00:00:00 IGIHE NETWORK KN KINYARWANDA EN ENGLISH FR FRANCAIS

CHAN 2023: Amavubi yatengushye abafana atsindwa na Ethiopie kuri stade nshya

Yanditswe na Iradukunda Olivier
Kuya 3 September 2022 saa 05:55
Yasuwe :

Ikipe y’u Rwanda Amavubi yabuze itike yo kwerekeza mu mikino ya nyuma ihuza amakipe y’ibihugu mu bakinnyi bakina imbere mu bihugu byabo (CHAN 2023) nyuma yo gutsindwa na Ethiopie igitego 1-0 mu Karere ka Huye.

Ubwo hasohokaga urutonde rw’abakinnyi babanza mu kibuga, abantu benshi batunguwe no kubona umutoza w’Amavubi akoze impinduka eshatu mu ikipe yakinnye umukino ubanza muri Tanzania.

Ku nshuro ya mbere ahamagawe mu Amavubi, Tuyisenge Arsene, Rwatubyaye Abdul uheruka gukina muri Mutarama uyu mwaka na Jacques Tuyisenge udaheruka gutsinda babanje mu kibuga.

Uyu mukino wabereye muri stade nshya ya Huye, ikipe y’u Rwanda yakinnye igice cya mbere ifite intego zo kugarira. Byaje kutayihira kuko myugariro Serumogo Ally yakoze ikosa ryahesheje Ethiopie, umupira w’umuterekano waje kuvamo igitego rukumbi cyatsinzwe muri uyu mukino na Dawa Hutessa Dukele ku munota wa 22 w’umukino.

Umutoza w’ikipe y’u Rwanda Carlos Alos Ferrer yakoze impinduka mu gice cya kabiri, ashyiramo Muhozi Fred wasimbuye Mugisha Bonheur wari wibuze mu mukino. Muhozi yagerageje gufasha ikipe y’u Rwanda gusatira ariko kubona igitego bikomeza kugorana.

Nyuma yo gukoresha imbaraga nyinshi, umunaniro wabaye mwinshi, Ethiopie yongera gusatira ikipe y’u Rwanda ariko umunyezamu Ntwali Fiacre akomeza kwirwanaho.

U Rwanda rwarushijwe mu kibuga hagati byatumye nta mipira myinshi yageze kuri ba rutahizamu. Imipira yari guturuka mu mpande za Niyomugabo na Serumogo, ntabwo yabonetse uko bikwiye.

U Rwanda mu mukino ubanza na Ethiopie warangiye amakipe yombi anganyije ubusa ku busa. Ni mu mukino Ethiopie yakiriyemo u Rwanda tariki ya 26 Kanama 2022, muri Tanzania ku kibuga cya Benjamin Mkapa Stadium.

Ibi bivuze ko Amavubi atazagaragara muri CHAN 2023 izabera muri Algerie. Iri rushanwa rimaze kuba ku nshuro esheshatu, u Rwanda rumaze kwitabira inshuro enye, rugera muri 1/4 inshuro ebyiri.

Abakinnyi b’Amavubi babanje mu kibuga ni; Ntwali Fiacre, Serumogo Ally, Rwatubyaye Abdul, Niyigena Clement, Niyomugabo Claude, Tuyisenge Arsene, Niyonzima Olivier Seif, Mugisha Bonheur, Jacques Tuyisenge, Niyonzima Haruna na Nishimwe Blaise

Abakinnyi ba Ethiopie babanje mu kibuga ni; Mignot Debebe Dada, Milion Solomon Abicho, Gathuoch Panom Yiech, Amanuel Yohannes Gamo,Yigezu Bogale Asnake, Amanuel Gebremichael Aregawi, Dawa Hutessa Dukele, Kenean Markine Maleko, Remdan Yusef Mohamed, Asrat Tonjo Toylo, Fasil Gebremichael Weldegebriel.

Tuyisenge Arsene yabanje mu kibuga ari nabwo bwa mbere yari ahamagawe mu Amavubi
Abakinnyi b'Amavubi bakomeje kwirwanaho birinda ko batsindwa igitego cya kabiri
Tuyisenge Jacques udaheruka gutsinda igitego na we yabanje mu kibuga
Tariki ya 3 Nzeri, Ethiopie yasezereye u Rwanda mu gushaka itike CHAN 2023, irutsinze igitego 1-0. Ni umukino wakiniwe kuri stade nshya ya Huye
Serumogo Ally ntabwo yitwaye neza kuri uyu mukino
Stade nshya ya Huye yari yuzuye abafana
Stade nshya ya Huye yari irimo abafana benshi nubwo batashye bababaye
Abakinnyi 11 b'Amavubi babanje mu kibuga
Abakinnyi ba Ethiopie babanje mu kibuga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .