Messi akomeje kwinangira, Arsenal yasinyishije Umunya-Brésil, Tour de France na NBA zirakomeje…amakuru y’imikino agezweho hanze

Yanditswe na Eric Tony Ukurikiyimfura
Kuya 2 Nzeri 2020 saa 12:22
Yasuwe :
0 0

Ku wa Kabiri, Arsenal yasinyishije myugariro w’Umunya-Brésil, Gabriel Magalhães, wakinaga muri Lille yo mu Bufaransa kuri miliyoni 23.14£.

Uyu mukinnyi w’imyaka 22 ukinisha ukuguru kw’imoso, yakinnye imikino 34 mu marushanwa yose yakiniye Lille mu mwaka ushize w’imikino, ikaba iya kane muri Ligue 1.

Umuyobozi ushinzwe tekinike muri Arsenal, Edu Gaspar, yatangaje ko Gabriel ari umukinnyi ufite ubuhanga bwo ku rwego rwo hejuru wifuzwaga n’amakipe menshi.

Ati "Ni umukinnyi mwiza umutoza Mikel [Arteta] n’abandi bakorana bazafasha kwibona mu ikipe.”

Muri Arsenal, Gabriel Magalhães ahasanze abandi Banya-Brésil barimo David Luiz, Gabriel Martinelli na Willian Borges da Silva.

Gabriel Magalhães ni umukinnyi mushya wa Arsenal

===================================================

Tour de France 2020: Primož Roglic yegukanye agace ka kane

Umunya-Slovakie Primož Roglic ukinira Jumbo-Visma yegukanye agace ka kane ka Tour de France 2020 nyuma yo gukoresha amasaha ane, iminota irindwi n’amasegonda 47 ku ntera y’ibilometero 160.5.

Abakinnyi bahagurukiye i Sisteron berekeza muri Orclères-Meriette ku wa Kabiri.
Tadej Pogacar wa UAE Team Emirates yabaye uwa kabiri akoresheje ibihe bimwe n’uwa mbere mu gihe Guillaume Martin wa Cofidis na Nairo Quintana wa Arkea-Samsic bakurikiyeho.

Umufaransa Julian Alaphilippe ukinira Deceuninck-Quick-Step, yakomeje kwambara umwambaro w’umuhondo nyuma yo kuba uwa gatanu, aho amaze gukoresha amasaha 18, iminota irindwi n’amasegonda ane, arusha amasegonda ane Umwongereza Adam Yates wa Mitchelton-Scott.

Kuri uyu wa Gatatu hateganyijwe agace ka gatanu gahagurukira i Gap kerekeza i Privas ku ntera y’ibilometero 183.

Primož Roglic yegukanye agace ka kane ka Tour de France 2020

===================================================

Ivan Rakitić wakiniraga FC Barcelone, yasubiye muri FC Seville

Umunya-Croatie; Ivan Rakitić wakiniraga FC Barcelone mu kibuga hagati, yasubiye muri FC Seville ku masezerano y’imyaka ine.

Rakitić w’imyaka 32, yakiniye FC Seville hagati ya Mutarama 2011 na Kamena 2014 mbere yo kwerekeza muri FC Barcelone, aho yatwaye ibikombe 13 birimo bine bya Shampiyona na Champions League.

FC Barcelone yatangaje ko Seville izishyura miliyoni 10.5€ mu byiciro.

Ivan Rakitić wakiniraga FC Barcelone, yasubiye muri FC Seville

===================================================

Messi ashobora gufatirwa ibihano na FC Barcelone

Nyuma yo gusiba imyitozo ku wa Mbere no ku wa Kabiri ndetse ntiyitabire isuzuma ry’ubuzima no gufatwa ibipimo bya Coronavirus ku Cyumweru, Lionel Messi ashobora gukatwa 25% by’umushahara w’ukwezi.

Ikinyamakuru Marca cyo muri Espagne, cyatangaje ko Messi atigeze abwira ubuyobozi bwa FC Barcelone impamvu yasibye imyitozo.

Messi winjiza hafi miliyoni 95£ ku mwaka, ntabwo acyibona nk’umukozi wa FC Barcelone, ariko gusiba akazi bishobora kumuviramo gukatwa 25% bya miliyoni 1.1£ ahembwa ku mwaka.

Itangazamakuru ryo muri Espagne rivuga ko kuri uyu wa Gatatu hateganyijwe inama ihuza umuyobozi wa FC Barcelone, Josep Maria Bartomeu na se w’uyu mukinnyi, Jorge Messi.

Se wa Messi, Jorge Messi, afitanye inama n'ubuyobozi bwa FC Barcelone kuri uyu wa Gatatu

===================================================

NBA Play-offs: Denver Nuggets izahura na LA Clippers

Denver Nuggets yatsindiye gukomeza muri ½ cy’imikino ya Play-offs mu gace k’Uburengerazuba nyuma yo gutsinda Utah Jazz amanota 80-78 mu mukino wa karindwi.

Nuggets yabaye ikipe ya 12 ishoboye gukomeza nyuma yo gutsindwa imikino 3-1, ariko ikabasha kwigaranzura iyo bihanganye.

Nyuma yo gukomeza ku mikino 4-3, Denver Nuggets izahura na LA Clippers muri ½, aho umukino wa mbere uzaba ku wa Gatanu.

Undi mukino wabaye, ni uwa kabiri hagati ya Boston Celtics na Toronto Raptors muri ½ cya Play-offs zo mu Burasirazuba.

Boston Celtics yatsinze Toronto Raptors ifite igikombe giheruka ku manota 102-99, iyobora n’imikino 2-0 mu gihe uwa gatatu uzakinwa ku wa Kane.

Denver Nuggets izahura na LA Clippers nyuma yo gusezerera Utah Jazz

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .