La Liga yinjiye mu ntambara ya Messi na Barça, Lyon yatwaye Champions League, Tour de France…amakuru y’imikino agezweho hanze

Yanditswe na Eric Tony Ukurikiyimfura
Kuya 31 Kanama 2020 saa 10:23
Yasuwe :
0 0

Shampiyona y’Icyiciro cya Mbere muri Espagne (La Liga) yinjiye mu kibazo cya Lionel Messi na FC Barcelone, ivuga ko uyu mukinnyi azagenda mu gihe haba hishyuwe miliyoni 700€ ziri mu masezerano.

Hagiye gushira icyumweru Lionel Messi asabye kuva muri FC Barcelone ku buntu nubwo agifite amasezerano y’umwaka umwe, azarangira mu mpeshyi ya 2021.

Ku Cyumweru, Messi yanze kwitabira umunsi wa mbere wo gutegura umwaka utaha w’imikino muri FC Barcelone, aho n’abakinnyi bapimwe icyorezo cya Coronavirus.

Uyu usanzwe ari kapiteni wa FC Barcelone, ikipe ye ivuga ko yari yemerewe kugenda ku buntu mu gihe yari kuba yabisabye mbere ya tariki ya 10 Kamena mu gihe Messi we yumva icyo gihe cyakongerwa kikagera muri Kanama kuko n’umwaka w’imikino wageze muri uku kwezi.

Ku Cyumweru, La Liga yashyize hanze itangazo rivuga ko “Kugira ngo Lionel Messi ave muri FC Barcelone ni uko hishyurwa miliyoni 700€ ziri mu ngingo yasinywe mu masezerano.”

Mu gihe Messi umaze imyaka 12 yakwemererwa kuyivamo, ikipe ihabwa amahirwe menshi yo kumwegukana ni Manchester City yo mu Bwongereza.

La Liga yagiye ku ruhande rwa FC Barcelone, ivuga ko Messi atagomba kugendera ubuntu ahubwo ibiri mu masezerano bizubahirizwa

Simba SC yegukanye Ngao ya Jamiii

Simba SC yo muri Tanzania, ikinamo Umunyarwanda Meddie Kagere, yegukanye igikombe cya Community Shield (Ngao ya Jamii), itsinze Namungo FC itozwa na Thierry Hitimana ibitego 2-0.

Muri uyu mukino wabereye kuri Stade Sheikh Amri Abeid i Arusha, Simba SC yafunguye amazamu ku gitego cyatsinzwe na John Bocco ku munota wa karindwi mu gihe Bernard Morrison waguzwe muri Yanga SC, yatsinze icya kabiri mu gice cya kabiri ku munota wa 60.

Ni igikombe cya gatandatu cya Ngao ya Jamii, Simba SC yegukanye kuva mu 2001 mu gihe Yanga SC yacyegukanye inshuro eshanu.

Rutahizamu w’Umunyarwanda, Meddie Kagere yagiye mu kibuga ku munota wa 74, asimbuye John Bocco.

Simba SC yegukanye igikombe cya Community Shield muri Tanzania

Umufaransa Julian Alaphilippe yegukanye agace ka kabiri ka Tour de France

Umufaransa Julian Alaphilippe ni we wegukanye agace ka kabiri ka Tour de France yatangiye ku wa Gatandatu, ahita yambara umwenda w’umuhondo.

Alaphilippe w’imyaka 28, yegukanye agace ke ka gatanu muri iri siganwa nyuma yo gukoresha amasaha ane, iminota 55 n’amasegonda 27 ku ntera y’ibilometero 186.

Alexander Kristoff wari watwaye agace ka mbere ku wa Gatandatu, yasizwe iminota 28.

Agace ka gatatu karakinwa kuri uyu wa Mbere, aho abakinnyi bahagurukira i Nice berekeza i Sisteron ku ntera y’ibilometero 198.

Abakinnyi batanu ba mbere mu gace ka kabiri ka Tour de France

  1. Julian Alaphilippe (Fra/Deceuninck-Quick-Step) 4h 55’ 27’’
  2. Marc Hirschi (Swi/Team Sunweb) ibihe bimwe
  3. Adam Yates (GB/Mitchelton-Scott) +1sec
  4. Greg Van Avermaet (Bel/CCC Team) +2secs
  5. Sergio Higuita (Col/EF Pro Cycling ) ibihe bimwe

Abakinnyi batanu ba mbere ku rutonde rusange nyuma y’uduce tubiri tubanza

  1. Julian Alaphilippe (Fra/Deceuninck-Quick-Step) 8h 41’ 35’’
  2. Adam Yates (GB/Mitchelton-Scott) +4secs
  3. Marc Hirschi (Swi/Team Sunweb) +7secs
  4. Sergio Higuita (Col/EF Pro Cycling) +17secs
  5. Tadej Pogacar (Slo/UAE Team Emirates) ibihe bimwe
Umufaransa Julian Alaphilippe ni we wambaye umwambaro w'umuhondo muri Tour de France nyuma yo kwegukana agace ka kabiri kakiniwe i Nice

Lewis Hamilton yatsinze Grand Prix yo mu Bubiligi

Umupilote wa Mercedes Benz, Lewis Hamilton, yatsinze isiganwa ryabereye mu Bubiligi muri Formula 1, ageza intsinzi eshanu mu masiganwa arindwi yakinwe uyu mwaka.

Hamilton yaje imbere ya mugenzi we bakinana, Valtteri Bottas mu gihe Max Verstappen wa Red Bull, yabaye uwa gatatu.

Iyi ntsinzi yatumye Hamilton agira amanota 157 ku mwanya wa mbere ndetse akomeje kwanikira Verstappen umukurikiye, aho amurusha amanota 47 mu gihe Bottas afite 107.

Uyu Mwongereza wujuje intsinzi 89, arabura ibikombe bibiri gusa ngo agere ku gahigo ka Michael Schumacher watwaye Shampiyona zirindwi za F1.

F1 izagaruka mu mpera z’icyumweru haba isiganwa rizabera i Monza mu Butaliyani.

Lewis Hamilton yishimiye intsinzi mu Bubiligi akora ikimenyetso cya Wakanda mu rwego rwo guha icyubahiro umukinnyi wa filime Chadwick Boseman witabye Imana

Manchester United ishobora kugura Donny van de Beek

Manchester United ishobora gusinyisha umukinnyi wo hagati wa Ajax yo mu Buholandi, Donny van de Beek, agatangwaho miliyoni 40£ zemeranyijwe n’amakipe yombi.

Donny van de Beek w’imyaka 23, ni umwe mu bakinnyi beza bakiri bato, wifujwe n’umutoza Ole Gunnar Solskjaer.

Itangazamakuru ry’i Burayi rivuga ko muri iki cyumweru aribwo hazakorwa isuzuma ry’ubuzima ndetse uyu mukinnyi agasinya imyaka itanu.

Donny van de Beek wari mu ikipe ya Ajax yageze muri ½ cya UEFA Champions League mu 2019, azaba abaye umukinnyi wa mbere Manchester United iguze muri iyi mpeshyi, mbere yo gutangira Shampiyona ya 2020/21, ikina na Crystal Palace yariki ya 19 Nzeri.

Van de Beek ntabwo yajyanye na bagenzi be bagiye gukina imikino ibiri ya gicuti Ajax izakinira mu Budage hamwe na Eintracht Frankfurt na Union Berlin.

Manchester United ishobora kugura Donny van de Beek

US Open: Umukinnyi yasezerewe nyuma yo kwandura Coronavirus

Umukinnyi utatangajwe amazina, yasezerewe mu irushanwa rya Tennis rya US Open ritangira kuri uyu wa Mbere i New York, nyuma y’uko agaragaweho icyorezo cya Coronavirus.

Uyu mukinnyi (bivugwa ko yaba ari Umufaransa Benoît Paire) nta bimenyetso agaragaza, ariko agomba kwishyira mu kato mu gihe cy’iminsi 10.

Ishyirahamwe rya Tennis muri Leta Zunze Ubumwe za Amerika ryatangaje ko “Umukinnyi warwaye Covid-19 yakuwe mu irushanwa.”

Abo yahuye nabo bari gushakishwa ku buryo nabo bashyirwa mu kato mu gihe cy’iminsi 14.

Bivugwa ko Umufaransa Benoît Paire ari we wasezerewe muri US Open kubera Coronavirus

Tottenham yasinyishije Matt Doherty wakiniraga Wolves

Ku Cyumweru, Tottenham yasinyishije myugariro Matt Doherty wakiniraga Wolves ku mafaranga atatangajwe.

Matt Doherty w’imyaka 28, ukomoka muri Ireland, yasinye imyaka ine muri Tottenham.

Uyu mukinnyi yakinnye imikino 300 muri Wolves nyuma yo kuyigeramo mu 2010 avuye muri Bohemians mu 2010.

Matt Doherty yabaye umukinnyi wa gatatu uguzwe na Tottenham muri iyi mpeshyi nyuma ya Pierre-Emile Hojbjerg ukina mu kibuga hagati n’umunyezamu Joe Hart.

Tottenham yasinyishije Matt Doherty wakiniraga Wolves

Lyon yegukanye UEFA Champions League y’abagore

Ikipe ya Lyon y’abagore, yegukanye igikombe cya karindwi cya UEFA Champions League nyuma yo gutsinda Wolfsburg ibitego 3-1 ku mukino wa nyuma wabereye mu Mujyi wa San Sebastian muri Espagne ku Cyumweru.

Umufaransakazi Eugenie le Sommer yafunguye amazamu ku ruhande rwa Lyon mu gihe Umuyapanikazi Saki Kumagi yatsinze icya kabiri mbere y’uko igice cya mbere kirangira.

Mu gice cya kabiri, Alexandra Popp yishyuriye Wolfsburg igitego kimwe ariko Sara Bjork Gunnarsdottir atsinda icya gatatu cya Lyon mu minota ya nyuma.

Ni ku nshuro ya kane amakipe yombi yari ahuriye ku mukino wa nyuma wa UEFA Champions League y’Abagore kuva mu 2013, ariko iyi kipe yo mu Bufaransa yatwaye ibikombe bitatu muri bine byakiniwe.

Lyon yatangiye gukina Champions League mu 2010, ikina umukino wa nyuma inshuro icyenda, aho yatwaye ibikombe birindwi.

Lyon yegukanye UEFA Champions League y'Abagore ku nshuro ya karindwi mu myaka 10

NBA Play-offs: Denver Nuggets na Utah Jazz zizishakamo ikina na LA Clippers

Mu mukino wa gatandatu wabaye mu rukerera, Denver Nuggets yatsinze Utah Jazz amanota 119-107, bituma amakipe yombi anganya imikino 3-3.

Amakipe yombi azakina umukino wa karindwi ku wa Kabiri kugira ngo yishakemo izahura na LA Clippers yo yatsinze Dallas Mavericks amanota 111-97 mu mukino wabanje, ikayisezerera ku mikino 4-2.

Denver Nuggets na Utah Jazz zizishakamo ikipe izahura na LA Clippers mu kindi cyiciro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .