Messi yanze kwitabira imyitozo, Zlatan yongereye amasezerano, amatariki ya El Clásico … amakuru agezweho y’imikino

Yanditswe na Eric Tony Ukurikiyimfura
Kuya 1 Nzeri 2020 saa 12:41
Yasuwe :
0 0

Lionel Messi akomeje kwereka FC Barcelone ko atagikeneye kuyikinira, nyuma y’uko yanze kwitabira imyitozo yatangiye ku wa Mbere.

Messi w’imyaka 33, ntabwo acyibona muri FC Barcelone ndetse ntateganya ko azayikinamo mu mwaka utaha w’imikino, nubwo agifite amasezerano y’umwaka umwe uzarangira mu mpeshyi ya 2021.

Nyuma yo gusaba ko bamureka akagenda ku buntu ndetse akaba yaranze kwitabira imyitozo yatangiye ku wa Mbere, Messi ategereje kureba ibizava mu biganiro bizahuza abamuhagarariye barimo se n’ubuyobozi bwa FC Barcelone, ku wa Gatatu.

La Liga iherutse gusohora itangazo rigaragaza ko ishyigikiye FC Barcelone, ivuga ko "kugira ngo Messi agende ari uko hishyurwa miliyoni 700€ ziri mu ngingo y’amasezerano ye."

Mu myaka isaga 16 amaze muri FC Barcelone, Messi yayihesheje ibikombe 10 bya shampiyona na bine bya Champions League.

Aramutse avuye muri FC Barcelone akerekeza muri Manchester City ihabwa amahirwe menshi yo kumugura, yahasanga abandi Banya-Argentine barimo Sergio Agüero na Nicolas Otamendi.

Ku rundi ruhande, Perezida wa Argentine; Alberto Fernandez, yasabye Messi gusubira mu gihugu cye cy’amavuko akaba ariho akina mu ikipe ya Newell’s Old Boys yakuriyemo, mbere yo kujya i Burayi.

Messi yavuye muri Argentine ubwo yari afite imyaka 14.

Umutoza mushya wa FC Barcelone, Ronald Koeman, yakoresheje imyitozo ya mbere ku wa Mbere
Lionel Messi yanze kwitabira imyitozo itegura umwaka utaha w'imikino

===================================================

Zlatan Ibrahimović yongereye amasezerano muri AC Milan

Rutahizamu w’Umunya-Suède, Zlatan Ibrahimović, yongereye amasezerano y’umwaka umwe muri AC Milan yo mu Butaliyani.

Zlatan w’imyaka 38, yatsinze ibitego 11 mu marushanwa yakinnye nyuma yo kugaruka i Milan muri Mutarama uyu mwaka.

Uyu mugabo wasinye bwa mbere muri iyi kipe mu 2010, agatwarana nayo igikombe cya Shampiyona, yatangiranye n’abandi imyitozo ku wa Mbere.

Yakiniye andi makipe arimo Juventus na Inter de Milan zo mu Butaliyani, Paris Saint-Germain yo mu Bufaransa, Manchester United yo mu Bwongereza na LA Galaxy yo muri Leta Zunze Ubumwe za Amerika.

Zlatan Ibrahimovic yongereye amasezerano y'umwaka umwe muri AC Milan

===================================================

Ingengabihe ya Shampiyona ya Espagne yagiye ahagaragara

Ku wa Mbere hashyizwe ahagaragara uburyo ingengabihe y’umwaka w’imikino wa 2020/21 izaba iteye, muri Shampiyona y’Icyiciro cya Mbere muri Espagne.

La Liga izatangira tariki ya 13 Nzeri, haba imikino irimo uzahuza Valence CF na Levante.

Umukino wa mbere wa El Clásico uhuza FC Barcelone na Real Madrid uzabera i Camp Nou tariki ya 25 Ukwakira, mu gihe uwo kwishyura uzabera i Santiago Bernabéu tariki ya 11 Mata 2021.

Real Madrid izakina na Atlético Madrid tariki ya 13 Ukuboza, mu gihe undi mukino uzahuza amakipe y’i Madrid uzabera kuri Wanda Metropolitano tariki ya 7 Werurwe.

Shampiyona ya Espagne izasozwa tariki ya 23 Gicurasi 2021, ubwo Real Madrid yatwaye shampiyona iheruka izaba yakiriye Villarreal, mu gihe FC Barcelone izasura Eibar.

Real Madrid yatwaye La Liga ya 2019/20

======================================================

David Silva na Adama Traoré banduye Coronavirus

David Silva uheruka gutandukana na Manchester City akerekeza muri Real Sociedad, yanduye Coronavirus.

Uyu Munya-Espagne w’imyaka 34, yasubiye iwabo nyuma y’imyaka 10 akina mu Bwongereza, aho yakinnye imikino 436, akegukana ibikombe 14.

Undi wanduye Coronavirus ni Adama Traoré ukinira Wolves yo mu Bwongereza, wari utegerejwe mu ikipe y’igihugu ya Espagne.

Adama Traoré yabaye umukinnyi wa kabiri wa Espagne wanduye Coronavirus, nyuma ya Mikel Oyarzabadal, bityo bombi ntibazajya mu ikipe y’igihugu.

Espagne ifite imikino ibiri muri uku kwezi, aho izahura n’u Budage na Ukraine muri UEFA Nations League.

David Silva uherutse kwerekeza muri Real Sociedad, yanduye Coronavirus
Adama Traore ntakitabiriye ubutumire bw'ikipe y'Igihugu ya Espagne kubera Coronavirus

======================================================

Arsenal yarekuye Henrikh Mkhitaryan yerekeza muri AS Roma

Umunya-Arménie Henrikh Mkhitaryan yamaze gusinya amasezerano y’igihe kirekire muri AS Roma yo mu Butaliyani, nyuma yo gusesa ayo yari afitanye na Arsenal yari yamutije.

Henrikh Mkhitaryan yari amaze umwaka umwe akina muri AS Roma ku ntizanyo, aho yatsinze ibitego icyenda mu mikino 27.

Uyu mugabo w’imyaka 31 yageze muri Arsenal muri Mutarama 2018 avuye muri Manchester United, aho yaguranywe Alexis Sánchez.

Muri Arsenal yatsinze ibitego icyenda mu mikino 58, ayifasha kugera ku mukino wa nyuma wa Europa League ya 2019.

Henrikh Mkhitaryan yasinye amasezerano y'igihe kirekire muri AS Roma

======================================================

Donny van de Beek yakoze isuzuma ry’ubuzima muri Manchester United

Umuholandi Donny van de Beek yakoze isuzuma ry’ubuzima muri Manchester United, mbere yo gutangwaho miliyoni 40£.

Donny van de Beek uri mu ikipe y’igihugu y’u Buholandi, yakoreye isuzuma iwabo, umunsi umwe nyuma yo kumvikana kwa Ajax na Manchester United.

Uyu mukinnyi w’imyaka 23 yafashije Ajax kugera muri ½ cya UEFA Champions League mu mwaka w’imikino wa 2018/19, mu gihe mu myaka itatu y’imikino ishize, yatsinzemo ibitego 40.

Donny van de Beek yakoze isuzuma ry'ubuzima mbere yo kugurwa na Manchester United

======================================================

NBA Play-offs: Oklahoma City na Rockets zizakina umukino wa karindwi

Mu mukino wa gatandatu wahuje amakipe yombi, Oklahoma City Thunder yatsinze Houston Rockets amanota 104-100, bituma hazakinwa umukino wa karindwi wo kwisobanura.

Mu mukino wa mbere wa ½ mu gace k’Iburasirazuba, Miami Heat yatsinze Milwaukee Bucks amanota 115-104.

Oklahoma City Thunder na Houston Rockets zizakina umukino wa karindwi muri play-offs za NBA

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .