Mu ijoro ryo kuri uyu wa Kabiri, tariki ya 11 Werurwe 2025, ni bwo haza gukinwa imikino ine ibanza mu yo kwishyura ya ⅛ cy’iri rushanwa ry’amakipe y’ibigugu i Burayi.

Liverpool yo mu Bwongereza kugeza ubu ni yo ifite amahirwe yo kuba yakomeza muri iri rushanwa, kuko iza kwakira Paris Saint-Germain yo mu Bufaransa yatsinzwe umukino ubanza igitego 1-0.

Liverpool igiye gukina uyu mukino imaze imikino ine idatakaza inota na rimwe, nubwo na PSG umukino iheruka gutsindwa ari uwo amakipe yombi yari yahuriyemo.

Ubwo aya makipe yahuriraga mu matsinda y’iri rushanwa mu 2018, nta kipe yigeze itsinda indi kabiri kikurikiranya, ahubwo na bwo Liverpool yatsinze umukino ubanza undi PSG irayigaranzura.

Gusa ntitwakwirengagiza ko PSG itarigera ibonera amanota kuri Anfield, haba muri iyo myaka itandatu ishize cyangwa mu 1970 ubwo zahuriraga mu irushanwa ryitwaga UEFA Cup Winners’ Cup.

Muri rusange kandi, Liverpool yatsinze imikino itanu iheruka kuyihuza n’amakipe yo mu Bufaransa, mu gihe PSG imikino itatu iheruka gukinira mu Bwongereza yayitakaje.

Ikipe irenga uyu mukino ishobora kugera kure kuko izahura n’ikipe izatsinda hagati ya Club Brugge na Aston Villa bifitanye umukino ku wa Gatatu, tariki ya 12 Werurwe.

Muri iri joro hateganyijwe undi mukino aho FC Barcelona iza kwakira S.L. Benfica yo muri Portugal ku kibuga cya Barcelona Olympic Stadium, iri mu mujyi wa Catalonia muri Espagne.

Amakipe yombi agiye kongera guhura, ari amwe mu makipe ari kwitwara neza mu bihugu byayo imbere, gusa mu nshuro 10 amaze gukina, iyi kipe yo muri Espagne yatsinzwe umukino umwe gusa, inganya inshuro enye, izindi eshanu irazitsinda.

Ibi biragaragaza ko ikomereje muri uyu murongo iri mu makipe aza kubona itike ikomeza muri ¼ cya UEFA Champions League, dore ko mu mukino ubanza yatsindiye muri Portugal igitego 1-0. Itsinda izahura n’izava hagati ya Borussia Dortmund na Lille.

Amakipe abiri yo mu Budage na yo arakomeza kwishakamo ikipe izakomeza guhagararira iki gihugu muri iri rushanwa, hagati ya Bayern München na Bayer Leverkusen.

Bayern München isa n’aho akazi katagikomeye nyuma y’uko iza kujya gukinira BayArena yaramaze kwibikaho ibitego 3-0 yatsindiye Bayer Leverkusen kuri Allianz Arena mu cyumweru gishize.

Inter Milan yo mu Butaliyani, iraza kwakira Feyenoord Rotterdam yo mu Buholandi. Ikaba igiye gukinira iwayo ifite impamba y’ibitego bibiri yaboneye mu mukino ubanza.

Rurambikana hagati ya Liverpool na PSG

Bayern Munich yitwaye neza mu mukino ubanza

FC Barcelona ikunze gushobora Benfica

Paris Saint-Germain ifite akazi katoroshye kuri Anfield