Ni imikino izakinwa mu matsinda abiri ariyo irya gatatu n’irya kane, u Rwanda rukaba rubarizwa mu rya nyuma hamwe na Grande-Bretagne, Argentine ndetse na Liban.

Ni mu gihe irya gatatu ririmo Hongrie, Sénégal, Brésil na Philippines.

Muri iyi nkuru tugiye kugaruka ku bakinnyi 5 bo kwitega muri iri rushanwa ry’iminsi itandatu.

Murekatete Bella

Murekatete Bella ni umwe mu bakinnyi bahanzwe ijisho muri iri rushanwa by’umwihariko n’Abanyarwanda cyane ko baherukaga kumubona mu 2021 mu mikino yo gushaka itike y’Igikombe cya Afurika.

Uyu ni umwe mu bakinnyi b’Abanyarwanda bakomeye ndetse wagize umwaka mwiza w’imikino.

Mu mikino 36 yakinnye, yatsinze amanota 11 kuri buri mukino, rebounds zirindwi na block imwe.

Si ibyo gusa kuko uyu mwaka yaciye uduhigo twinshi muri ikipe ye, aho yabashije kuba umukinnyi wa mbere mu mateka wakoze rebounds nyinshi (990), block nyinshi (188), wakinnye imikino myinshi (153) ndetse wanabanje mu kibuga inshuro nyinshi (145).

Muri rusange, amaze gutsindira Washington State Cougars Women’s Basketball amanota 1,552, bimushyira ku mwanya wa gatanu mu bamaze gutsindira iyi kipe amanota menshi mu mateka yayo.

Muri uyu mwaka kandi Murekatete yagaragaye mu mukino w’intoranywa za Shampiyona ihuza kaminuza zo muri Leta Zunze Ubumwe za Amerika ‘Women’s College All Star Game’.

Murekatete yagiye no mu igeragezwa mu Ikipe ya Phoenix Mercury ikina muri Shampiyona ya Basketball muri Leta Zunze Ubumwe za Amerika (WNBA) nubwo byarangiye ataritsinze ngo akomezanye nayo.

Murekatete Bella ahanzwe amaso n'Abanyarwanda benshi

Holly Winterburn

Holly Winterburn ni kizigenza w’Ikipe y’Igihugu ya Grande-Bretagne. Ni umu-point guard w’imyaka 24 uheruka kwitwara neza cyane mu Gikombe cy’i Burayi 2023.

Mu gihe iyi kipe idafite Fagbenle na Kristine Anigwe, abafana ba Grande-Bretagne nta kibazo bafite mu gihe Winterburn ahari nk’uko babitangaza.

Holly Winterburn ni umwe mu bakinnyi bakomeye bari muri iri rushanwa

Melisa Gretter

Biragoye kuvuga Ikipe y’Igihugu ya Argentine utavuze Melisa Paola Gretter kubera ibigwi bye muri iyi kipe.

Uyu mukinnyi w’imyaka 31 ukina nk’umu-Point Guard ni umwe mu bafite uburambe cyane ko yatangiye gukinira iyi kipe mu 2011. Yari kumwe nayo kandi mu Gikombe cy’Isi mu 2018.

Umunya-Argentine, Melisa Paola Gretter ni umwe mu bakinnyi bazatanga akazi mu Itsinda D

Afril Bernardino

Umunya-Philippine, Afril Ornedo Bernardino ni irindi zina rihanzwe amaso muri iri rushanwa. Uyu mukinnyi w’imyaka 28 amaze gukina amarushanwa menshi arimo Igikombe cya Aziya mu 2015.

Yafashije Philippine kwegukana Irushanwa rihuza amakipe yo muri Aziya y’amajyepfo n’iburasirazuba mu 2019. Yegukanye kandi umudali wa zahabu mu bakina ari batatu muri iyo mikino. Aheruka kwitabira Igikombe cy’Isi cy’abakina ari batatu mu 2018.

Umunya-Philippine, Afril Ornedo Bernardino ni umwe mu bakinnyi bahanzwe ijisho muri iri rushanwa

Bernadette Hatar

Bernadette Hatar ni umukinnyi ugoye cyane w’Ikipe y’Igihugu ya Hongrie kubera indeshyo ye ya metero 2.8. Uyu mukinnyi ukina nka pivot, imiterere ye niyo ntwaro ye ya mbere.

Bernadette asanzwe akinira Washington Mystics muri Shampiyona ya Basketball muri Leta Zunze Ubumwe za Amerika akaba ari mukinnyi wa gatatu muremure muri iyi shampiyona.

Ntakabuza azagora abo bahanganye, cyane ko iyi ikipe ariyo ya mbere ihabwa amahirwe muri iri rushanwa.

Kuri uru rutonde kandi ntiwarenza ingohe abandi bakinnyi beza nka Jack Animan wa Philippine na Cierra Dillard wa Sénégal.

Umunya-Hongrie, Bernadette Hatar ni umwe mu bakinnyi bagoye cyane kubera indeshyo ye