Ni umukino wabaye mu gitondo cyo kuri uyu wa Gatandatu, tariki 7 Nzeri 2024 ku kibuga cy’imyitozo cya Stade Amahoro.

Uyu mukino wari ugamije guha umwanya abakinnyi batabashije gukina ku mukino uheruka wa Libya ndetse n’abatarabonye umwanya uhagije, cyane ko ari nabo umutoza Frank Spittler yabanje mu kibuga.

Mu bakibanjemo harimo Maxime Wenssens, Byiringiro Gilbert, Ishimwe Christian, Niyigena Clement, Nshimiyimana Yunussu, Ruboneka Jean Bosco, Mugisha Bonheur, Kwizera Jojea, Iraguha Hadji, Gitego Arthur na Samuel Gueulette.

Igice cya mbere cy’uyu mukino cyagaragayemo impinduka ubwo Byiringiro Gilbert yasimburwaga na Nsabimana Aimable mu bwugarizi ndetse mu mpera zacyo Amavubi abona igitego cyinjijwe na Ruboneka.

Uyu mukino warimo kugaragaza urwego rw’abakinnyi bamaze kugeraho wakinwe iminota 53 ndetse irangira ari igitego 1-0.

U Rwanda ruzakira Nigeria ku wa Kabiri, tariki 10 Nzeri 2024 saa Cyenda kuri Stade Amahoro, mu mukino wa kabiri wo mu itsinda rya kane.

Ni mu gihe abakinnyi barwo bari mu mwuka mwiza kuko baherutse kunganyiriza na Libya iwayo i Tripoli igitego 1-1.

Kwinjira kuri uyu mukino ni 2000 Frw, 3000 Frw mu myanya isanzwe, ibihumbi 20 Frw muri VIP, 50.000 Frw muri Business Suites na miliyoni muri Sky Box.

Samuel Gueulette ukinira RAAL La Louvière ari kwitegura Nigeria

Ruboneka Jean Bosco ni we watsinze igitego rukumbi cyabonetse ku mukino

Ani Elijah wa Police FC ahanganiye umupira na Niyigena Clement

Amavubi yatsinze Police FC igitego 1-0

Ishimwe Christian yageze mu Ikipe y'Igihugu asimbuye Imanishimwe Emmanuel Mangwende

Gitego Arthur ni umwe muri ba Rutahizamu Ikipe y'Igihugu yifashisha

Niyigena Clement ukina mu bwugarizi yakinnye umukino wa Police FC

Mugisha Bonheur yinjiye mu kibuga asimbuye ku mukino wa Libya ari ku wa Police FC yahawe umwanya wo kwerekana aho rwego rwe rugeze

Abakinnyi batagaragaye mu mukino wa Libya bafashijwe kwitegura uwa Nigeria

Kwizera Jojea utarabonye umanya wo kwitegura umukino wa mbere yahawe umwanya mu wa gicuti

Samuel Gueulette ni umwe mu bakinnyi Amavubi azifashisha akina na Nigeria