Imikino Olempike ya Tokyo 2020 yasubitswe

Yanditswe na Eric Tony Ukurikiyimfura
Kuya 24 Werurwe 2020 saa 03:06
Yasuwe :
0 0

Abashinzwe gutegura imikino Olempike ya Tokyo 2020, bemeranyijwe ko isubikwa umwaka umwe, ikazaba mu mwaka utaha wa 2021 kubera icyorezo cya Coronavirus cyibasiye Isi.

Imikino Olempike ya Tokyo yagombaga kuba hagati ya tariki ya 24 Nyakanga n’iya 9 Kanama 2020.

Mu kiganiro yagiranye n’abanyamakuru kuri uyu wa Kabiri, Minisiteri w’Intebe w’u Buyapani, Shinzo Abe, yavuze ko yaganiriye n’Umuyobozi wa Komite Olempike Mpuzamahaga, Thomas Bach, bakemeranywa ko imikino isubikwa.

Ati “Nsabye ko imikino yakwigizwa inyuma umwaka ndetse Perezida [wa IOC] Thomas Bach yabyemeye 100%.”

Minisitiri w’Intebe Shinzo Abe, yatangaje ibi nyuma y’iminsi ibiri Komite Nyobozi ya IOC iteranye ku Cyumweru tariki ya 22 Werurwe, aho yari yemeje ko umwanzuro wa nyuma ku mikino Olempike ya Tokyo 2020 uzatangazwa mu byumweru bine biri imbere.

Umwe mu bagize IOC, Dick Pound, yari yatangaje ko iyi mikino izasubikwa kugeza mu 2021.

Ibihugu bitandukanye ku Isi byari bimaze iminsi bisaba ko iyi mikino yasubikwa kubera icyorezo cya Coronavirus cyahagaritswe amarushanwa yose arimo n’ayo gushaka itike ya Tokyo 2020.

Canada na Australia ni byo bihugu byari bimaze gutangaza ko bitazajya mu mikino Olempike ya Tokyo 2020 mu gihe u Bwongereza nabwo bwari bwatangaje ko bufata icyo cyemezo.

Mu Cyumweru gishize, Komite Olempike Mpuzamahanga yari yatangaje ko abagera kuri 57% ari bo bamaze kubona itike yo kwitabira imikino Olempike ya Tokyo 2020.

Muri abo 57% harimo Abanyarwanda batatu bamaze kubona itike mu gusiganwa ku maguru no mu mukino w’Amagare.

Imikino Olempike ya Tokyo 2020 yigijwe inyuma umwaka umwe
Minisitiri w'Intebe w'u Buyapani, Shinzo Abe, yatangaje ko bemeranyije na IOC ko imikino ya Tokyo 2020 isubikwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .