Abakinnyi 10 b’Abanyarwanda barimo abahungu umunani n’abakobwa babiri, ni bo bitabiriye iki cyumweru cya kabiri kiri gukinirwa ku bibuga bya Tennis muri IPRC Kigali, intego ari ugushaka umusaruro mwiza uruta uwo babonye mu cyumweru cya mbere aho bose basezerewe batarenze ijonjora rya mbere.

Gusa, kuri ubu bose bamaze gusezererwa aho nta mukobwa watsinze umukino wa mbere mu gihe abahungu batatu bakomeje, ariko na bo basezererwa muri 1/8 ku wa Gatatu.

Ishimwe Claude yatsinzwe n’Umunya-Canada Jay Lin Gibson watwaye icyumweru cya mbere amaseti 2-0 (6-1, 6-3), Igiraneza Elysé atsindwa n’Umuhinde Shaurya Swarup 6-0, 6-3, Umuhoza King Onyx atsindwa n’Umunya-Nigeria Mubarak Ayodeji 6-3, 6-2 mu gihe Ishimwe Bimenyimana Melissa yatsinzwe n’Umuhindekazi Sreemenya Reddy Anugonda 6-0, 6-0.

Gibson n’Umunya-Tunisia Nadine Hamrouni begukanye icyumweru cya mbere mu bakina ari umwe, mu bahungu n’abakobwa, bombi babashije gukomeza muri ¼ gitangira gukinwa kuri uyu wa Kane.

Mu gihe Gibson yatsindaga Ishimwe, Hamrouni yabanje gutsindwa iseti ya mbere ariko yigaranzura Umuhindekazi Reddy Nukala amutsinda 2-1 (3-6, 6-2, 6-2) muri 1/8 cy’abakobwa bakina ari umwe.

Kuri uyu wa Kane, Gibson arahura na Swarup mu gihe Hamrouni yisobanura n’Umuyapanikazi Riko Shozui.

Icyumweru cya kabiri cy’iri rushanwa cyatangiye ku wa Mbere, tariki ya 19 Kanama, kizasozwa ku wa Gatandatu, tariki ya 24 Kanama 2024.

Aya marushanwa y’abato ategurwa na ITF kugira ngo abafashe gushaka amanota yo kujya ku rutonde rw’abakinnyi ba Tennis babigize umwuga.

Uwegukanye “ITF World Tennis Tour Juniors/ Grade 4” atsindira amanota 60, uwatsindiwe ku mukino wa nyuma akabona 36, ugeze muri ½ akabona 18. Muri ¼ ni amanota 10 naho muri 1/8 ni atanu.

Mu bakina ari babiri, abatwaye irushanwa babona amanota 45 mu gihe abandi babona 27, 14 n’arindwi kuva ku mukino wa nyuma kugeza muri ¼.

Abanyarwanda bongeye gusezererwa batarenze ijonjora rya kabiri muri Irushanwa ry'Abatarengeje imyaka 18 riri kubera i Kigali

Umunya-Canada Jay Lin Gibson watwaye icyumweru cya mbere mu bahungu, yageze muri 1/4 mu bakina ari umwe

Umunya-Tunisia Nadine Hamrouni wegukanye irushanwa mu bakobwa, na we yageze muri 1/4