Kuri uyu wa Mbere, tariki ya 26 Kanama 2024, ni bwo ku bibuga byo muri Cercle Sportif de Kigali hahuriye abana bamaze igihe bigishwa gukina Tennis muri Tennis Rwanda Children’s Foundation (TRCF).

Mu Ukwakira 2023, ni bwo abatoza bakomeye ku Isi muri Tennis barimo Bruce Lipka bageze mu Rwanda aho bari baje gukarishya ubumenyi bwa bagenzi babo bazajya bafasha abana mu bihe bitandukanye.

Nyuma y’uko batangiye gutanga ubumenyi hateguwe irushwanwa rizahuriza hamwe abo mu bice bitandukanye by’u Rwanda bigishijwe ngo batangire gutotoranywamo abeza bahagararira n’igihugu.

Ibi byashimangiwe n’Umuyobozi Mukuru wa TRCF, Umulisa Joselyne, waganiriye na IGIHE akavuga ko umusaruro watangiye kugaragara kuko abaterankunga bari kuboneka, ariko inzira ikiri ndende.

Ati “Intego y’iri ryushanwa ni ukugeza abana ku rwego rushimishije haba mu gihugu imbere ndetse na mpuzamahanga. Ubu rero twarishyizeho kugira ngo igihe cyose Igihugu cyadukenera ku bakinnyi basohokera u Rwanda, twaba twiteguye.”

“Ibi byose biri kuba ni ukubera Kresten, yakoze akazi gakomeye kuva twatangira bigaragara ko ibyo dukora bifite intego. Nubwo bimeze bityo ariko turacyakeneye benshi kugira ngo tunone abana badusimbura muri Tennis.”

Irushanwa ryahurije hamwe abana b’abahungu ndetse n’abakobwa, bakaba bazahatana kugeza tariki ya 31 Kanama 2024.

Umunya-Afurika y’Epfo Kresten asanzwe ari Umuyobozi Mukuru wa Sosiyete ya Mchezo yiyemeje guteza imbere no kuzamura impano z’aba-sportifs batandukanye muri Afurika ndetse no mu mikino myinshi.

Abana 150 bazavamo intoranywa zizajya zihagararira u Rwanda

Irushanwa riri kubera ku bibuga bya Cercle Sportif De Kigali

TRCF irajwe ishinga no kongera umubare w'abakobwa bakina Tennis

Abana bazitwara neza bazakomeza gukurikiranwa

Abana bamaze umwaka wose biga Tennis

Umulisa Joselyne agaragaza ko umukino wa Tennis ugikeneye abashoramari nka Kresten Buch