Messi yasubiye mu myitozo, Mbappé yanduye Coronavirus na NBA irakomeza…amakuru y’imikino agezweho hanze

Yanditswe na Eric Tony Ukurikiyimfura
Kuya 8 Nzeri 2020 saa 11:37
Yasuwe :
0 0

Mu gihe abandi bakinnyi ba FC Barcelone bagiye kumara iminsi 10 basubukuye imyitozo, Lionel Messi yaraye yitabiriye imyitozo bwa mbere nyuma yo kwemera ko azakomezanya n’iyi kipe.

Ku wa 26 Kanama nibwo uyu mukinnyi yari yatangaje ko ashaka kuva muri FC Barcelone, ariko ku wa 4 Nzeri, avuga ko yahisemo gusoza amasezerano ye azarangira mu mpeshyi ya 2020/21.

Lionel Messi w’imyaka 33, yasubiye mu myitozo ku wa Mbere kugira ngo afatanye n’abandi kwitegura Shampiyona ya 2020/21 izatangira mu mpera z’icyumweru.

FC Barcelone izakina umukino wayo wa mbere mu cyumweru cya gatatu, ihura na Villarreal tariki ya 27 Nzeri, kuko imikino ibiri ibanza yasubitswe kugira ngo iiyi kipe ibanze iruhuke, ni nyuma y’uko igeze muri ¼ cya UEFA Champions League yasojwe mu kwezi gushize.

Muri iyi myitozo ya mbere, Messi yahasanze umutoza mushya Ronald Koeman ndetse na Philippe Coutinho wavuye mu ntizanyo muri Bayern Munich.

Lionel Messi yasubiye mu myitozo ya FC Barcelone

=====================================================

Kylian Mbappé yanduye Coronavirus

Rutahizamu w’ikipe ya Paris Saint-Germain, Kylian Mbappé yanduye Coronavirus ndetse ntabwo ari mu bakinnyi b’u Bufaransa bakina na Croatie kuri uyu wa Kabiri.

Mbappé yabaye umukinnyi wa karindwi wa PSG, wanduye Coronavirus nyuma y’uko mu cyumweru gishize handuye abandi batandatu barimo Neymar, Angel Di Maria na Marquinhos.

Uyu mukinnyi w’imyaka 21, yakuwe muri bagenzi nubwo yaherukaga gufasha u Bufaransa gutsinda Suède igitego 1-0 ku wa Gatandatu.

Kuri ubu haribazwa niba umukino Paris Saint-Germain izahuramo na Racing Lens ku wa Kane uzaba, bitewe n’uko iyi kipe ikomeje kugarizwa na Coronavirus.

Shampiyona y’u Bufansa, Ligue 1, yatangiye mu kwezi gushize, ariko umukino wagombaga kuyifungura, ugahuza Marseille na Saint-Etienne, wasubitswe kubera ko hari abakinnyi bane ba Marseille bari barwaye Covid-19.

Shampiyona y’Icyiciro cya Mbere mu Bufaransa, yabwiye amakipe ayigize ko mu gihe hari izajya igira abakinnyi barenze batatu banduye, umukino uzajya usubikwa.

Kylian Mbappé ukinira PSG, yanduye Coronavirus ari mu ikipe y'igihugu y'u Bufaransa

.====================================================

Tour de France 2020: Abakinnyi bafite ubwoba bwo kwanduzwa Coronavirus

Abasiganwa ku magare bari muri Tour de France bafite impungenge ko bashobora kwandura icyorezo cya Coronavirus bitewe n’uko hari abafana baza kureba isiganwa batambaye udupfukamunwa ndetse bakegera ku muhanda ku buryo baba bashaka gukora ku bakinnyi.

Tour de France yatangiye ku wa 29 Kanama, kuri ubu hamaze kuba uduce icyenda.

Nyuma y’uko ku wa Mbere hari ikiruhuko, abakinnyi basubiye mu muhanda kuri uyu wa Kabiri bakora intera y’ibilometero 168.5 mu gace ka 10 kavuye ku Kirwa cya Oléron, kerekeza ku Kirwa cya Ré.

Umunya-Slovenie Primož Roglič ukinira Jumbo-Visma ni we wambaye umwenda w’umuhondo nyuma yo gukoresha amasaha 38, iminota 40 n’isegonda rimwe, arusha Egan Bernal wa Ineos Grenadiers amasegonda 21.

Abakina Tour de France bafite ubwoba ko bashobora kwanduzwa Coronavirus n'abafana batambara udupfukamunwa

=====================================================

NBA: Boston Celtics yatsinze Torotonto Raptors, LA Clippers yigaranzura Denver Nuggets

Mu mikino ½ cya Play-offs za Shampiyona ya Basketball muri Leta Zunze Ubumwe za Amerika (NBA), Boston Celtics yatsinze Toronto Raptors ifite igikombe giheruka, amanota 111-89.

Boston Celtics yahise iyobora n’imikino 3-2, ndetse ishobora gukomeza muri aka gace k’Uburasirazuba mu gihe yatsinda umukino wa gatandatu muri irindwi ishoboka, uzakinwa ku wa Gatatu.

Undi mukino wabaye mu ijoro ryakeye, Paul George yafashije Los Angeles Clippers gutsinda Denver Nuggets amanota 78-67, iyobora n’imikino 2-1 mu Burengerazuba.

Boston Celtics ishobora gusezerera Toronto Raptors ifite igikombe giheruka

====================================================
Abakinnyi babiri b’u Bwongereza birukanywe mu mwiherero kubera kujyana abakobwa muri hoteli

Abakinnyi babiri bakiri bato mu ikipe y’igihugu y’u Bwongereza; Mason Greenwood na Phil Foden, bombi birukanywe mu mwiherero kubera ko bajyanye abakobwa muri hoteli.

Ku wa Mbere nibwo Greenwood w’imyaka 18 na Foden w’imyaka 20, basubijwe mu Bwongereza nyuma y’uko batumiye abakobwa muri hoteli, aho ikipe y’igihugu yari icumbitse muri Iceland.

Ikipe y’u Bwongereza yavuye muri Iceland ijya gukina na Denmark itari kumwe n’aba bakinnyi bombi bashobora gufatirwa ibihano byo kumara imikino ine badahamagarwa.

Polisi yo muri Iceland, yaciye aba bakinnyi bombi amande angana na 1360£ (asaga miliyoni 1.7 Frw) kubera ko barenze ku mabwiriza yo kwirinda ikwirakwira ry’icyorezo cya Coronavirus bagatumira abakobwa muri hoteli yo mu Mujyi wa Reykjavik ku Cyumweru.

Mason Greenwood (ibumoso) na Phil Foden (iburyo) birukanywe mu mwiherero w'ikipe y'igihugu kubera kujyana abakobwa muri hoteli

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .