00:00:00 IGIHE NETWORK KN KINYARWANDA EN ENGLISH FR FRANCAIS

Menya ikipe ihenze kurusha izindi ku Isi

Yanditswe na Zigiranyirazo Bajecteur
Kuya 4 August 2022 saa 07:58
Yasuwe :

Ikipe yitwa Dallas Cowboys ikina Umupira w’Amaguru w’Abanyamerika umenyerewe ku izina rya Football Américain muri shampiyona yabo yitwa ’National Footbal League’, ni yo ifite agaciro kanini kurusha andi makipe yose ku Isi mu mikino itandukanye.

Iyi kipe yinjiye muri National Football League mu 1960. Mu 2015 yaciye agahigo ko kuba ikipe ya mbere ku Isi yagize agaciro ka miliyari enye z’amadolari ya Amerika nk’uko byatangajwe na Forbes ndetse kuri ubu ikomeje kuba ku isonga mu zihenze kurusha izindi ku isi aho agaciro kayo kageze kuri miliyari 7,64 z’amadolari ya Amerika.

Binyuze ku rubuga rwa Sportico.com, impuguke mu by’ubukungu by’umwihariko mu rwego rwa siporo, zagaragaje ko iyi kipe iri imbere y’iya New York Yankees ikina umukino wa Baseball aho yo iri ku mwanya wa kabiri ku isi mu kugira agaciro kanini kangana na miliyari 7,01 z’amadolari.

Ku mwanya wa gatatu kuri uru rutonde rw’amakipe akize kurusha andi ku isi, harebwe mu mikino yose, hazaho ikipe y’umukino w’intoki wa Basketball ya New York Knicks, ikaba ibarirwa agaciro ka miliyari 6,12 z’amadolari nk’uko imibare yo mu Ukuboza umwaka ushize ibigaragaza.

Aya makipe yose nubwo zigaragaza igitinyiro mu buryo bw’amikoro, nta n’imwe iheruka gutwara igikombe kuko nka Dallas Cowboys igikombe cya nyuma iheruka yagitwaye mu1996 mu gihe New York Yankees yo iheruka icyo mu 2009 naho New York Knikcs yo ikaba iheruka kugitwara mu 1973.

Los Angeles Rams na New England Patriots na zo zikina muri NFL ni zo ziza ku mwanya wa kane n’uwa gatanu na miliyari 5,91$ ndetse na miliyari 5,88$ uko akurikirana.
Ikipe y’ibigwi mu mupira w’Amaguru ya Real Madrid yo muri Espagne, ni yo ikina uwo mukino iza hafi kuri uru rutonde aho iri ku mwanya wa gatandatu n’agaciro ka miliyari 3,2$ nk’uko byashyizwe ahagaragara na Football Benchmark mu mwaka ushize.

Uru rutonde runagaragaraho amakipe akina indi mikino harimo nka Toronto Maple Leafs ikina Hockey muri Canada aho ibarirwa agaciro ka miliyari 2$.

Muri rusange amakipe agera kuri 32 akina umukino umenyerewe nka Football Américain, buri imwe muri izo ibarirwa impuzandengo y’agaciro ka miliyari 4,13$ dore ko nibura 16 muri ayo makipe yose, buri imwe ifite agaciro kari hejuru ya miliyari enye z’amadolari ya Amerika.

Dallas Cowboys ikina Umupira w’Amaguru w’Abanyamerika ni yo ifite agaciro kanini kurusha andi makipe yose ku Isi
Iyi kipe yinjiye muri National Football League mu 1960

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .