Igikombe cya Community Shield gikinirwa n’ikipe yatwaye Shampiyona n’iyatwaye FA Cup mu mwaka w’imikino uba wabanjirije uwo mukino.

Manchester City yatwaye Shampiyona, yihariye umukino ndetse mu minota itanu ya mbere ikagerageza kugera imbere y’izamu ngo irebe ko yabona igitego hakiri kare ariko ntibyayikundira.

Mu minota 20 y’umukino Man United yayigaranzuye itangira kuyirusha gukina ndetse no gusoza igice cya mbere bigaragara ko yakoze itandukaniro nubwo nta gitego cyari cyakabonetse.

Amakipe yombi yagiye mu karuhuko ndetse nyuma y’igice cya mbere ariko mu cya kabiri, akomeza kunganya kugeza ku munota wa 82 ubwo Alejandro Garnacho yatsindiraga Man United igitego cya mbere.

Nta kanya kashize iki gitego cyishyurwa na Bernardo Silva ku munota wa 89, bituma amakipe yombi ahita ajya muri penaliti.

Jonny Evans na Jadon Sancho ba Manchester United bazihushije mu gihe Bernardo Silva ari we wenyine utayishyize mu izamu ku ruhande rwa Manchester City bituma ihita inatwara igikombe kuri penaliti 7-6.

Izi ni intangiriro nziza ku mwaka w’imikino wa 2024/25 kuri Manchester City kuko yegukanye iki gikombe ku nshuro ya gatandatu harimo (1937, 1968, 1972, 2012, 2018 na 2019).

Ibi bisobanuye ko ari inshuro ya gatatu umutoza Pep Guardiola yegukanye iki gikombe, kandi kikaba icya 18 mu marushanwa yose amaze gutozamo Manchester City mu myaka umunani ayimazemo.

Rico Lewis yakinanye imbaraga mu bwugarizi bwa Man City

Amad Diallo ari mu bakinnyi Manchester United yifashishije

Kobbie Mainoo agerageza gushaka uko ahereza umupira bagenzi be

Abakinnyi 11 Manchester United yabanje mu kibuga

Man United yananiwe kwihagararaho mu minota 10 ya nyuma y'umukino

Pep Guardiola yegukanye igikombe cya 18 muri Manchester City

Diogo Dalot agerageza kwambura umupira Jérémy Doku

Erling Haaland na Pep Guardiola bishimira kwegukana igikombe

Ederson Moraes yakuyemo penaliti ya Jadon Sancho

Man City yitwaye neza itangira neza umwaka w'imikino

Manchester City yegukanye igikombe cya Community Shield icyambuye Manchester United