Imikino Olempike ya Tokyo 2020 ishobora kwigizwa inyuma

Yanditswe na Eric Tony Ukurikiyimfura
Kuya 24 Werurwe 2020 saa 09:51
Yasuwe :
0 0

Umwe mu bagize Komite Olempike Mpuzamahanga, Dick Poun, yavuze ko imikino Olempike ya 2020 yari kubera i Tokyo guhera tariki ya 24 Nyakanga kugeza ku ya 9 Kanama, izasubikwa umwaka umwe, ikaba mu 2021 kubera icyorezo cya Coronavirus.

Ibi yabitangaje kuwa Mbere tariki ya 23 Werurwe 2020, nyuma y’uko Komite Olempike mu Bwongereza itangaje ko itazohereza abakinnyi i Tokyo mu mpeshyi.

Australia na Canada ni ibindi bihugu byatangaje ko bitazitabira iyi mikino ya Tokyo 2020 kubera icyorezo cya Coronavirus cyibasiye Isi.

Dick Pound yabwiye USA Today ko hashingiwe ku makuru Komite Olempike Mpuzamahanga ifite, imikino ya Tokyo 2020 izasubikwa.

Ati "Hashingiwe ku makuru IOC ifite, hafashwe icyemezo cyo gusubika imikino."

"Ibipimo biri gukorwa ntabwo bigaragaza uko mu minsi iri imbere bizaba bimeze, ariko imikino ntabwo izatangira tariki ya 24 Nyakanga.”

Komite Olempike Mpuzamahanga yihaye ibyumweru bine kugira ngo ifate umwanzuro ku hazaza h’imikino yo mu mpeshyi, ariko umunyamuryango wayo w’inararibonye, Dick Pound, avuga ko icyemezo kizatangazwa vuba.

Ati "Bizaza mu byiciro. Tuzayisubika ubundi dutangire guhangana n’ingaruka zose zo kwimura ibindi byinshi."

Umuyobozi wa Komite Olempike mu Bwongereza, Hugh Robertson, yavuze ko na bo bateganya gutera ikirenge mu cya Australia na Canada.

Ati "Ntibuna uburyo ishobora gukomeza dukurikije uko ibintu bimeze. Ndizera ko vuba aha tuzifatanya na Canada na Australia.”

Kugeza kuri uyu wa Mbere, habarurwaga abantu basaga ibihumbi 370 banduye Coronavirus.

Perezida w’Impuzamashyirahamwe y’imikino ngororamubiri ku Isi, Lord Coe, na we yasabye ko imikino Olempike izabera muri Tokyo yasubikwa.

Imikino Olempike ya Tokyo 2020 ishobora gukomwa mu nkokora na Coronavirus
Umwe mu bagize Komite Olempike Mpuzamahanga, Dick Pound, yavuze ko imikino izasubikwa kugeza mu 2021

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .