Iri rushanwa ryatangiye ku wa ku 12 Kanama aho icyumweru cyaryo cya mbere cyasojwe ku wa Gatandatu, tariki ya 17 Kanama 2024, ku bibuga bya Tennis biri muri IPRC Kigali.

Umunya-Canada Jay Lin Gibson yegukanye iki cyumweru mu bahungu atsinze Umurundi Gatoto Allan amaseti 2-0 (7-6, 7-5) ku mukino wa nyuma.

Mu bakobwa, irushanwa ryegukanywe n’Umunya-Tunisia Nadine Hamrouni watsinze Umubiligikazi Anouk Vandevelde amaseti 2-1 (6-3, 2-6, 6-4).

Aya marushanwa y’abato ategurwa na ITF kugira ngo abafashe gushaka amanota yo kujya ku rutonde rw’abakinnyi ba Tennis babigize umwuga.

Uwegukanye “ITF World Tennis Tour Juniors/ Grade 4” atsindira amanota 60, uwatsindiwe ku mukino wa nyuma akabona 36, ugeze muri ½ akabona 18. Muri ¼ ni amanota 10 naho muri 1/8 ni atanu.

Mu bakina ari babiri, abatwaye irushanwa babona amanota 45 mu gihe abandi babona 27, 14 n’arindwi kuva ku mukino wa nyuma kugeza muri ¼.

Muri iki cyiciro, Umunyarwanda Hakizumwami Junior wafatanyaga n’Umurundi Allan Gatoto mu bakina ari babiri, begukanye iki cyumweru cya mbere nyuma yo gutsinda Abanya-Pologne Wiktor Jeż na Juliusz Stańczyk amaseti 2-0 (7-6(5), 7-5).

Mu bakobwa bakina ari babiri, irushanwa ryegukanywe na Uxue Azurza Frade wo muri Espagne na Romina Dominguez Garcia wo muri Mexique batsinze Nadine Hamrouni na Anouk Vandevelde 6-4, 7-6(0).

Perezida w’Ishyirahamwe ry’Umukino wa Tennis mu Rwanda, Karenzi Théoneste, yavuze ko icyumweru cya mbere cyagenze neza ndetse irushanwa ryari ku rwego rwo hejuru ku buryo ahazaza h’abakinnyi hatanga icyizere.

Ati “Mwabonye ko twagize Umunyarwanda watsinze mu bakina ari babiri, twagize Umurundi wakinnye umukino wa nyuma mu bakina ari umwe, hari n’abandi bana bo muri Afurika batangiye kuzamuka. Turashaka kongeramo n’andi marushanwa ngo tuyegereze abana bacu barusheho kuzamuka.”

Abanyarwanda 18 ni bo bari bitabiriye iki cyumweru cya mbere barimo abakobwa umunani, ariko bose bagowe no kurenga ijonjora rya mbere mu bakina ari umwe. Muri rusange, irushanwa ryarimo abahungu 32 n’abakobwa 22.

Icyumweru cya kabiri cy’iri rushanwa mu byiciro byombi, na cyo kizakinirwa ku bibuga bya IPRC Kigali tariki ya 19-24 Kanama 2024.

Umunya-Tunisia Nadine Hamrouni wegukanye irushanwa mu bakobwa

Umubiligikazi Anouk Vandevelde ntiyorohewe n'umukino wa nyuma yari yagerageje kwitwaramo neza

Gatoto Allan yahuye na Gibson ku mukino wa nyuma mu bahungu bakina ari umwe

Abakobwa bakinnye umukino wa nyuma mu bakina ari umwe bambikwa imidali

Perezida w’Ishyirahamwe ry’Umukino wa Tennis mu Rwanda, Karenzi Théoneste, yavuze ko icyumweru cya mbere cyagenze neza

Umurundi Gatoto Allan yahawe igikombe mu bakina ari babiri aho yafatanyije n'Umunyarwanda Hakizumwami, ariko wahise ujya kwitabira irindi rushanwa muri Angola

Abakobwa bakinnye umukino wa nyuma mu bakina ari babiri

Abahungu bakinnye umukino wa nyuma mu bakina ari umwe bashimirwa

Jay Lin Gibson watsinze mu bahungu bakina ari umwe

Nadine Hamrouni yifotozanya igikombe yegukanye mu bakobwa bakina ari umwe

Abegukanye irushanwa muri buri cyiciro bifotozanya n'abayobozi