00:00:00 IGIHE NETWORK KN KINYARWANDA EN ENGLISH FR FRANCAIS

FIFA mu rugamba rwo kurwanya ihohoterwa rikorerwa abakinnyi kuri internet

Yanditswe na Mugisha Christian
Kuya 21 June 2022 saa 11:46
Yasuwe :

Muri raporo iheruka gushyirwa hanze n’Ishyirahamwe ry’Umupira w’Amaguru ku Isi, FIFA n’Umuryango Mpuzamahanga uhagarariye abakinnyi b’abanyamwuga, FIFPRO, batangaje ko 55% by’abakinnyi bakinnye imikino ya EURO 2020 na AFCON 2021 bahuye n’ibibazo by’ihohoterwa ku mbuga nkoranyambaga.

Iri hohoterwa [online abuse] ryibasira umuntu kubera imiterere ye, imyizerere ye cyangwa inkomoko ye ariko bigakorerwa kuri internet.

Muri iyi raporo kwibasira abaryamana bahuje ibitsina ni byo biza ku mwanya wa mbere bigakurikirwa n’ivanguramoko bikaba byarakorwaga muri aya marushanwa haba mbere cyangwa nyuma y’imikino.

Muri iyi mikino abakinnyi bibasiwe cyane ni ababikorewe na bene wabo cyane [abo bakomoka mu gihugu kimwe] aho 38% bari abo mu Bwongereza naho 19% bari abo mu Misiri.

Mu gihe habura iminsi ngo imikino y’igikombe cy’Isi itangire, FIFA ivuga ko imvugo ikwiye kuba ingiro ibikorwa bikaba byinshi maze ibi bibazo bigakumirwa muri iyi mikino.

FIFA yatangaje ko hagiye gutangizwa uburyo bwihariye aho ubutumwa bunyuzwa ku mbuga nkoranyambaga buzajya bubanza kugenzurwa mbere y’uko bubonwa n’abakurikira uwabutangaje.

Perezida wa FIFA, Gianni Infantino, yemeza ko inshingano ari ukurinda umupira w’amaguru n’abawukina.

Yagize ati “Ibiteye inkeke ni uburyo bwo kunyuza ubu butumwa ku mbuga nkoranyambaga bwerekeye abakinnyi, abatoza, abasifuzi ndetse n’amakipe ubwayo kandi bitemewe. Ivangura iryo ari ryo ryose nta mwanya rifite mu mupira w’amaguru.”

Muri iyi raporo abaryamana bahuje ibitsina nibo bibasiwe cyane ku kigero cya 40%, ivanguramoko rigakurikira ku kigero cya 38%.

Ivanguramoko rirwanya abirabura ryari ku kigero cya 76% ku mukino wa nyuma wa Euro 2020.

Ibi byatewe na ba rutahizamu barimo uwa Arsenal, Bukayo Saka na Marcus Rashoford wa Manchester United bahushije penaliti ku mukino wa nyuma wahuzaga u Bwongereza n’u Butaliyani.

Mu zindi nyigo zagiye zikorwa zigaragaza ko ubutumwa burenga ibihumbi 400 bwagiye butangazwa mu mikino ya nyuma y’aya marushanwa.

Bukayo Saka na Marcus Rashford ni bamwe mu bibasiwe n'ibitutsi nyuma y'umukino wa nyuma wa EURO 2020
Ku mukino wa nyuma wa AFCON 2021 hagaragaye ubutumwa burwanya idini ya Islam inshuro zirenga 30

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .