00:00:00 IGIHE NETWORK KN KINYARWANDA EN ENGLISH FR FRANCAIS

Minisitiri Ngabitsinze muri ‘Kimono’

Yanditswe na Eric Tony Ukurikiyimfura
Kuya 4 Mutarama 2023 saa 11:03
Yasuwe :

Minisitiri w’Ubucuruzi n’Inganda, Dr Jean-Chrysostome Ngabitsinze, yifatanyije n’abana basoje gahunda y’ibiruhuko babarizwa mu ishuri rya “The Champions Sports Academy”.

Mu gihe cy’ibiruhuko, ishuri “The Champions Sports Academy” ritegura igikorwa cy’imyitozo ku bana bafite imyaka hagati ya 4 na 17 mu mikino itandukanye irimo Karate, Badminton, kwirwanaho “Self defence”, imikino ngoromubiri “Gymnastics”, kubyina bya Kinyarwanda ndetse n’indangagaciro za siporo.

Kuva taliki 15 Ukuboza 2022 ni bwo hatangiye iyi gahunda yo gutoza abana mu biruhuko “Best Holidays Sports for Children” aho yasojwe ku wa Kabiri, tariki ya 3 Mutarama 2023 ikaba yaraberaga ahahoze ari muri Sports View Hotel i Remera.

Iyi gahunda y’ibiruhuko muri rusange yitabiriwe n’abana bagera ku 125 aho bibanze cyane ku mukino wa Karate ndetse no kubyina bya Kinyarwanda.

Minisitiri w’Ubucuruzi n’Inganda, Dr Jean-Chrysostome Ngabitsinze usanzwe ufite umukandara w’umukara muri Karate, ni umwe mu bitabiriye iki gikorwa hamwe n’ababyeyi bari baherekeje abana babo.

Bamwe mu bana bitabiriye iki gikorwa, Shami na Imanzi bakaba basanzwe bakina Karate, bavuze ko byabafashije cyane kumenya kwiranaho no kugira imyitwarire myiza.

Imanzi yagize ati “Maze kwiga byinshi ariko iby’ingenzi birimo ikinyabupfura, kumenya gufasha abandi no kuba nakwirwanaho.”

Irizerwa Emmanueline, umwe mu babyeyi bafite abana bitoreza muri “The Champions Sports Academy” yavuze ko nyuma y’umwaka umwana we atangiye kwitoza Karate hari byinshi byahindutse birimo kuba yaramenye gushyira ibintu ku murongo kuko atagita umwanya munini areba televiziyo.

Ati “Ntabwo twazanye umwana hano kubera ko aritwe dukunda Karate, ni we uyikunda. Impinduka ziragaragara cyane, yamenye gushyira ibintu ku murongo, amenya iby’ingenzi kuri we ku buryo areba cyane ibimwungura ubumenyi. Aratsinda cyane mu ishuri kandi ikindi kintu nakunze cyane ni uko afite umutima wo guhatana muri we.”

Cyusa Mucyowiraba Léandre na we ufite umwana witoreza muri “The Champions Sports Academy”, yavuze ko gukora siporo byatumye abana bagira ubuzima bwiza kandi imibiri yabo igakomera bikanabafasha kwiga neza kuko siporo ituma bagira ubuzima bwiza muri rusange.

Aba babyeyi nyuma yo kubona ibyiza abana babo bungutse bashishikariza bagenzi babo ko na bo bazana abana babo kugira ngo bakore siporo bityo bavumbure impano zibarimo ndetse banahigire imyitwarire myiza.

Umuyobozi wa “The champions Sports Academy”, Nkuranyabahizi Noël, yavuze ko iyi gahunda yagenze neza kuko mu mwaka wose wa 2022 batoje abana mu byiciro itandukanye ndetse ko hari n’abakinnye amarushanwa atandukanye muri Karate bakitwara neza.

Yakomeje avuga ko banahuguye abatoza babafasha mu gutoza abana ubu bafite ibyangombwa byemewe mu gihugu.

Ati “Twashoboye gufasha abana benshi baba abahungu n’abakobwa, twabonye abashobora gukina amarushanwa muri Katare kuko ari yo twahereyeho, hari n’abakinnyi ku rwego mpuzamahanga babona imidali ku rwego rwa Afurika. Abatoza bacu bafite impamyabushobozi zemewe ku rwego rw’Igihugu harimo n’abafite izo ku rwego mpuzamahanga.”

Muri 2017 ni bwo Nkuranyabahizi Noël usanzwe ari Umutoza mukuru w’Ikipe y’Igihugu ya Karate yatangije iri shuri “The Champions Sports Academy”.

Iri shuri rifite amashami muri Club House La Palisse i Nyandungu, i Nyanza mu Ntara y’Amajyepfo ndetse no muri Rwanda Christian Children School i Ntarama.

Mu biruhuko, abana bigira imikino itandukanye n'imbyino za Kinyarwanda muri 'The Champions Sports Academy' bashyirirwaho imyitozo yihariye
Uretse Karate, abana batozwa na siporo zitandukanye zirimo na Gymnastics
Bamwe mu babyeyi bari bagiye gushyigikira abana babo
Batozwa kandi kubyina bya Kinyarwanda
Minisitiri w’Ubucuruzi n’Inganda, Dr Jean-Chrysostome Ngabitsinze, yitabiriye gahunda yo gusoza imyitozo ku bana bari mu biruhuko
Minisitiri w’Ubucuruzi n’Inganda, Dr Jean-Chrysostome Ngabitsinze ari kumwe na Nkuranyabahizi Noël uyobora The Champions Sports Academy
Umuyobozi wa “The champions Sports Academy”, Nkuranyabahizi Noël, yavuze ko bashaka kuzamura impano zitandukanye z'abana bakavamo abakinnyi b'ejo hazaza

Amafoto: The Champions Sports Academy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .