Aya mahugurwa y’iminsi ibiri yatanzwe na Kady Kanoute Tounkara wabaye umukinnyi ukomeye wa Basketball muri Mali, akaba n’impuguke yoherejwe na Kompite Mpuzamahanga Olempike (IOC).

Yitabiriwe kandi n’abakinnyi 40 bo mu mashyirahamwe y’imikino atandukanye nka Basketball, Volleyball, Karate, Koga, Gusiganwa ku maguru, Amagare no Kurwanisha inkota.

Muri aya mahugurwa, abakinnyi beretswe imbaraga bifitemo zabafasha gutegura ubuzima bwa nyuma y’ikibuga, aho kugira ngo bazabwisangemo nk’aho bubatunguye batarabuteguye.

Umuyobozi wa Komite Olempike y’u Rwanda, Umulinga Alice yavuze ko bateguye aya mahugurwa mu rwego rwo gufasha abakinnyi kumenya imbaraga n’ubumenyi bifitemo buzafasha gukomeza ubuzima na nyuma yo gukina.

Ati “Bahuguwe ku bumenyi bwabafasha guhatana ku isoko ry’umurimo, ubwo bafite n’ubukeneye kongerwa ndetse n’imbaraga bifitemo kugira ngo tugire abakinnyi bazi ibitandukanye n’ibyo bakina.”

Perezida wa Komisiyo y’Abakinnyi muri Komite Olempike y’u Rwanda, Mugabe Aristide yatangaje ko aya mahugurwa yari agamije gukangura abakinnyi bagatangira gutekereza uko bazabaho ejo hazaza.

Ati “Ni amahugurwa yari agamije gukangura abakinnyi no gutangira gutekereza uko bazabaho mu gihe bazaba basoje gukina ndetse n’ibyo babona bakora nko kuba umutoza, umucuruzi n’ibindi. Mbese ntibahugire mu gukina gusa.”

Kenshi mu Rwanda humvikana inkuru z’abakinnyi banageze ku rwego rukomeye ariko nyuma yo gusoza gukina nk’ababigize umwuga, ubuzima bukabahindukana bubi cyane.

Mugabe avuga ko ibi biterwa no kwisanga ubuzima bwahindutse bityo rimwe na rimwe bikagorwa no kwakira izo mpinduka.

Ati “Iyo bibaye utariteguye rimwe na rimwe ugorwa n’izo mpinduka ubuzima bukanga bamwe bakagira agahinda gakabije bakaba bajya no mu ngeso mbi nk’ibiyobyabwenge kandi nyamara hari abagufatiragaho icyitegererezo.”

Aba bakinnyi bahawe impamyabushobozi igaragaza ko bahawe aya mahugurwa ndetse basabwa kwigisha na bagenzi babo bakinana. Biteganyijwe ko azakomeza gutegurwa kugira ngo azagere kuri benshi.

Umuyobozi wa Komite Olempike y’u Rwanda, Umulinga Alice yavuze ko bateguye aya mahugurwa mu rwego rwo gufasha abakinnyi kumenya imbaraga n’ubumenyi bifitemo

Impuguke yoherejwe na Kompite Mpuzamahanga Olempike (IOC), Kady Kanoute Tounkara ni umwe mu bayoboye aya mahugurwa

Kayumba Soter uconga ruhago ni umwe mu bitabiriye

Habagaho n'isuzumabumenyi

Kapiteni wa APR WBBC, Munezero Valentine ni umwe mu bitabiriye aya mahugurwa

Mugisha Moïse ukina umukino wo gusiganwa ku magare ni umwe mu bitabiriye

Perezida wa Komisiyo y'Abakinnyi muri Komite Olempike y'u Rwanda, Mugabe Aristide yatangaje ko aya mahugurwa yahwituye abakinnyi ku gutangira gutegura ubuzima bwa nyuma yo gukina

Ni amahigurwa yari agizwe n'ibiganiro bitandukanye mu minsi ibiri yamaze

Abakinnyi 40 bo mu mikino itandukanye nibo bitabiriye aya mahugurwa