Lions de Fer yihimuye kuri Thousand Hills yegukana Shampiyona y’u Rwanda ya Rugby (Amafoto)

Yanditswe na Eric Tony Ukurikiyimfura
Kuya 8 Nzeri 2019 saa 12:45
Yasuwe :
0 0

Lions de Fer yaraye yegukanye Igikombe cya Shampiyona y’u Rwanda mu mukino wa Rugby, nyuma yo gutsinda Thousand Hills amanota 30-22 ku mukino wa nyuma wabaye kuri uyu wa Gatandatu kuri Stade Amahoro.

Thousand Hills yageze ku mukino wa nyuma isezereye Muhanga Thunders muri ½ mu gihe Lions de Fer yakuyemo Resilience y’i Rusizi.

Lions de Fer yungukiye ku gutinda kwinjira mu mukino kwa Thousand Hills maze iyitsinda amanota menshi mu gice cya mbere cyarangiye ari amanota 14-6 mu gihe umukino warangiye ari 30-22.

Kapiteni wa Lions de Fer, Kanyamahanga Donat yavuze ko bakoze cyane umwaka wose, ndetse basanga kwegukana iki gikombe ari umusaruro mwiza bitanze.

Ati ”Twarabikoreye umwaka wose. Twari tugikwiye, nta wundi wagombaga kukijyana. Wari umukino ukomeye, twese twari dushoboye na bo bari babizi ko biza kuba ari uguhangana.”

Ubwo amakipe yombi yaherukaga guhurira mu mikino isanzwe ya Shampiyona yo mu gace ka Kigali, Thousand Hills yatsinze Lions de Fer ndetse inayobora aka gace [Ligue].

Kapiteni wa Thousand Hills, Mucungura Dusenge Diego yavuze ko mu byatumye ikipe ye itsindwa harimo kuba batinze kwinjira mu mukino, bakarushwa amanota menshi mu gice cya mbere.

Ati ”Abakinnyi banjye batinze kwinjira mu mukino, uko dukinnye mu gice cya nyuma iyaba ari ko twatangiye ndakeka twari kubona intsinzi. Ni ugutsindwa kudukomereye kuko twari twarapanze ko tugomba kwitwara neza muri uyu mwaka shampiyona ikaba iyacu.”

Perezida w’Ishyirahamwe ry’umukino wa Rugby mu Rwanda, Kamanda Tharcisse yavuze ko bishimiye ko uyu mwaka w’imikino wagenze neza.

Ati ”Nashimira amakipe yitabiriye kugeza kuri uyu mukino wa nyuma, twarebye umukino mwiza kandi turishimira ko shampiyona isojwe neza. Ni umwaka waranzwe n’imikino itandukanye harimo n’iyi shampiyona mubonye, ariko hari n’imikino itegurwa ku rwego rw’abakobwa ndetse n’amashuri.”

Shampiyona ya Rugby mu Rwanda ikinwa mu bice bibiri; icya Kigali kirimo Kigali Sharks yatwaye Shampiyona y’umwaka ushize, Thousand Hills na Lions de Fer ndetse n’iy’Amajyepfo igizwe na Resilience y’i Rusizi, Muhanga Thunders, Kamonyi Pumas na UR Grizzlies.

Iyi Shampiyona y’abakina ari 15, yatangiye mu mpera za Gashyantare uyu mwaka.

Indi nkuru wasoma: Ibyo wamenya ku mukino wa Rugby wuje amacenga n’ubwenge, VAR, ndetse ugakinwa n’abafite ibigango

Lions de Fer yambaye icyatsi n'umweru yahuye na Thousand Hills yambaye umweru n'umukara ku mukino wa nyuma usoza shampiyona ya Rugby mu Rwanda
Byari ibyishimo kur Lions de Fer ubwo umukino wari urangiye
Kapiteni wa Lions de Fer, Kanyamahanga Donat
Thousand Hills ntabwo yumvaga uburyo itsinzwe
Abasifuzi b'umukino bashimiwe
Umunyamabanga Mukuru w'Ishyirahamwe ry'Umukino wa Rugby mu Rwanda Uwitonze Felix ashyikiriza igihembo cy'umukinnyi mwiza, Iradukunda Ombeni wa Lions de Fer
Kapiteni wa Thousand Hills ashyikirizwa igikombe cy'umwanya wa kabiri na Visi Perezida w'Ishyirahamwe ry'Umukino wa Rugby mu Rwanda, Gakirage Philippe
Umuyobozi w'Ishyirahamwe rya Rugby mu Rwanda Kamanda THarcisse ashyikiriza Lions de Fer igikombe cya shampiyona

Amafoto: Usanase Anitha


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza