Hateguwe siporo y’abana mu biruhuko izabafasha guteza imbere no kuvumbura impano zabo

Yanditswe na IGIHE
Kuya 30 Ukwakira 2019 saa 07:22
Yasuwe :
0 0

Umuryango wigisha abana siporo kugira ngo bayigire umuco ’Children and Youth Sports Organization’, wateguye Siporo y’abana mu biruhuko igamije guteza imbere no kuvumbura impano zabo kandi bagakura bakunda gukora siporo yo kivumbikisho cy’ubuzima bwiza.

Iyi siporo izabera mu bice bitandukanye by’Umujyi wa Kigali, izatangira kuwa 11 Ugushyingo 2019, yitabirwe n’abana kuva ku myaka itatu kugeza kuri 13, ikazajya ikorwa kuva saa 8:30 kugeza 12:30.

Izakorwa n’abana bakina imikino itandukanye harimo Basketball, Football, Volleyball, Tennis, Koga (Swimming) na Karate. Abana kandi bazatozwa kuvuga neza indimi zitandukanye harimo Icyongereza, Igifaransa n’Ikinyawanda binyuze mu biganiro n’ibiganiro mpaka bikorwa muri izo ndimi.

Umuyobozi wa Children and Youth Sports Organization, Mukasa Nelson, yabwiye IGIHE ko abana bazanatozwa umuco nyarwanda binyuze mu mbyino gakondo, umuco wo gutarama, kwivuga byose bishingiye ku muco gakondo.

Ati “Icyo dushaka ni ugukundisha abana siporo ndetse bakayigira umuco, ikanabafasha guteza imbere impano zabo. Ni ukubafasha kumenya akamaro ka siporo nk’isoko y’ubuzima bwiza, bagakangurirwa kuzakomeza kuyikora barabaye na bakuru”.

Avuga ko iyi siporo izafasha abana kudahugira mu bidafite umumaro kuko itanga uburere bwiza.

Mukasa yasabye ababyeyi kugeza abana aho ibikorwa bizabera ku bibuga bya Umubano Academy iherereye ku muhanda uhuza Kabeza na Kicukiro, kuri Hotel Hilltop mu Giporoso ku muhanda ujya ku kibuga cy’indege no kuri Hotel The Mirror.

Mukasa avuga ko ari ubwa kabiri iyi siporo iteguwe kandi ‘ubushize abana baracyishimiye cyane dore ko hari abamenye ko bafite impano kandi mbere batari babizi ndetse bikabafasha no kuguma mu mujyo w’uburere bwiza.”

Kwandikisha abana bazitabira iyi siporo bizatangira kuri uyu wa Kane tariki 31 Ukwakira 2019, bikorerwe kuri Hotel The Mirror ku Gisimenti no kuri Stade Amahoro.

Muri iyi siporo kandi hazajya hatangwa n’ubutumwa bwo gukangurira abana n’urubyiruko kurwanya ibiyobyabwenge, inda z’imburagihe, kurwanya virusi itera Sida no gukundisha abana umuco wo gusoma nk’uko umuryango ’Children and Youth Sports Organization usanzwe ubikora.

Umuryango Children and Youth Sports Organisation umaze imyaka ibiri uvutse, ukaba ugamije gukangurira urubyiruko kwitabira ibikorwa bituma rugira ubuzima bwiza, kuva mu myaka yo hasi.

Uyu muryango ufite icyerekezo cyo kugaragaza no kuzamura impano z’abana bato, binyuze mu kuzana imikino aho abana bose babona maze bo bakazabasha kwihitiramo bakurikije impano bifitemo, badatoranyirijwe.

Nyuma yo kwita ku mpano z’abana, uyu muryango wigisha abana no kwita ku buzima bwabo, cyane cyane kwirinda agakoko gatera Sida n’ibiyobyabwenge.

Muri gahunda yo gufasha abana guteza imbere impano zabo zitandukanye, uyu muryango watangije gahunda ya siporo z’abana mu biruhuko.

Uyu muryango kandi washyizeho gahunda yitwa Rwanda Students Lifestyle, yatangijwe muri Gicurasi uyu mwaka. Muri iyi gahunda habamo urugendo rwo kurwanya ibiyobyabwenge na virusi itera Sida, nyuma yarwo hagatangwa ubutumwa bijyanye.

Abana bakina imikino itandukanye irimo na Tennis
Bakina n'umupira w'amaguru aho abenshi bavumbura impano zabo
Umukino wa Basketball nawo ntabwo wasigaye inyuma mu yitozwa abana
Volleyball ni umukino usanga wishimiwe cyane n'abana
Umukino wa Karate nawo utozwa abana mu biruhuko
Abana batozwa n'umuco wo gusoma, gukora ibiganiro mu ndimi zitandukanye
Umutoza Mukasa ari kumwe n'abana bitabiriye siporo y'ibiruhuko umwaka ushize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza