Evander Holyfield arashaka kwihimura kuri Mike Tyson wamurumye ugutwi mu myaka 23 ishize

Yanditswe na IGIHE
Kuya 7 Ukuboza 2020 saa 04:42
Yasuwe :
0 0

Nyuma y’imyaka 23 bahuriye mu murwano utararangiye, Evander Holyfield yizeye ko ashobora kongera kurwana na Mike Tyson ku nshuro ya gatatu.

Evander Holyfield w’imyaka 58, wasezeye gukina iteramakofe mu 2014, yabitangarije TMZ Sports, yemeza ko hari ibiganiro byahuje impande zombi ndetse yizeye ko azongera guhangana na Mike Tyson w’imyaka 54.

Ati “Njye ndi umwizerwa. Ndatekereza ko bizaba.”

Ubwo Mike Tyson yari amaze kurwana na Roy Jones Jr mu minsi ishize, yahishuye ko uruhande rwe rwagiranye ibiganiro n’urwa Holyfield, ariko hatarabaho kumvikana.

Gusa, Evander yavuze ko ibiganiro byahuje impande zombi biri mu cyerekezo kizima.

Aba bagabo babiri bafite amazina akomeye mu mateka y’iteramakofe, bahuye bwa mbere mu 1996 i Las Vegas, aho Evander yarushije Mike Tyson mbere yo kumutsinda mu gace ka 11.

Tyson na Holyfield bongeye gusubiramo umurwano wabo mu 1997, ari bwo Mike yarumye Evander ugutwi, agasezererwa mu gace ka gatatu k’umurwano.

Umurwano wa nyuma ukomeye Evander aheruka kugaragaramo ni uwo mu 2011 ubwo yari afite imyaka 48, aho yatsinze Umunya-Denmark, Brian Nielsen.

Nubwo Holyfield yagiye akunda kugaragara mu myitozo yo muri Gym, haribazwa niba afite ubushobozi bwo guhangana na Tyson uherutse kwerekana ko ahagaze neza ubwo yarwanaga na Roy Jones Jr.

Evander Holyfield (ibumoso) yizeye kurwana na Mike Tyson (iburyo) mu murwano wa gatatu
Mu 1997, Mike Tyson yarumye ugutwi Evander Holyfield
Tyson yasezerewe mu gace ka gatatu k'umurwano ubwo yarumaga Holyfield

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .