NBA bigaragambije imikino irasubikwa, Chelsea yaguze myugariro, se wa Messi mu biganiro na Man City….Agezweho mu mikino hanze y’u Rwanda

Yanditswe na Eric Tony Ukurikiyimfura
Kuya 27 Kanama 2020 saa 10:20
Yasuwe :
0 0

Imikino itatu ya Play-offs yagombaga gukinwa ku wa Gatatu muri Shampiyona ya Basketball ya NBA, yasubitswe nyuma y’uko amakipe yanze gukina kubera umwirabura, Jacob Blake, uheruka kuraswa n’umupolisi.

Ku wa Gatatu, Milwaukee Bucks yanze kujya mu kibuga ubwo yari gukina na Orlando Magic. Impamvu ni umwirabura Jocob Blake warashwe inshuro zirindwi na polisi ku Cyumweru mu gace ka Kenosha, i Wisconsin hafi ya Milwaukee.

Iyi kipe yatangaje ko yubashye icyemezo cy’abakinnyi ndetse ibashyigikiye nubwo bakabaye babyemeranyijweho mbere.

Umukino wa Houston Rockets na Oklahoma Cty Thunder n’uwa Los Angeles Lakers na Portland Trail Blazers nayo yasubitswe, hakazemezwa ikindi gihe izakinirwa.

Muri Baseball, imikino ibiri ya MLB yasubitswe nyuma y’uko amakipe ahisemo kudakina mu gihe n’imikino itanu muri Shampiyona ya MLS na yo yasubitswe.

Naomi Osaka ukina Tennis, yavuze ko ataza gukina umukino yari afite kuri uyu wa Kane ndetse atazakina imikino ya ½ mu irushanwa ribera muri New York kuko na we ari umwiraburakazi.

Uwahoze ari Perezida wa Leta Zunze Ubumwe za Amerika, Barack Obama, usanzwe ari umukunzi wa Basketball, yagaragaje ko ashyigikiye ibyakozwe n’amakipe.

Imikino ya NBA n'indi yo muri Leta Zunze Ubumwe za Amerika yasubitswe kubera umwirabura, Jacob Blake, uheruka kuraswa n’umupolisi

===================================================

Chelsea yasinyishije Ben Chilwell

Chelsea yo mu Cyiciro cya Mbere mu Bwongereza, yasinyishije myugariro Ben Chilwell wakiniraga Leicester City, imutanzeho miliyoni 45£ ku masezerano y’imyaka itanu.

Uyu myugariro w’imyaka 23, yakuriye mu ishuri ry’umupira w’amaguru rya Leicester, atangira gukinira ikipe ya mbere mu 2015 mu gihe yari afite amasezerano azarangirana na 2024.

Chilwell yabaye umukinnyi wa gatatu mushya Chelsea iguze nyuma yo kugura Hakim Ziyech w’imyaka 27, wavuye muri Ajax na Timo Werner w’imyaka 24 wavuye muri RB Leipzig.

Byitezwe ko kuri uyu wa Kane, myugariro Thiago Silva wakiniraga Paris Saint-Germain, akorera isuzuma ry’ubuzima mu Butaliyani mbere yo kugurwa na Chelsea.

Myugariro Ben Chilwell yasinye imyaka itanu muri Chelsea

===================================================

Lyon yasezereye PSG igera ku mukino wa nyuma wa Champions League

Mu mikino y’abagore, ikipe ya Lyon yageze ku mukino wa nyuma wa UEFA Champions League nyuma yo gutsinda Paris Saint-Germain igitego 1-0 mu mukino wa ½ wabereye i Bilbao.

Umufaransakazi Wendie Renard yaciye agahigo ko kuba agiye gukina uyu mukino wa nyuma inshuro icyenda ndetse ni we watsinze igitego rukumbi cyabonetse ku mupira w’umuterekano.

Amakipe yombi yasoje umukino ari abakinnyi 10 mu kibuga nyuma y’uko Grace Geyoro wa PSG yahawe ikarita itukura naho Nikita Parris wa Lyon agahabwa amakarita abiri y’umuhondo.

Ku mukino wa nyuma uzaba ku Cyumweru i San Sebastian, Lyon izahura na Wolfsburg yo mu Budage, yo yatsinze FC Barcelone igitego 1-0 ku wa Kabiri.

Lyon ifite igikombe cya Champions League giheruka, yongeye kugera ku mukino wa nyuma itsinze PSG

===================================================

Dean Henderson yongereye amasezerano y’igihe kirekire muri Manchester United

Nyuma yo kuva mu ntizanyo muri Sheffield United, umunyezamu w’imyaka 23, Dean Henderson yasinye imyaka itandatu muri Manchester United.

Henderson yemerewe umushahara w’ibihumbi 120£ ku Cyumweru ndetse ni we munyezamu wa gatatu uhembwa amafaranga menshi muri Premier League nyuma ya David De Gea na Ederson Morães wa Manchester City.

Uyu munyezamu ukiri muto uheruka guhamagarwa mu ikipe y’Igihugu y’u Bwongereza, yifuzwaga n’amakipe menshi ashaka kumutira, ariko azaguma i Manchester kugira ngo ahanganire umwanya na David De Gea ushinjwa kuba yarasubiye inyuma.

Umunyezamu Dean Henderson yongereye amasezerano y'imyaka itandatu muri Manchester United

===================================================

Se wa Lionel Messi ari mu biganiro na Manchester City

Nyuma y’uko umuhungu we asabye kuva muri FC Barcelone, se wa Lionel Messi yagiye mu Bwongereza kuganira na Manchester City itozwa na Pap Guardiola.

Ikinyamakuru The Sun cyatangaje ko Jorge Messi w’imyaka 53, yageze mu Mujyi wa Manchester kumvikana n’iyi kipe ku buryo kuyijyamo bishobora gutwara hafi miliyoni 500£ kugira ngo ibone Lionel Messi mu gihe cy’imyaka itatu.

Sport yo muri Espagne, yatangaje ko Lionel Messi azitabira imyitozo ya FC Barcelone ku wa Mbere kugira ngo yirinde ko iyi kipe yamurega imushinja kwanga akazi.

Messi asigaranye umwaka umwe ku masezerano y’imyaka ine, azarangira mu mpeshyi ya 2021.

Jorge Messi yagiye kuganira ns Manchester City kugira ngo umuhungu we azayerekezemo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .