert nyuma yo kubuzwa na Nigeria kurenga ¼.

Uyu mukino wabaye kuri iki Cyumweru, warangiye ingimbi z’u Rwanda zitwaye neza, aho zatsinze iza Tunisie amanota 78-53, zegukana umwanya wa gatanu muri iri rushanwa ryabaga ku nshuro ya gatandatu ndetse ikaba yari iya gatatu ryitabirwa n’u Rwanda.

Ishema Kevin w’u Rwanda ni we witwaye neza muri uyu mukino, atsindamo amanota menshi (25), asama imipira 14 iva mu nkangara ndetse atanga umupira umwe wavuyemo amanota kuri mugenzi we. Wala Eddine Morjane wa Tunisie, we yatsinzemo amanota 14, asama imipira icyenda iva ku nkangara.

Igikombe cyegukanywe na Misiri yagitwaye ku nshuro ya kane nyuma yo gutsinda Mali yari yakiyitwaye umwaka ushize, ku manota 66-57 mu mukino wabereye muri Pavilhão Desportivo Vavá Duarte kuri iki Cyumweru.

Umunya-Misiri Moamen Abouzeid ni we watowe nk’umukinnyi mwiza (MVP) w’irushanwa mu gihe kadi anayoboye abakinnyi batanu beza bariranze, barimo: Youssouf Sangare (Mali), Ibrahima Diallo (Guinée), Farouk Isah (Nigeria) na Abdullah Ahmed (Misiri).

Misiri na Mali zahise zibona itike yo kuzahagararira umugabane wa Afurika mu Gikombe cy’Isi cy’abatarengeje imyaka 17 kizaba mu mwaka utaha.

Nigeria yegukanye umwanya wa gatatu itsinze Guinée amanota 54-53.

Uko ibihugu byasoje iri rushanwa bikurikirana:

  1. Misiri
  2. Mali
  3. Nigeria
  4. Guinée
  5. Rwanda
  6. Tunisie
  7. Angola
  8. Cap-Vert
  9. Côte d’ivoire
  10. Algérie
U Rwnada rwatsinze Angola ku wa Gatandatu mbere y'uko ruhura na Tunisie kuri iki Cyumweru
Ingimbi z'u Rwanda zitozwa na Murenzi Yves zatahanye umwanya wa gatanu
Misiri yegukanye Igikombe cya Afurika cy'abatarengeje imyaka 16 ku nshuro ya kane muri esheshatu kimaze gukinirwa
Umunya-Misiri Moamen Abouzeid ni we watowe nka MVP w’irushanwa
Abdullah Ahmed (Misiri),Youssouf Sangare (Mali), Moamen Abouzeid (Misiri), Farouk Isah (Nigeria) na Ibrahima Diallo (Guinée) ni bo bagize ikipe y'irushanwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza