Muri Mutarama 2024, ni bwo Perezida Kagame yavuze ko kuba atakitabira imikino y’umupira w’amaguru byatewe n’abawurimo bimitse ruswa n’amarozi, bityo akaba atakwifatanya na bo mu bintu bisuzuguritse nk’ibyo.

Icyo gihe yavuze ko yabwiye uwari Minisitiri wa Siporo, Munyangaju Aurore Mimosa ko “ibyo bintu bidakwiye kwihanganirwa kuko uko ibintu bikorwa birazwi. Aho ibintu bigenda neza, gufasha hari uburyo bwa leta bubijyamo. Kuko njye nkunda siporo ni cyo cyatumaga njyayo ariko ntabwo nakwishimira ibintu nk’ibyo bidashira.”

Kuva icyo gihe hakozwe impinduka mu mupira w’amaguru mu Rwanda zigaragara ndetse hafatwa n’imyanzuro ikomeye yatumye hatangira kuboneka umusaruro ushimwa n’abakunzi ba Ruhago.

Kuri uyu wa Kabiri, tariki ya 10 Nzeri 2024, ni bwo Perezida Kagame yifatanyije n’abandi gukurikira umukino Amavubi yifuzaga gutsinda cyane ko yahanganaga na Nigeria biri kumwe mu Itsinda ryo gushaka itike yo kujya mu Gikombe cya Afurika kizabera muri Maroc.

Perezida Kagame yahageze igice cya kabiri cy’umukino gitangiye cyane ko akanyamuneza kari kose muri Stade Amahoro kuko Ikipe y’u Rwanda yari yihagazeho ikagitangira ari 0-0 ari na ko umukino waje kurangira.

Ikipe y’Igihugu ‘Amavubi’ yanganyije na Super Eagles yahise igira amanota abiri, ikurikiye Nigeria ifite amanota ane mu mikino ibiri.

Umukino Perezida Kagame yaherukaga kureba ni uwahuje Amavubi na Repubulika Iharanira Demokarasi ya Congo muri CHAN 2016, yabereye mu Rwanda.

Uyu kandi wari umukino wa mbere Ikipe y’Igihugu ‘Amavubi’ ikiniye kuri iki kibuga ariko akaba atari wo wa mbere wahabereye. Undi wahabereye akawitabira ni uwahuje APR FC na Police FC, mu gufungura Stade Amahoro bwa mbere.

Perezida Kagame yarebye igice cya kabiri cy'umukino w'Amavubi

Ubwo Perezida Kagame yari akurikiye umukino w'Amavubi na Nigeria

Perezida Kagame aganira na Minisitiri wa Siporo, Nyirishema Richard, ubwo barebaga umukino

Perezida Kagame yongeye gukurikira umukino w'Amavubi nyuma y'imyaka umunani

Perezida wa FERWAFA, Munyantwali Alphonse na we yari kuri uyu mukino

Perezida Kagame n'abayobozi bari hamwe na we bashyigikiye Amavubi

Ange Kagame n'umugabo we Bertrand Ndengeyingoma (hagati) bitabiriye uyu mukino

Myugariro Manzi Thierry atera umupira imbere

Nshuti Innocent ahanganiye umupira na Bassey Calvin Chinedu

Nshuti Innocent akurikiye umupira hagati y'ubwugarizi bwa Nigeria bwarimo William Troost-Ekong na Bassy Calvin

Amavubi yagerageje gusatira nubwo nta buryo bwinshi yabonye bugana mu izamu

Kwizera Jojea agerageza gucenga Onyemaechi Bruno wa Nigeria

Amavubi yanganyije na Nigeria ubusa ku busa mu gushaka itike ya CAN

Bassey Calvin usanzwe ukinira Fulham muri Premier League, atwara umupira Kwizera Jojea

Samuel Gueulette yikoreye amaboko nyuma y'umupira yateye ukajya ku ruhande

Amavubi yongeye gukinira muri Stade Amahoro umukino w'amarushanwa nyuma y'imyaka umunani

Abafana b'Ikipe y'Igihugu bari bafite icyizere

Abakinnyi b'Amavubi bashyigikiwe n'abafana kuva umukino utangiye kugeza urangiye

Kapiteni wa Nigeria, William Troost-Ekong afite umupira ubwo yari asatiriwe na Mugisha Bonheur

Muhire Kevin agerageza kwambura umupira Wilfred Ndidi Onyinye wa Nigeria

Kapiteni w'Amavubi, Bizimana Djihad afite umupira hagati y'abakinnyi babiri ba Nigeria

Umunyezamu Ntwari Fiacre w'Amavubi yigaragaje cyane muri uyu mukino

Stade Amahoro yarimo abafana benshi nubwo itari yuzuye neza

Abafana bari bitabiriye uyu mukino muri Stade Amahoro

Amavubi yagabanye amanota na Super Eagles ya Nigeria mu mukino w'Umunsi wa Kabiri wo mu Itsinda D ryo gushaka itike ya CAN 2025

Ikirere cy'i Remera ahari Stade Amahoro iruhande rwa BK Arena ubwo umukino wari urangiye