Turababaye ariko tugomba kubyakira - Bamwe mu bari guserukira u Rwanda mu mikino ya Tokyo 2020

Yanditswe na Eric Tony Ukurikiyimfura
Kuya 25 Werurwe 2020 saa 01:54
Yasuwe :
0 0

Bamwe mu bakinnyi bari kuzahagarira u Rwanda mu mikino Olempike ya Tokyo 2020 yari kuba mu mpeshyi, hagati ya tariki ya 24 Nyakanga n’iya 9 Kanama mu Buyapani, bavuze ko ku ruhande rumwe bababajwe n’isubikwa ryayo.

Ejo hashize, ku wa Kabiri tariki ya 24 Werurwe 2020, nibwo Komite Olempike Mpuzamahanga yatangaje ko imikino ya Tokyo 2020 yasubitswe kugeza mu 2021 kubera icyorezo cya Coronavirus cyibasiye Isi.

Muri iyo mikino yagombaga kubera mu Buyapani, hari Abanyarwanda bari bamaze kubona itike yayo barimo Muhitira Félicien ‘Magare’ na Hakizimana John basiganwa Marathon.

Hari kandi umukinnyi umwe mu gusiganwa ku magare, wari kuva hagati ya Areruya Joseph, Mugisha Samuel na Munyaneza Didier ndetse n’ikipe y’abagore ya Sitting Volleyball yari gukina mu mikino paralempike.

Muhitira Félicien yabwiye IGIHE ko babajwe no gusubikwa kw’iyi mikino bitewe n’aho bari bageze imyiteguro batangiye muri Muatarama uyu mwaka.

Ati “Ni ibintu umuntu wese w’umukinnyi wari kuzajyayo, atakwishimira. Gukorera ibihe fatizo bitujyanayo ni ibintu byari bivunanye cyane. Twatangiye imyitozo muri Mutarama, imyiteguro yari igeze kure, ariko babihagaritse, nta kundi twabigenza. Ntabwo ari ubushake bwabo ni ikibazo cy’iki cyorezo cyakwiriye ku Isi hose.”

Muhitira yakomeje avuga ko nk’abakinnyi nabo bumva neza impamvu y’isubikwa ry’imikino, kuko icy’ingenzi ari ubuzima bwabo muri iki gihe Isi yugarijwe n’icyorezo cya Coronavirus.

Ati “Turababaye ariko nyine tugomba kubyakira. Ndibaza ko gukina ntabwo aribyo bibanza, habanza ubuzima, tugategereza umwaka utaha bavuze ko bizaba, ukazagera umuntu agifite imbaraga, akiri mu bihe byiza.”

“Komite Olempike yatubwiye ko tugomba guhora twiteguye, tutagomba gusubira inyuma, ku rwego twari tugezeho icyo gihe cyikazagera turi ku rwego rurenze, dufite intego nshya kuko tubonye ikindi gihe cyo kwitegura. “

Hakizimana John na we yavuze ko bari bageze kure imyiteguro, ariko bazakomeza kwitoza mu gihe bategereje igihe iyi mikino ya Tokyo izashyirwaho.

Ati” Ntabwo byadushimishije kuko twari tugeze kure imyiteguro gusa na none ibihe turimo buri wese arabibona kuko Coronavirus iri hose ku Isi, ni ngombwa ko tuyirinda. Ni imyiteguro yari yahagaze.”

Murema Jean Baptiste uyobora Ishyirahamwe Nyarwanda ry’imikino y’abafite ubumuga (NPC), yavuze ko icyemezo cyafashwe cyo gusubuka iyi mikino cyari gikwiye.

Ati “Ni icyemezo cyari gikwiriye kuko imikino yasubitswe ku mpamvu zumvikana. Twarimo twitegura [ikipe ya Sitting Vollyeball] ubwo n’umwaka utaha tuzakomeza imyiteguro nitumara kumenyeshwa ko nta kibazo kuko ubu murabizi ko byose byahagaze.”

Mukundiyukuri Jean de Dieu ushinzwe guhuza ibikorwa bya Komite Olempike y’u Rwanda, yabwiye IGIHE ko nubwo imikino ya Tokyo 2020 yashyizwe umwaka utaha, bazakomeza gufasha abakinnyi kwitegura.

Ati “Twari twishatsemo ubushobozi kugira ngo bitegure imikino. Batangiye mu kwa mbere, inkunga twari twabaye yari kugeza muri Nyakanga. Nubwo imikino yasubitswe ntabwo IOC [Komite Olempike Mpuzamahanga] iratubwira ikiza gukurikiraho, ariko twe tuzakomeza gufasha abakinnyi bazagere igihe cy’imikino bahagaze neza.”

Mukundiyukuri yavuze ko kandi bazakomeza gufasha n’ikipe ya Beach Volleyball y’abagore iri gushaka itike yo kuzitabira imikino Olempike ya Tokyo.

Ubwo imikino ya Tokyo 2020 yasubikwaga kubera Coronavirus, abagera kuri 57% ni bo bari bamaze kubona itike yayo mu gihe indi myanya ingana na 43% yari igihatanirwa.

Muhitira Felicien 'Magare' ni umwe mu Banyarwanda babonye itike y'imikino Olempike ya Tokyo mu gusiganwa ku maguru
Hakizimana John (ibumoso) na we afite itike y'imikino Olempike ya Tokyo 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza