00:00:00 IGIHE NETWORK KN KINYARWANDA EN ENGLISH FR FRANCAIS

Uganda: Abafana 20 ba Arsenal batawe muri yombi bishimira Igikombe cya Shampiyona

Yanditswe na Ntare Julius
Kuya 23 Mutarama 2023 saa 04:25
Yasuwe :

Ku mugoroba wo ku Cyumweru, tariki 22 Mutarama 2023, Polisi yo mu Ntara ya Jinja mu Burasirazuba bwa Uganda yataye muri yombi abafana 20 ba Arsenal FC bishimaga bafite icyo bise Igikombe cya Shampiyona y’u Bwongereza nyuma yo gutsinda umukeba w’ibihe byose Manchester United ibitego 3-2.

Nyuma y’uyu mukino, Arsenal FC yakomeje gufata umwanya wa mbere byatumye ishyira ikinyuranyo cy’amanota atanu hagati yayo na Manchester City iyikurikiye.

Marcus Rashford na Lisandro Martinez ni bo babashije kubonera ibitego bibiri Manchester United mu gihe Bukayo Saka na Eddie Nketiah [watsinzemo bibiri] bahaye intsinzi Arsenal FC iyoboye urutonde rwa Shampiyona y’u Bwongereza n’amanota 50.

Nyuma y’uyu mukino, abafana ba Arsenal FC birengagije ko shampiyona igeze ku munsi wa 20 gusa, habura imikino 18 ngo babone amahirwe yo kwegukana igikombe, bahise birara mu mihanda y’Umujyi wa Jinja n’ibikombe by’ibikorano bisa neza n’icya Shampiyona y’u Bwongereza bishimira ko bacyegukanye.

Nubwo Polisi yo muri uyu mujyi itaragira icyo itangaza kuri iri tabwa muri yombi, Kasule Baker wari muri iri tsinda ry’abafana akaba yacitse yabwiye Daily Monitor dukesha iyi nkuru ko hari abafashwe.

Yavuze ko ubwo bari mu muhanda mu byishimo, imodoka ya Polisi yahagaze imbere yabo hagasohokamo abapolisi babasaba guhagarara aho bageze, nyuma bababwira kurira iyo modoka yahise ibajyana ku cyicaro cyayo cya Jinja.

Kasile yakomeje agira ati "Sinzi icyo twakoze, twishimiraga gusa intsinzi twari dukuye ku mukeba Manchester United, ni abafana 20 bajyanye, bose ni aba hano dusanzwe tubana mu mujyi wa Jinja.’’

Shampiyona y’u Bwongereza igeze ku munsi wa 20, Arsenal FC ni yo iyiyoboye n’amanota 50 n’ikirarane cy’umukino umwe.

Mu mikino 19 imaze gukina, Arsenal FC yatsinzemo 16, yanganyije itatu itsindwa umwe na Manchester United, tariki 4 Nzeri 2022. Iyi kipe ikurikiwe na Manchester City n’amanota 45 mu gihe Newcastle United na Manchester United zinganya 39 ku mwanya wa gatatu n’uwa kane.

Abafana 20 ba Arsenal FC bitwaje Igikombe cya Shampiyona y'u Bwongereza batawe muri yombi bari kucyishimira nyuma yo gutsinda Manchester United
Polisi yasanze abafana ba Arsenal FC mu muhanda mu byishimo by'intsinzi y'ikipe yabo iburiza imodoka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .