Siporo abantu bashobora gukorera mu ngo zabo muri iki gihe cya Coronavirus

Yanditswe na Eric Tony Ukurikiyimfura
Kuya 24 Werurwe 2020 saa 10:44
Yasuwe :
0 0

Kimwe no mu bindi bihugu bitari bike ku Isi, mu Rwanda abantu bose basabwe kuguma mu ngo zabo mu rwego rwo kwirinda ikwirakwira ry’ubwandu bw’icyorezo cya Coronavirus.

Nubwo abenshi bagerageza gushaka ibibarangaza mu masaha yose bamara mu ngo zabo, akenshi usanga bitaborohera kumara umwanya munini baryamye, bareba filimi, Televiziyo cyangwa ibindi bishobora gutuma batagira irungu.

Hari kandi n’abari basanzwe bamenyereye gukora siporo zitandukanye buri munsi kugira ngo umubiri wabo ukomeza kumera neza, ariko kuri ubu bakaba badashobora kubikora nk’uko byari bisanzwe kubera ibi bihe bidasanzwe byashyizweho.

Mu kiganiro yagiranye na IGIHE, Mukasa Nelson usanzwe ari umutoza w’imyitozo ngororamubiri, yavuze ko hari siporo abantu bashobora gukorera mu ngo zikabafasha kwirinda amavunane aterwa no kumara igihe kinini mu buriri ndetse no kubyibuha cyane bitewe n’uko birirwa hamwe.

Muri siporo Mukasa agira abari mu ngo zabo harimo gusimbuka umugozi mu rugo, gukora imyitozo yo kunanura umungongo cyangwa guterura.

Ati "Abo mu rugo bashobora gufashanya, burya siporo ituma umuntu atigunga, ababyeyi n’abana bagakorera hamwe. Umwe mu bagize umuryango ashobora kuba umutoza.”

Mukasa avuga ko nk’abafite ubushobozi bwo kubona amashusho y’imyitozo ngororangingo kuri Internet, “Bashobora kuyashyira kuri Televiziyo bakagendana n’abari kuyikora iminota nka 40, barangiza bagakora imyitozo yo kunanura umugongo indi minota nka 10, bakananura imitsi iminota nk’itanu, ubundi bakoga.”

“Bifasha umubiri wawe gukomeza kumera neza, ukirinda umubyibuho. Udakoze siporo muri ibi bihe ushobora kwiyongera ibiro. Ni ukugerageza gukorera mu rugo kuko ni ngombwa.”

Mu gihe abantu bakurikiza amabwiriza yo kuguma mu rugo, ni ngombwa no kuzirikana ko Siporo ari ubuzima.

Imyitozo ihuza abantu benshi ntiyemewe nyuma y'uko abantu basabwe kuguma mu ngo zabo
Abantu bashobora gukorera imyitozo ngororamubiri mu ngo zabo
Umutoza w'imyitozo ngororamubiri, Mukasa Nelson asanga abantu bashobora gufashanya mu ngo, bagakora siporo barinda ubuzima bwabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .