Uyu mukino wari utegerejwe na benshi ku Isi, wabaye mu ijoro rya tariki ya 21 Ukuboza 2024, i Riyadh muri Arabie Saoudite.

Wari uwa kabiri wahuje impande zombi, nyuma y’uwo bahuriyemo muri Gicurasi 2024, na bwo Usyk akaba yaratsinze Fury mu duce (round) icyenda.

Kuri iyi nshuro, Umwongereza Tyson Fury yatsinzwe na Usyk amanota 116-112 ku giteranyo cy’amanota yose y’abagize akanama nkemurampaka bari kuri uyu mukino.

Usyk yahise atura intsinzi umubyeyi we ndetse n’abaturage ba Ukraine.

Ati “Ndashaka gutura iyi ntsinzi mama wanjye, Nadiia Petrivna, wampangayikiye igihe cyose ndetse n’abandi babyeyi bose b’Abanya-Ukraine.”

Umukandara yahawe ni uwakozwe n’Abanyarwanda bo muri sosiyete ya ‘63 creatives’ izwiho ibikorwa byinshi by’ubugeni.

Iyi sosiyete yakoze iki gihembo ku bufatanye n’Umuryango Carlos Takam Foundation uri gushinga imizi mu Rwanda, washinzwe na Carlos Takam wabaye umukinnyi w’Iteramakofe ukomeye ku Isi.

Iki gihembo kandi cyakozwe mu rwego rwo kwizihiza imyaka 50 ishize habaye umurwano w’amateka wahuje kizigenza Muhammad Ali ufatwa nk’uw’ibihe byose muri uyu mukino na George Foreman.

Umuzenguruko w’iki gihembo ukozwe mu mabara y’igisamagwe. Impande zombi ziriho umutwe wacyo nk’ikimenyetso cy’imbaraga n’ubuhangage bihujwe n’umuco w’Abanyafurika.

Usyk yahawe umukandara wakozwe n'Abanyarwanda

Usyk amaze kuba indwanyi y'akataraboneka

Usyk yatsinze Fury ku nshuro ya kabiri yikurikiranya

Wari umurwano ukomeye wahuje abakinnyi b'ibihangange

Usyk yatsinze Fury amanota 116-112

Usyk yaherukaga gutsinda Fury muri Gicurasi 2024

Umukandara watanzwe ugaragaza ubudahangarwa mu mukino w'iteramakofe