Mu gitondo cyo kuri iki Cyumweru, tariki ya 16 Werurwe 2025, ni bwo hakinwe isiganwa rya Australian Grand Prix, rikinirwa mu muhanda wa Melbourne Grand Prix Circuit ureshya n’ibilometero bitanu.

Ni isiganwa ryitabiriwe n’abakinnyi 20 bo mu makipe 10 akina muri Formula One, aho bazengurutse muri uyu muhanda wa Melbourne inshuro 57.

Lando Norris yabashije guhangana n’ikirere cyari cyiganjemo imvura nyinshi, impanuka za buri kanya zatumaga imodoka ishinzwe umutekano ihora yinjira mu isiganwa n’ibindi, asiga Max Verstappen wongeye kwerekana ko azagorana muri uyu mwaka akisubiza igikombe cye.

Norris yakoresheje isaha imwe, iminota 42 n’amasegonda atandatu, ndetse ahita afata n’umwanya wa mbere ku rutonde rusange rwa Formula One n’amanota 25.

Abakinnyi 14 basoje isiganwa, abandi batandatu bananirwa kurangiza, harimo n’abakoze impanuka zitari kubemerera gukomeza gusiganwa ngo barangize inshuro 57.

Abatarangije isiganwa ni Liam Lawson wa Red Bull, Gabriel Bortoleto wa Kick Sauber Ferrari, Fernando Alonso wa Aston Martin, Carlos Sainz wa Williams Mercedes, Jack Doohan wa Alpine Renault na Isack Hadjar wa Racing Bulls Honda RBPT.

Lewis Hamilton wakinnye isiganwa rya mbere mu mateka ye ari kumwe na Ferrari, yananiwe kwitwara neza asoreza ku mwanya wa 10 ndetse arushwa amasegonda 22 n’uwa mbere.

Isiganwa rikurikiraho rizabera mu Bushinwa hakinwa Chinese Grand Prix mu muhanda wa Shanghai International Circuit, tariki ya 23 Werurwe 2025.

Charles Leclerc yagerageje uko ashoboye ariko isiganwa ntiryamuhira

Lewis Hamilton wari witezwe mu isiganwa yabaye uwa 10

Charles Leclerc ni umwe mu bakinnyi Ferrari yari ihanze amaso

Abatekinisiye bari gutegura Charles Leclerc mbere y'uko ahaguruka

Ferrari ntabwo yahiriwe n'umunsi wa mbere wa Formula 1

Lando Norris yanikiriye bagenzi be

Isiganwa rya mbere rya Formula 1 ryakiniwe muri Australia

McLaren yakoze ibishoboka byose ngo yegukane isiganwa rya mbere muri Formula 1 ya 2025

Lando Norris yegukanye Australian Grand Prix

Formula 1 ikinwa n'imodoka z'umuvuduko uri hejuru

Aston Martin ntiyahiriwe n'umunsi wa mbere wa Formula 1

Abatekinisiye ba Aston Martin bategura umukinnyi wabo ngo ahaguruke

Lance Stroll wa Aston Martin yitegura guhaguruka

Fernando Alonso yananiwe gusoza isiganwa kubera impanuka

Fernando Alonso yakoze impanuka itari kumwemerera gukomeza

Liam Lawson wa Red Bull na we ari mu bakoze impanuka ku munsi wa mbere

Isiganwa ryabaye mu bihe by'imvura nyinshi

Imodoka nyinshi zakoze impanuka ntizarangiza isiganwa

Esteban Ocon wa Haas Ferrari yabaye uwa 13

Abafana benshi bitabiriye iri siganwa

Abakinnyi bazengurutse inshuro 57

Max Verstappen yabaye uwa kabiri

Abakinnyi bitwaye neza kuri uyu munsi bitegereza uko ihangana ryari rimeze

George Russell wa Mercedes yabaye uwa gatatu

Lando Norris yahawe igihembo cyo kwugakana isiganwa rya mbere