Habuze iki ngo intego u Rwanda rwihaye muri politiki ya siporo ya 2012-2020 zigerweho?

Yanditswe na Eric Tony Ukurikiyimfura
Kuya 7 Ugushyingo 2020 saa 08:24
Yasuwe :
0 0

Imyaka umunani irashize u Rwanda rwiyemeje guteza imbere siporo mu ngeri zitandukanye! Urebye muri siporo zitandukanye, intego nyinshi igihugu cyari cyihaye zagonze urukuta kuko zitatanze umusaruro wari witezwe.

Mu ntego u Rwanda rwari rwihaye muri gahunda y’iterambere rya siporo hagati ya 2012-2020 harimo ko ruzaba ari cyo gihugu cya mbere gifite ijanisha riri hejuru mu baturage bakora siporo zitandukanye muri Afurika.

Iyi gahunda yashyizweho n’iyari Minisiteri ya Siporo n’Umuco mu Ukwakira 2012, igomba kurangira uyu mwaka; yavugaga ko u Rwanda ruzaba ruri mu bihugu 10 bya mbere bikomeye mu mupira w’amaguru.

Harimo ko u Rwanda ruzaba ruri mu bihugu bitatu bya mbere muri Basketball, Volleyball, Amagare, Imikino Ngororamubiri n’iy’Abafite ubumuga. Iyi gahunda yagombaga kujyana no kongera umubare w’Abanyarwanda bakina imikino gakondo.

Mu gihe hasigaye amezi abiri ngo umwaka wa 2020 urangire, u Rwanda ni urwa 36 mu bagabo n’urwa 23 mu bagore mu mupira w’amaguru muri Afurika.

Mu Magare, u Rwanda ruri ku mwanya wa gatanu muri Afurika, uwa 12 muri Basketball n’uwa 11 muri Volleyball.

Kugeza ubu kandi Minisiteri ya Siporo ifite gahunda yo guteza imbere imikino gakondo no gusaba Abanyarwanda ko bayitabira guhera mu mashuri, hagashyirwaho amabwiriza agenga buri mukino.

Zimwe mu mbogamizi zari zagaragajwe hashyirwaho politiki ya siporo yo mu 2012 harimo kuba ibikorwa remezo bya siporo byari bike, ubushobozi bw’abatoza n’abayobora amashyirahamwe y’imikino bukiri hasi, amikoro adahagije n’imikoranire idahamye hagati ya federasiyo z’imikino, inzego z’ubuyobozi bwa Leta n’amashuri.

Abakinnyi n’abayobora siporo nta bushake bwo guhatana bagaragaza

Umusaruro muke ukomeza kuranga siporo y’u Rwanda akenshi ugaragarira ku makipe n’abakinnyi baserukira igihugu mu marushanwa atandukanye.

Mu 2013, Perezida Kagame yavuze ko amaze kurambirwa kureba imikino y’Ikipe y’Umupira w’Amaguru ‘Amavubi’ kubera imyitwarire yayo mu kibuga.

Ati “Mfite ikibazo ku bakinnyi kugeza no ku babayobora. Nzabagira inama Abanyarwanda umupira bazawuveho, bajye bareba uwo abandi bakina gusa, bo byarabananiye. Ikintu cyose gisaba umuhate n’imyitwarire mu kugikora. Gukina umukino cyangwa kugira ngo utsinde ntabwo ari ukujyamo gusa, oya, ariko ndabibona, imyitwarire y’abakinnyi n’ababayobora.”

“Iyo ukora ikintu utakizi neza, udafite umurava wo kukiga no kugikora, ukabikora wumva nk’aho ubizi, haba hari ikibazo. Umuntu wese ushaka kugera ku kintu, yumva ko hari ibyo ashobora kwiga, akanabikorera, akabishyiramo imbaraga. Naravuze, narafashije ariko ukabona nta gihinduka, ntabwo nabihisha, nararambiwe.”

“Gutsindwa si cyo kibazo, hari ugutsindwa wagaragaje ko washakaga gutsinda cyangwa gutsindwa wagaragaje ko mu gihe runaka uzatsinda. Ibintu birimo ikinyabupfura nubwo utatsinda ndavuga nti uyu yabishakaga.”

Perezida Kagame yongeye kugaruka kuri iyi ngingo ku wa 31 Ukuboza 2019, aho yagaragaje ko siporo n’imikino yo mu Rwanda bikwiye kubamo abafite ubushake kugira ngo bipiganwe ku rwego mpuzamahanga.

Ati “Nahereye ku mupira w’amaguru, Basketball itari yaza. Ariko muri rusange nkunda siporo yaba umupira w’amaguru, Basketball, Tennis, Cricket na yo turashaka kuyishyigikira. Umukino w’amagare urimo gutera imbere, turifuza ko byose twaha amahirwe ababifitemo ubushobozi n’ubushake bwo kubikunda kugira ngo iyo mikino yose izamuke igere ku rwego rwo gupiganwa ku rwego rw’amahanga nk’uko bimeze ubu ngubu.”

Mu bandi bayobozi bakomoje ku musaruro muke uboneka mu mikino harimo Bamporiki Edouard, kuri ubu ni Umunyamabanga wa Leta muri Minisiteri y’Urubyiruko n’Umuco.

Ubwo yaganiraga na TV10 mu 2019, yavuze ko uburyo amakipe y’igihugu ategurwamo biba bisa n’ibitunguranye ku buryo hatabaho gutegura abakinnyi ku buryo bamenyerana nk’abagiye gushakira hamwe umusaruro.

Ati “Iyo urebye muri siporo ibintu byose biba bisa nk’ibitunguranye, umuntu akava muri Amerika agahurira n’ikipe ku kibuga bakajya gukina mu mahanga […] ukibaza uti ese uyu muntu yaruhutse? Ntabwo ushobora kujya ku rugamba abo murujyanyemo mutaziranye, murarasana iyo mugezeyo.”

Ibi yabivuze nyuma y’uko mu Nama y’Umushyikirano ya 15, yabaye mu Ukuboza 2017, yatanze urugero ku Amavubi, avuga ko iyi kipe izajya ibona intsinzi igihe nayo yagize umuco wo guhiganwa.

Ati “Buriya umunsi nk’Amavubi yaretse gukina akinjira mu mwuka wo guhiganwa, azatanga ibyishimo. Ariko abantu bagikina, barabira ibyuya, bakore siporo birangirire aho ngaho.”

Kudaha agaciro ibikenerwa n’umukinnyi na byo bituma umusaruro uba iyanga

Uretse kudategurwa bihagije mu mikino itandukanye, hari kandi no kuba abakinnyi baserukiye igihugu ndetse bakabona umusaruro mwiza, badahabwa ibyo bagombwa, bigatuma bamwe bacika intege abandi bagasezera mu mikino kandi bafite impano ntagereranywa.

Murenzi Abdallah yavuze ko ubwo we na Komite ayoboye bageraga mu Ishyirahamwe ry’Umukino w’Amagare (FERWACY) basanze hari miliyoni 28 Frw abakinnyi batsindiye mu marushanwa atandukanye, ariko ntibayahabwe.

Ati “Ubu icya mbere twitaho ni umukinnyi, twasanze hari miliyoni 28 Frw abakinnyi bari barakoreye, ariko bitewe n’impamvu zitandukanye batabonye. Ni byo twashyize imbere, ubu ibirarane bigomba gutangwa na Federasiyo ku bakinnyi byaratanzwe, ibisigaye harimo ibirarane ku mikino bakinnye mu ikipe y’Igihugu, Minisiteri tukiganira uburyo byaboneka.”

“Umukinnyi kujya muri mission [mu irushanwa] adahawe ibyo agombwa, twavuze ko bicika, niba tudafite ibyo byangombwa bakeneye, irushanwa tukarisubika. Turifuza ko nta kirarane kizongera kubaho, abakinnyi bakajya bagenda banezerewe.”

Girimbabazi Rugabira Pamela uyobora Ishyirahamwe ry’Umukino wo Koga, na we avuga ko abakinnyi baramutse bitaweho, bishoboka ko igihugu cyabona umusaruro wifuzwa muri siporo.

Ati “Umusaruro ni ukwibanda cyane ku bakinnyi, umuntu akamenya ubuzima bwabo, ikindi ni uko amafederasiyo menshi turimo turiyubaka, mu mishinga dutegura tukibuka n’abakinnyi n’imishinga ibazamura kuko umukinnyi aba afite impano ariko adafite indi nzira, nitwe tubafasha kugera kuri iyo midali cyangwa ibikombe.”

Abashyiraho umurongo ngenderwaho muri siporo bakwiye kongera kuwunononsora

Murenzi Abdallah yavuze ko kugeza ubu gahunda zose zigamije guteza imbere siporo mu Rwanda bisa naho ziri mu nyandiko gusa, aho gushyirwa mu bikorwa kandi igihugu kiba cyatanze ibikenewe byose.

Ati “Dukwiye gusubiramo gahunda y’iterambere rya siporo mu mikino yose, byitwa ko tujya mu iterambere ariko ubona ko ni mu magambo n’inyandiko nziza, dukeneye ko bijya mu bikorwa, umukino ukubakirwa hariya hasi. Hari ibikorwaremezo igihugu gishyiraho, hari ubushake n’amafaranga menshi abijyamo, ariko hakenewe noneho kureba. Ese ibyo turimo nibyo bikenewe?”

“Ese nibyo bizaba bikenewe ahazaza muri iki gihugu cyacu mu ruhando mpuzamahanga? Ibyo byose rero abatekinisiye bakwiye kwicara bagategura gahunda y’iterambere iva mu mpapuro ikajya mu bikorwa. Hari gahunda nziza yo gukorana na siporo yo mu mashuri, umwana arerwa akiri muto, ikindi bikagendana n’ibyo dufitemo impano kuko hari ubwo abantu bashyira imbaraga mu kintu nyamara atari cyo kirimo impano zabo.”

Yakomeje agira ati “Abantu bakwiye kumva ko siporo ari ubucuruzi, hari abumva ko siporo ijyamo ubishatse, umubyeyi ntashobora kugurira umwana igare ngo byibuze mu myaka 10 azabe umunyamwuga, abone ubuzima. Inzego zose zikwiye kubigiramo uruhare, ntitubibone nko kwishimisha, tukabigira ubucuruzi.”

Imikoranire idahamye hagati ya Minisiteri ishinzwe Siporo na Federasiyo zitegura abakinnyi iracyari ikibazo

Abasesengura umupira w’amaguru bakunze kugaragaza ko mu itegurwa ry’amakipe y’igihugu cyangwa abakinnyi bahagararira u Rwanda, inzego zibafite mu nshingano zitana ba mwana cyane ku bijyanye n’amafaranga cyangwa ubundi bufasha bukenerwa kugira ngo umukinnyi ategurwe kugeza abonye ishimwe niba yegukanye umudali cyangwa igikombe ku ikipe.

Ubwo yaganiraga n’itangazamakuru muri Nzeri, Umunyamabanga Uhoraho muri Minisiteri ya Siporo, Shema Maboko Didier, yavuze ko hari ibikinozwa mu mikoranire y’uru rwego rushinzwe siporo n’amashyirahamwe y’imikino.

Ati “Mu mirongo migari turimo turakora, amategeko tugenda dushyiraho, harimo ibyo byose binagaragaza ibigomba gukorwa. Nabamenyesha ko itegeko rya siporo ryo mu 2017, rigena ko hagomba kujyaho amateka (Ministerial orders) atandukanye, ubu tukaba twaramaze kuyakora, tukaba turi mu nzira zo kuyashyikiriza inzego zemeza imishinga y’amategeko.”

“Tukaba dufitemo iteka rya Minisitiri rigena imikorere n’imikoranire y’inzego z’imitunganyirize ya siporo n’imikino n’uburyo bwo gutanga ishimwe n’ingororano ku bakinnyi.

“Iri ni iteka rizadufasha gukemura icyo kibazo cy’uburyo Minisiteri ikorana n’amafederasiyo noneho bitomoye nubwo dukorana bisanzwe, ariko noneho hakaba hariho iteka rya Minisitiri ribigena nk’uko biteganyijwe mu itegeko rya siporo kandi noneho rikagena uburyo abakinnyi bahabwa ishimwe n’ingororano mu gihe bakiniye ikipe y’Igihugu.”

Shema akomeza ati “Iteka rya kabiri ni irya Minisitiri rigena imitunganyirize y’ibyiciro bya siporo n’imikino n’imikorere n’imitunganyirize y’irerero ryigisha siporo n’imikino. Rizaduha uburyo dushyiraho ibyiciro bya siporo birimo ya siporo y’umwuga uburyo igomba kumenyekana cyangwa umurongo igenderaho.”

Hari kandi iteka rya gatatu rigena ibizajya bigenderwaho kugira ngo hubakwe ibikorwaremezo bya siporo n’imikino.

Umutwe wa kabiri muri Manifesto ya FPR Inkotanyi ugaruka ku ntego z’uyu muryango muri Siporo, aho uvuga ko hazashyirwaho uburyo bunoze butuma imikino n’imyidagaduro biba umuco w’Abanyarwanda.

Ni ibihe bizibandwaho mu myaka 10 iri imbere?

Politiki nshya y’iterambere rya siporo mu Rwanda, yateguwe na Minisiteri ya Siporo, izamara imyaka 10 (2020-2030).

Bimwe mu bizibandwaho harimo gushyigikira no guherekeza abakinnyi bagaragaza impano ku bufatanye bw’inzego zose zishinzwe siporo n’ababyeyi, inshingano za buri umwe zigasobanurwa.

Hari kandi kongerera ubushobozi abarimo abasifuzi, abatoza n’abari mu nzego z’ubuyobozi bwa siporo, gukorera ku mihigo no gushaka uburyo siporo yakubakirwa ku mikoro arambye nyuma y’uko COVID-19 igaragaje ko siporo y’u Rwanda idashobora gutunga abayibamo.

Mu bindi harimo gushyigikira siporo y’abagore igatera imbere, kubaka siporo ishingiye ku bushakashatsi ndetse siporo ikagira uruhare mu bubanyi n’amahanga.

Mu 2017, Perezida Kagame yasabye ko abakinnyi bagaragaza impano barimo Nyirarukundo Salome usiganwa ku maguru, bashyigikirwa.
Ikipe y'Igihugu ya Rugby yabanje kugorwa no kubona amafaranga azayitunga ubwo yiteguraga kujya gukina na Côte d’Ivoire mu ijonjora ry’ibanze ryo gushaka itike yo gukina Igikombe cya Afurika cya Rugby mu 2019
Uburyo Hadi Janvier (wa kabiri ibumoso) na Ndayisenga Valens (ubanza iburyo) baretse umukino w'Amagare byerekana ko hari igikwiye gukorwa muri siporo y'u Rwanda
Ikipe y'igihugu y'umupira w'amaguru 'Amavubi', iri mu zikunze kurangwa n'umusaruro muke mu marushanwa yitabira
Mu mikino itandukanye, abatoza bahabwa amahugurwa kugira ngo bafashe mu iterambere rya siporo y'u Rwanda
Ubwo Amavubi U-17 yajyaga mu Gikombe cy'Isi cyabereye muri Mexique mu 2011, hari icyizere ko u Rwanda rugiye kugira abakinnyi bakomeye mu mupira w'amaguru
Umunyamabanga Uhoraho muri Minisiteri ya Siporo; Shema Maboko Didier, aherutse kuvuga ko hazashyirwaho iteka rigena uburyo abakinnyi bahagarariye igihugu bashimirwa
Perezida wa FERWACY, Murenzi Abdallah, avuga ko hakwiye kongera kunonosorwa politiki y'iterambere rya siporo kandi bigashingira ku bushakashatsi
Minisiteri ya Siporo iteganya kuvugurura imikoranire yayo n'amashyirahamwe y'imikino
Kigali Arena yuzuye mu 2019, ni kimwe mu bikorwaremezo by'imikino byubatswe mu myaka umunani ishize
Abanyarwanda bagaragaza inyota yo kuryoherwa n'imikino nubwo batenguwa n'abakinnyi babahagararira
Hirya no hino mu gihugu hubatswe stade zitandukanye zirimo iya Ngoma (iri ku ifoto)
Perezida Kagame ahora yibutsa abakinnyi b'Abanyarwanda ko impano igomba guherekezwa n'ikinyabupfura n'ubushake bwo gutsinda
Mu kiganiro yatanze mu Nama y'Igihugu y'Umushyikirano ya 15 yabaye mu 2017, Bamporiki Edouard yavuze ko umunsi Amavubi yatangiye guhatana azajya atsinda
Abaturage bo mu Karere ka Gatsibo batera imbaraga umwe mu basiganwaga mu irushanwa ryiswe "Gatsibo Sports Day" mu 2019
Minisiteri ya Siporo iherutse gutangaza ko hazatangazwa amabwiriza agenga buri mukino gakondo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .