Rayon Sports yatangiye shampiyona inganya na Rutsiro FC

Yanditswe na Eric Tony Ukurikiyimfura
Kuya 4 Ukuboza 2020 saa 06:13
Yasuwe :
0 0

Rayon Sports yanganyije na Rutsiro FC yazamutse mu Cyiciro cya Mbere uyu mwaka, igitego 1-1 mu mukino w’umunsi wa mbere wa Shampiyona ya 2020/21 wabereye kuri Stade Umuganda i Rubavu kuri uyu wa Gatanu.

Rayon Sports yakinnye uyu mukino idafite abarimo Sugira Ernest urwaye malaria na Niyigena Clément wavunitse.

Ku ruhande rwa Rutsiro FC, ni ikipe irimo abakinnyi bashya batarayimaramo iminsi ibiri barimo Nova Bayama wari kapiteni nyuma yo gusinya ku wa Kane mu gihe umutoza wayo, Bisengimana Justin, yayihawe mu ntangiriro z’iki cyumweru.

Rutsiro FC yafunguye amazamu ku gitego cyatsinzwe na Munyurangabo Cédric ku munota wa 10, ku mupira ukomeye yatereye inyuma y’urubuga rw’amahina nyuma yo guherezwa na Nova Bayama agacenga abarimo Niyibizi Emmanuel.

Mu minota 45 ibanza, nta buryo bukomeye bugana mu izamu Rayon Sports yaremye, ahubwo yabonye imipira y’imiterekano yatewe na Iranzi Jean Claude, ariko ntiyayerekeza neza mu izamu ryari ririnzwe na Dukuzeyezu Pascal.

Nishimwe Blaise yagerageje gutungura umunyezamu Dukuzeyezu ubwo amakipe yombi yari avuye kuruhuka, ishoti rikomeye yateye rica ku ruhande rw’izamu.

Dukuzeyezu yarokoye Rutsiro FC ku mupira w’umuterekano watewe na Iranzi ku munota wa 52, awushyira muri koruneri mbere y’uko Drissa Dagnogo ananirwa kuroba uyu munyezamu ubwo bari basigaye barebana ku munota wa 60. Uyu munya-Côte d’Ivoire yahise asimbuzwa Mugisha Gilbert mu gihe Iranzi yahaye umwanya Mudacumura Jackson.

Byasabye gutereza umunota wa 74, Rayon Sports yishyurirwa na Niyibizi Emmanuel ku mupira w’umuterekano yateye ahana ikosa Hatangimana Eric yakoreye kuri Jean Vital Ourega.

Ourega yananiwe gutsindira Rayon Sports mu buryo bwa nyuma bwabonetse mu mukino, umupira wahinduwe na Mugisha Gilbert awukozeho ujya ku ruhande rw’izamu.

Ni ku nshuro ya kabiri yikurikiranya Rayon Sports inaniwe gutsinda umukino ubanza wa Shampiyona yahuyemo n’ikipe izamutse uwo mwaka, aho mu mwaka w’imikino wa 2019/20, yatangiye inganya na Gasogi United ubusa ku busa.

Abakinnyi babanje mu kibuga ku mpande zombi:

Rutsiro FC: Dukuzeyezu Pascal, Nova Bayama, Uwizeyimana Ortega , Hatangimana Eric, Hitimana Jean Claude, Mutsinzi Claude, Mugiraneza Jean Claude, Nkubito Amza, Munyurangabo Cédric na Nshimyumuremyi Olivier.

Rayon Sports: Kwizera Olivier, Rugwiro Hervé, Niyibizi Emmanuel, Habimana Hussein, Ndizeye Samuel, Ourega Vital, Nishimwe Blaise, Oumar Sidibé, Drissa Dagnogo, Iranzi Jean Claude, na Niyonkuru Sadjati .

Uko amakipe yatsindanye ku munsi wa mbere wa Shampiyona

  • AS Muhanga 1-1 Etincelles FC
  • Mukura VS&L 1-3 SC Kiyovu
  • Sunrise FC 1-3 Gasogi United
  • Espoir FC 0-0 Bugesera FC
  • Marines FC 2-0 Gorilla FC
  • Rutsiro FC 1-1 Rayon Sports FC
  • APR FC vs Musanze FC (Wasubitswe)
  • AS Kigali vs Police FC (Wasubitswe)
Rayon Sports yanganyije na Rutsiro FC ku munsi wa mbere wa Shampiyona

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .