Hatangijwe umwaka w’amarushanwa "Amashuri Kagame Cup 2020"

Yanditswe na Eric Tony Ukurikiyimfura
Kuya 3 Gashyantare 2020 saa 08:57
Yasuwe :
0 0

Kuri iki Cyumweru tariki ya 2 Gashyantare, nibwo hatangijwe ku mugaragaro amarushanwa "Amashuri Kagame Cup" muri uyu mwaka w’amashuri wa 2020 yatangirijwe ku mugaragaro mu Karere ka Kamonyi.

Insanganyamatsiko y’uyu mwaka muri iyi mikino ihuza ibigo by’amashuri mu Rwanda igira iti "Umurimo unoze umusingi w’iterambere rirambye."

Aya marushanwa aba mu mikino itandukanye ndetse no mu muco, yatangijwe ku mugaragaro n’Umuyobozi wa Siporo mu Mashuri (FRSS), Padiri Gatete Innocent, ari hamwe n’Umuyobozi w’Akarere ka Kamonyi, Kayitesi Alice.

Padiri Gatete yashimiye Ubuyobozi bw’Akarere ka Kamonyi bwemeye kwakira iki gikorwa cyane ku ruhare bugira mu gushyigikira ibikorwa bya siporo mu mashuri ndetse na siporo muri rusange, aho umwaka ushize bwatanze inkunga ya miliyoni 15 Frw muri iyi mikino y’amashuri igaragaza impano z’abakiri bato.

Mu butumwa yatanze, Padiri Gatete yagarutse ku mategeko akurikizwa haba mu mikino no mu muco, asaba ko muri uyu mwaka mushya yazubahirizwa.

Ati “Ndasaba ko aya mategeko asobanurirwa neza abakinnyi bose maze akubahirizwa, bityo amarushanwa yacu y’uyu mwaka agaca mu mucyo.”

“Intego twihaye muri Siporo n’Umuco ni Umurimo unoze, umusingi w’iterambere. Tuzaharanira ko twesa uwo muhigo kandi turifuza ko amakipe aziyongera n’imikino ikaba myinshi, akaba ariyo mpamvu twatangiye kare.”

Muri iki gikorwa, abanyeshuri bo mu bigo bitandukanye bifatanyije na bamwe mu batuye Akarere ka Kamonyi muri siporo rusange ya “Car free day” yashorejwe ku cyicaro cy’Akarere.

Nyuma y’aho habaye imikino muri Basketball y’abakobwa, Ishuri rya Ste Bernadette Kamonyi ritsinda irya Ste Adelaide amanota 68-36 mu gihe mu mupira w’amaguru wahuje amakipe y’abahungu, GS St Jean Bosco yatsinze GS Rosa Mistica ibitego 3-0.

Amarushanwa “Amashuri Kagame Cup” y’uyu mwaka wa 2020, azasozwa muri Kamena mu cyiciro cy’abatarengeje imyaka 19, hamenyekane amakipe azahagararira u Rwanda muri FEASSSA izabera mu Mujyi wa Kakamega muri Kenya.

Abanyeshuri bo mu bigo byo mu Karere ka Kamonyi bifatanyije n'abahatuye muri Siporo Rusange yabaye kuri iki Cyumweru mu gitondo
Kuri iki Cyumweru kandi nibwo hatangijwe umwaka w'amarushanwa y'Amashuri Kagame Cup 2020
Imikino ihuza amashuri yitezweho kugaragaza impano z'abakiri bato muri siporo zitandukanye
Umuyobozi w'Akarere ka Kamonyi, Kayitesi Alice (wa kabiri uturutse ibumoso) n'Umuyobozi wa Siporo n'Umuco mu Mashuri, Padiri Gatete Innocent (ubanza iburyo) mu muhango wo gutangiza imikino ihuza amashuri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .