Cristiano Ronaldo na LeBron James banditse amateka, Semenya atsindwa ubujurire….amakuru agezweho mu mikino hanze

Yanditswe na Eric Tony Ukurikiyimfura
Kuya 9 Nzeri 2020 saa 12:01
Yasuwe :
0 0

Cristiano Ronaldo yabaye umukinnyi wa mbere w’i Burayi watsinze ibitego 100 mu mikino mpuzamahanga mu mupira w’amaguru w’abagabo ndetse aranabirenza nyuma yo gufasha Portugal gutsinda Suède ibitego 2-0 ku wa Kabiri.

Muri uyu mukino wa UEFA Nations League wabereye muri Suède, Ronaldo w’imyaka 35, yafunguye amazamu ku munota wa 45 mbere y’uko atsinda igitego cya kabiri ku munota wa 72.

Uyu mukinnyi wakinnye iminota 81 mbere yo gusimburwa na Diogo Jota, arabura ibitego umunani gusa ngo agere ku gahigo ko ku rwego rw’Isi nyuma y’uko kuri ubu yujuje ibitego 101 mu ikipe y’igihugu.

Ali Daei wakiniye Iran hagati ya 1993 na 2006, ni we mukinnyi watsindiye igihugu cye ibitego byinshi, 109, kurusha Ronaldo.

Abandi bakinnyi bamaze gutsindira ibitego byinshi amakipe y’ibihugu byabo ni Sunil Chhetri watsindiye u Buhinde ibitego 72 na Lionel Messi umaze gutsindira Argentine ibitego 70.

Cristiano Ronaldo ni we mukinnyi wa mbere w'i Burayi watsinze ibitego 100 mu mikino mpuzamahanga

===================================================

Tour de France 2020: Sam Bennett yegukanye agace ka 10, Primož Roglić agumana umwambaro w’umuhondo

Umunya-Irlande Sam Bennett ukinira Deceuninck-Quick-Step, yegukanye agace ka 10 ka Tour de France 2020 nyuma yo gukoresha amasaha atatu, iminota 35 n’amasegonda 22.

Sam Bennett w’imyaka 29, yatanze abandi ku murongo nyuma yo gukora intera y’ibilometero 168.5, aho abakinnyi bavuye ku Kirwa cya Olèron berekeza ku Kirwa cya Saint-Martin-de-Ré.

Umunya-Slovenie Primož Roglić yakomeje kwambara umwenda w’umuhondo n’ikinyuranyo cy’amasegonda 21 hagati ye na Egan Bernal wa Ineos Grenadiers.

Abakinnyi bemerewe gusiganwa ku wa Kabiri nyuma y’uko hatangajwe ko umuyobozi w’isiganwa Christian Prudhomme na bamwe mu bayobozi b’amakipe ane, banduye COVID-19.

Inzego z’ubuzima mu Bufaransa na sosiyete ya Amaury Sport Organisation (ASO) itegura Tour de France, bavuze ko mu gihe hari ikipe izajya igira abarwayi babiri ba Covid-19, izajya ikurwa mu isiganwa.

Kuri uyu wa Gatatu, harakinwa agace ka 11 gahagurukira i Chatelaillon-Plage kerekeza i Poitiers ku ntera y’ibilometero 167.5.

Abakinnyi batanu ba mbere mu gace ka 10

  1. Sam Bennett (Ire/Deceuninck-Quick-Step) 3:35’22"
  2. Caleb Ewan (Aus/Lotto Soudal) ibihe bimwe
  3. Peter Sagan (Slo/Bora-Hansgrohe)
  4. Elia Viviani (Ita/Cofidis)
  5. Mads Pedersen (Den/Trek-Segafredo)

Urutonde rusange nyuma y’agace ka 10

  1. Primož Roglić (Slo/Jumbo-Visma) 42: 15’ 23"
  2. Egan Bernal (Col/Ineos Grenadiers) +21"
  3. Guillaume Martin (Fra/Cofidis) +28"
  4. Romain Bardet (Fra/AG2R-La Mondiale) +30"
  5. Nairo Quintana (Col/Arkea-Samsic) +32"
Sam Bennett yegukanye agace ka 10 ka Tour de France 2020

===================================================

Kevin de Bruyne yatowe nk’umukinnyi w’umwaka na PFA

Umukinnyi wo hagati muri Manchester City, Kevin de Bryune, yegukanye igihembo cy’umukinnyi w’umwaka gitangwa n’Ishyirahamwe ry’Abakinnyi babigize umwuga (PFA) mu Bwongeza.

Mu bagore, iki gihembo cyegukanywe na Beth England ukinira Chelsea WFC mu gihe myugariro wa Liverpool; Trent Alexander-Arnold w’imyaka 21, ari we wabaye umukinnyi w’umwaka ukiri muto.

Ikipe y’umwaka yatowe muri Premier League: Nick Pope (Burnley), Trent Alexander-Arnold, Virgil van Dijk (Liverpool), Caglar Soyuncu (Leicester), Andrew Robertson (Liverpool), David Silva (Manchester City), Jordan Henderson (Liverpool), Kevin de Bruyne (Manchester City), Jamie Vardy (Leicester), Pierre-Emerick Aubameyang (Arsenal) na Sadio Mané (Liverpool).

Kevin de Bryune yahawe igihembo cy'Umukinnyi w'Umwaka mu Bwongereza, gitangwa na PFA

===================================================

Caster Semenya yatsinzwe ubujurire bwo kugabanyirizwa imisemburo ya testosterone

Umunya-Afurika y’Epfo Caster Semenya yatsinzwe urubanza rw’ubujurire yari yatanze mu Rukiko Rukuru rw’u Busuwisi, aburana n’ishyirahamwe ry’imikino ngororamubiri ku isi rivuga ko abagore basiganwa mu kwiruka n’amaguru bafite imisemburo ya kigabo izwi nka testosterone, izajya igabanywa.

Semenya ntabwo yemerewe kwitabira amasiganwa ari hagati ya metero 400 na metero 1000 adahawe imiti imufasha kugabanya imisemburo ya testosterone hakurikijwe amategeko mashya yashyizwemo muri 2019 n’Ishyirahamwe mpuzamahanga ry’Imikino Ngororamubiri.

Iri shyirahamwe rivuga ko aba bakinnyi bafite imisemburo ivanze iri ku rwego rwo hejuru, batakagombye kurushanwa n’abandi badafashe imiti.

Semenya w’imyaka 29, yavuze ko azakomeza guharanira uburenganzira bwe n’ubwa bagenzi be b’abagore bafite imisemburo ya kigabo.

Ati “Nzakomeza kurwanira uburenganzira bwa muntu ku bakinnyi b’abagore, haba mu kibuga cyangwa hanze yacyo kugeza igihe tuzaba twemerewe gusiganwa hagendewe ku buryo twavutse.”

Semenya watwaye umudali wa zahabu muri metero 800 mu mikino Olempike ya 2012 na 2016, yabuze amahirwe yo kwitabira Shampiyona y’Isi ya 2019 i Doha, kuko ikibazo cye cyari kitarakemuka.

Muri Werurwe uyu mwaka, yasiganwe muri metero 200 mu isiganwa ryabereye i Tokyo mu Buyapani, ryo ritamusabaga gufata imiti.

Caster Semenya yongeye gutsindwa ubujurire, aho atemera ibyo gufata imiti igabanya imisemburo ya kigabo afite

===================================================

NBA: Miami Heat yageze ku mukino wa nyuma mu Burasirazuba; LeBron James afasha LA Lakers

Ikipe ya Miami Heat yageze ku mukino wa nyuma wa Play-offs za NBA mu gace k’Uburasirazuba ku nshuro ya mbere kuva mu 2014, nyuma yo gutsinda Milwaukee Bucks imikino 4-1.

Miami Heat yatsinze umukino wa gatanu wahuje amakipe yombi kuri uyu wa Gatatu, ku manota 103-94.

Iyi kipe yaherukaga kugera ku mukino wa nyuma mu Burasirazuba ubwo yari iyobowe na LeBron James na Dwyane Wade mu myaka itandatu ishize.

Ku mukino wa nyuma, Miami Heat izahura n’ikipe izakomeza hagati ya Toronto Raptors na Boston Celtics. Celtics iyoboye n’imikino 3-2 muri ½.

Mu wundi mukino wabaye kuri uyu wa Gatatu, LeBron James yatsinze amanota 36, afasha Los Angeles Lakers kuyobora n’imikino 2-1 imbere ya Houston Rockets.

Muri uyu mukino wo mu gace k’Uburengerazuba, Lakers yatsinze ku manota 112-102, LeBron James ashyiraho agahigo k’intsinzi 162 muri Play-offs, aho yakiniye amakipe arimo Cleveland Cavaliers, Miami Heat na Lakers.

LeBron James ni umukinnyi umaze gutsinda imikino myinshi muri play-offs za NBA

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .