Uyu munsi wizihijwe ku Cyumweru tariki 25 Kanama 2024 kuri Stade Mpuzamahanga ya Cricket nyuma y’iminsi ibiri usanzwe wizihirizwaho ari wo tariki 23 Kanama buri mwaka, umunsi Komite Mpuzamahanga Olempike yashingiwe mu Bufaransa mu Mujyi wa Paris mu 1894.

Ni igikorwa cyitabiriwe n’abana bagera kuri 200 baturutse mu bigo bitatu ari byo EP Gahanga, GS Karembure na GS Rwabutenge. Aba bana bizihije uyu munsi mu mukino wa Cricket na Olympic Day Run.

Mu kuwizihiza, Komite Olempike y’u Rwanda yafatanyije n’abagize Ihuriro ry’Abaserukiye u Rwanda mu Mikino Olempike “Rwanda Olympians Association (ROA)”, baganiriza abana ku bijyanye no kwimakaza indangagaciro za siporo n’iza Olempike zirimo kuba indashyikirwa, kubahana, ubucuti no gukundisha abana gukora siporo bakiri bato.

Abato bashishikarijwe gukurana urukundo rwa siporo no guharanira kuzitabira imikino Olempike.

Umuyobozi wa Komite Olempike y’u Rwanda, Umulinga Alice, yatangaje ko iki gikorwa bagitegura bagamije gushishikariza abana gukunda siporo kuko ari bo bazaserukira igihugu mu mikino mpuzamahanga.

Ati “Ni umunsi twizihije abana bigishwa uko babungabunga ibidukikije kuko ariyo nsanganyamatsiko yacu y’uyu mwaka. Twahisemo Cricket kuko ari umukino uzongerwa mu Mikino Olempike itaha mu 2028 bityo batangire bawusobanukirwe kandi banawukunde kuko ni umwe muwo twitwaramo neza.”

Nyuma yo kwigishwa umukino, aba bana bakinnye imikino hagati y’ibigo, aho EP Gahanga yegukanye ibihembo mu bakobwa n’abahungu.

Komite Olempike y’u Rwanda yageneye ibi bigo uko ari bitatu ibikoresho by’umukino wa Cricket kugira ngo uyu mukino ubashe kumenyekana.

Umuyobozi wa Komite Olempike y’u Rwanda, Umulinga Alice yasabye abakiri bato gukunda siporo no kugira inzozi zo kuzitabira Imikino Olempike

EP Gahanga yegukanye igikombe mu bakobwa

Abana bitabiriye uyu munsi bakoze Olympic Day Run muri Nyandungu Eco Park

Ibigo byashyikijwe ibikoresho byo gukina Cricket

Ku bufatanye n'Ishyirahamwe ry'umukino wo gutwara imodoka mu Rwanda, abana bigishijwe gutwara bahereye ku ikoranabuhanga

EP Gahanga yongeye kwegukana igikombe mu bahungu

Umuyobozi w’Ishyirahamwe ry’Umukino wa Cricket mu Rwanda, Stephen Musaale yaganirije aba bana

Uwihoreye Tufaha ukina Fencing uheruka kwitabira Imikino Olempike y'i Paris yasabye aba bana gukunda siporo no kugira inzozi

Uyu munsi witabiriwe n'abana barenga 200