Amatariki mashya y’imikino Olempike ya Tokyo 2020 yatangajwe

Yanditswe na Eric Tony Ukurikiyimfura
Kuya 30 Werurwe 2020 saa 05:08
Yasuwe :
0 0

Komite Olempike na Paralempike Mpuzamahanga ku bufatanye n’abashinzwe gutegura imikino Olempike ya Tokyo 2020 batangaje ko iyi mikino yimuriwe umwaka utaha, izaba hagati ya tariki ya 23 Nyakanga n’iya 8 Kanama 2021.

Iyi mikino yasubitswe mu cyumweru gishize, yagomba kuba hagati ya tariki ya 24 Nyakanga n’iya 9 Kanama 2020, ariko yigizwa inyuma kubera icyorezo cya Coronavirus.

Hemejwe ko kandi imikino Paralempike ya 2020 yagombaga gutangira tariki ya 25 Kanama, izakinwa kuva tariki ya 24 Kanama kugeza ku ya 5 Nzeri 2020.

Izi nzego zabitangaje kuri uyu wa Mbere tariki ya 30 Werurwe hifashishijwe ikiganiro kuri telefoni, cyahuje Perezida wa IOC, Thomas Bach, Umuyobozi wa Tokyo 2020 Mori Yoshirō, Guverineri w’Umujyi wa Tokyo, Koike Yuriko na Minisitiri w’imikino Olempike na Paralempike mu Buyapani, Hashimoto Seiko.

Hatangajwe ko 57% by’abari bamaze kubona ibihe bibemerera kwitabira iyi mikino bazabigumana mu gihe abandi 43% bazabikorera Coronavirus nigabanuka.

Uyu akaba ari umwe mu myanzuro wafashwe hagendewe ko n’izina ry’imikino ritazahinduka, izakomeza kwitwa iya 2020.

Komite Olempike Mpuzamahanga yatangaje ko amatariki mashya yemejwe hagendewe ku kurengera ubuzima bw’abakinnyi no kuzirikana ububi bw’icyorezo cya Coronavirus.

Ni ku nshuro ya mbere imikino Olempike isubitswe mu gihe cy’amahoro.

Ahandi yasubitswe ni mu 1916, 1940 no mu 1944, hose kubera intambara z’Isi yose.

Amatariki mashya y'imikino Olempike na Paralempike ya Tokyo 2020 yatangajwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .