Nk’uko bimaze kuba akamenyero, buri nshuro ebyiri mu kwezi habaho siporo rusange mu Mujyi wa Kigali, igahuriza hamwe abawutuye mu turere dutatu tuwugize bagakorera hamwe siporo.

Mu gitondo cyo kuri iki Cyumweru, tariki ya 23 Werurwe 2025, ni bwo habaye siporo iya nyuma ya Werurwe, yitabirwa n’abatuye Kigali ndetse na bamwe mu bayobozi mu nzego za leta.

Kuri iki Cyumweru abitabiriye iyi siporo bahuriye mu mihanda isanzwe ikoreshwa ndetse initabirwa n’ingeri zose kuva ku bato kugera ku bakuru.

Umuyobozi w’Umujyi wa Kigali, Dusengiyumva Samuel, yari kumwe na Minisitiri wa Siporo, Nelly Mukazayire ndetse na Minisitiri w’Abakozi ba Leta n’Umurimo, Ambasaderi Christine Nkulikiyinka, bari barangaje imbere abakoze iyi siporo.

Si aba gusa kuko n’umuhanzikazi Bwiza ari mu batanze ubutumwa muri iki gikorwa bushishikariza buri wese gukora siporo.

Nyuma yo kuzenguruka mu mihanda yabugenewe, abari muri iyi siporo bahuriye ahabugenewe harimo no hafi y’inyubako ya Kigali Heights bafatanya kunanura imitsi no gukina indi mikino ibafasha kugorora umubili.

Imikino isangwa muri ‘Car Free Day’ irimo nka Road Tennis, Fencing, guterura ibiremereye, kubyina imbyino za gakondo, kunyonga amagare n’ibindi.

Muri Car Free Day habera imikino itandukanye ifasha benshi gukora siporo

Abagera hafi ya Kigali Convention Centre bafatanya kunanura imitsi

Umuyobozi w'Umujyi wa Kigali, Dusengiyumva Samuel na Minisitiri Amb. Christine Nkulikiyinka, bari barangaje imbere abakoze iyi siporo

Abapolisi ntibasiba muri siporo rusange

Ab'i Nyarugenge ntibakanzwe n'akavura kaguye mu bice bimwe na bimwe by'Umujyi wa Kigali

Siporo yitabirwa n'abiganjemo urubyiruko

Imihanda iba yakumiriwemo ibinyabiziga bya moteri

Bamwe bahitamo gukora siporo bagenda bisanzwe

Amb. Nkulikiyinka, Dusengiyumva na Mukazayire bafatanyije n'abandi gukora siporo

Aba bigira umupira w'amaguru mu irerero rya Bayern Munich bitabiriye siporo

Bwiza yatanze ubutumwa bushishikariza benshi gukora siporo