Iri rushanwa ryitabiwe n’ibigo umunani aribyo Banki y’Abaturage (BPR), I&M Bank, NCBA Bank, Ecobank, GT Bank, Zigama CSS, Equity na Bank of Kigali.

Byahatanye mu mikino ine nk’umupira w’amaguru, Volleyball, Basketball no Koga.

Iri rushanwa ryasojwe, Banki ya Kigali yihariye ibikombe kuko yabaye iya mbere Basketball na Volleyball, mu gihe muri ruhago yabaye iya gatatu, mu koga ikaba kabiri.

Muri Basketball, Equity Bank yabaye iya kabiri nyuma yo gutsindwa amanota 87-73, I&M Bank ya gatatu byatsinze BPR amanota 78-64. Ni mu gihe Isibo Gaga yabaye umukinnyi mwiza w’irushanwa.

Muri Volleyball, BK yegukanye igikombe yatsinze Zigama CSS amaseti 3-1, Banki y’Abaturage (BPR) iba iya gatatu, Byiringiro Jimmy wa Zigama CSS aba umukinnyi mwiza w’irushanwa.

Mu mupira w’amaguru, Zigama CSS yegukanye igikombe itsinze Equity ku mukino wa nyuma ibitego 3-2, mu gihe Bank ya Kigali yabaye iya gatatu. Hakizamungu Sadoke yabaye umukinnyi mwiza w’irushanwa.

Mu mukino wo koga, I&M Bank yabaye iya mbere, ikurikirwa na Bank ya Kigali ndetse na Ecobank. Ngabonzima Orlise yahize abandi mu bagore, mu gihe Ngango Claude yabaye uwa mbere mu bagabo.

Ibirori byo gutanga ibihembo byitabiriwe na Perezida w’Ishyirahamwe ry’Umupira w’Amaguru mu Rwanda (FERWAFA), Munyantwali Alphonse ndetse n’Umuyobozi wa Zigama CSS, Brig Gen Adolphe Simbizi.

Iri rushanwa ryakinwaga ku nshuro ya gatanu, ritegurwa mu rwego rwo gufasha abakozi gukora siporo ndetse n’abandi bafite impano zo gukina bakariboneramo amahirwe yo kubona akazi.

Banki ya Kigali yegukanye igikombe muri Volleyball itsinze Zigam CSS

Banki ya Kigali yongeye kwegukana igikombe muri Basketball

Byiringiro Jimmy wa Zigama CSS ahembwa nk'umukinnyi mwiza w’irushanwa muri Volleyball

Zigama CSS yegukanye igikombe mu mupira w'amaguru

Perezida wa FERWAFA, Munyantwali Alphonse ashyikiriza Hakizamungu Sadoke igihembo cy'umukinnyi mwiza

I&M Bank yitwaye neza mu mukino wo koga