Mu gitondo cyo kuri uyu wa Gatandatu, tariki ya 3 Gicurasi 2025, ni bwo yatangiye uru rugendo rurimo kubera kuri ‘tapis’ yagenewe gukoreramo siporo iherereye hafi ya Kigali Golf Resort & Villas.

Ni igikorwa ari gukora afatanyije na Radisson Blu Hotel & Convention Centre ndetse na Rwanda Cancer Relief (Umuryango utegamiye kuri leta ufasha abarwaye Kanseri ukanakora ubuvugizi ku bayirwaye mu Rwanda).

Wilson yatangiye uru rugendo rwo muri uyu muhanda wa kilometero 2,4, ari kumwe na bamwe mu bari kumufasha n’abandi bifuje gukorana na we bari bazindukiye muri uyu muhanda.

Umuyobozi Nshingwabikorwa muri Rwanda Cancel Relief, Mizero Alain Fabrice, yavuze ko ari igikorwa gikwiriye ubukangurambaga buhagije kuko gituma benshi b’amikoro make babona ubufasha mu kwivuza Kanseri.

Ati “Ni igikorwa cyiza kuko umusaruro wacyo uragaragara kuko utuma dufasha abarwayi ba Kanseri mu buryo butandukanye cyane cyane abo mu ntara baza kwivuriza i Kigali. Ubushize hakusanyijwe miliyoni 8 Frw, kuri iyi nshuro twizeye ko bizikuba kabiri.”

Abantu bifuza kugendana na we, agenda abaganiriza ku ndwara ya kanseri, uburyo yirindwa, gusobanukirwa ibimenyetso byayo n’ingamba mu kuyirwanya.

Wilson ahamagarira buri wese kumushyigikira muri icyo gikorwa yiyemeje gukora, dore ko atari ubwa mbere abikoze kuko mu 2024 yakoze siporo yo kwiruka akoresheje ‘Treadmill’.

Uyu mwongereza w’imyaka 46, amenyerewe cyane mu kazi ko gufotora inyoni zo mu Rwanda, ndetse mu 2023 yashyize hanze igitabo yise "Falling for the Birds of Kigali", gikubiyemo ubwoko butandukanye bw’inyoni ziboneka mu Mujyi wa Kigali.

Will Wilson yatangiranye siporo n'Umuyobozi Mukuru wa Radisson Blu Hotel na Kigali Convention Centre, Rob Kucera

Urugendo rwa Will Wilson azarufatanya na Radisson Blu Hotel na Kigali Convention Centre

Benshi bari kumwegera akabaganiriza ku ndwara ya kanseri

Mu muhanda hagati hashyizwemo aho abifuza amazi bayafatira

Will Wilson ni we uri kuyobora abari kumufasha mu rugendo

Umuhanda uri gukorerwamo iki gikorwa ureshya na metero 2400

Abari kwitabira iki gikorwa bari gusuzumwa kanseri ku buntu

Hateguwe abashobora gufasha abagirira ikibazo mu rugendo hagati

Kanseri y'Ibere ni imwe mu zikorerwa ubukangurambaga muri uru rugendo

Igikorwa cyitabiriwe n'abanyamahanga batuye mu Rwanda

Will Wilson akora urugendo adakoresha imbaraga nyinshi

Will Wilson azasoza uru rugendo ku Cyumweru, tariki ya 4 Gicurasi

Will Wilson ni Umwongereza wiyemeje kurwanya kanseri mu Rwanda

Amafoto: Kwizera Hervé